الموضوع: ضمان بيكانتو 2011

السلام عليكم و رحمه الله و بركاته

بقالى اكتر من سنه بقرر اشترى سياره هاتشباك و تكون كويسه و اخيرا قررت شراء البيكانتو و اتفرجت فى اكترمن مكان عليها و امبارح روحت سمير ريان و قدمت طلب شراء و فى انتظار الموافه ان شاء الله ( سبب اختيارى لريان انى جبت للمدام هيونداى اكسنت 2010 اوتوماتيك فى شهر يناير اللى فات و كانوا محترمين معانا جدا فى المعامله حتى لما جابولنا لون كان فيه خربوش بسيط جدا من نزه البلاستيك المدام رفضت تستلمها و هما بصراحه وافقوا و تانى يوم علطول بعتوا جابوا واحده تانيه و وقفوا كلهم يسلموها و فصصتها حته حته و الحمد الله سياره زى الفل ) المهم مش هطول عليكم انا دلوقتى عاوز اعرف بالنسبه للكيا هل بستلم الضمان بتاعها مع السياره ولا من التوكيل لان الهيونداى لما روحنا اول صيانه كله كان متسجل على الكمبيوتر و مكنش فى موضوع دفتر ضمان ده بس مش عارف ده موجود فى الكيا ولا النظام مختلف ؟
يا ريت حد اتعامل مع سمير ريان او معارض تانيه يفيدنى فى موضوع الضمان ده و يقولى كمان الصيانه الاولى بعد 1000 كم ولا بعد 5000 و افضل مكان قريب منى انا فى مدينه نصر .

اه على فكره انا هاخد معايا الميكانيكى بتاعى بتعامل معاه من اكتر من 10 سنين و ثقه كبيره جدا و قالى هاجى استلم معاك .

و شكرا للمنتدى الرائع ده

انا كنت بفكر كده فعلا زى ما حضرتك بتقول انى اول ما اشوفها قدامى هاخد الرقم و اكلم التوكيل من الموبايل و انا واقف و احاول اعرف المعلومه دى بس السؤال هنا يعنى هو مش هيخاف على سمعته مثلا لو كان عاوز يدينى 2010 و انا متفق على 2011 و اكيد هيعرف انى لازم هعرف مع الترخيص و ثانيا اكيد برضه هيبقى عارف انى لما اعرف انها خليجى و انا متفق انها توكيل مش هسيبه و هعمله قلق مش عارف انا فكرت كده لقيت انه لازم بيعمل حساب الكلام ده برضه على العموم انا مش عاوز اسبق الاحداث ده حتى الموافقه بتاعه البنك لسه مجتش اصلا بس كده او كده انا هحرص لانى سمعت من الميكانيكى بتاعى انه مره كان فى ورشه فى عين شمس و شاف عربيه سيراتو جديده من عند جابر عبد الشهيد و اكن فيها خبطه فى الباب و بيظبطوها و هيحطوها فى المعرض تانى
تعرفوا يا جماعه لو التوكيل نفسه بيسلم السيارات بسرعه و مفيش فترات الانتظار و يسهل الاجراءات مكنش الواحد لجا للناس اللى ممكن نشك فيهم و نعمل حساب لكل خطوه معاهم
الله المستعان