الموضوع: مقارنة تجربة مواتير الكامبرو القديم و الجديد و تغيير الجين 2

السلام عليكم و رحمة الله و بركاته
أخواني الكرام .... أعضاء منتدى نايل موتورز و رواد قسم البروتون
كل التحية و السلام و المحبة مني لكم جميعا .

أخوكم كما تعرفون يملك سيارة بروتون 2007 طراز جين 2 ....
الحمد لله على كل شئ
أضطرتني ظروف معينة أني أبيع سيارتي الجين 2 و أشتري سيارة أخرى بديلة
و الحمد لله أشترت برضه جين 2 و لكن موديل 2010 و أوتوماتيك

أولا عربيتي القديمة يوم ما بعتها مكنش فيها الهوا ( الحمد لله تقريبا معملتش حاجة تبع الضمان )
العربية كانت عاملة حوالي 40 ألف كم
تيل الفرامل الأصلي خلفي و أمامي ( لم يتم تغييره )
الصيانات كلها كانت في التوكيل
كل حاجة في العربية كانت سليمة تماما من ناحية الحمد لله لم يظهر عيوب نهائيا في تلك السيارة .
المهم حصل ظروف و بعت العربية و الحمد لله
أشتريت غيرها ................ جين 2 برضه ............ ورايا ورايا ....

أنا قلت أعرفكم و بالاضافة لكدا أعمل مقارنة بين العربيتين علشان فيه فروق بينهم تستاهل المقارنة و علشان الناس اللي مركبتش الجين 2 تعرف الفرق بين الجيل القديم من مواتير الكامبرو و الجيل الجديد .

عربيتي الحالية عاملة 5000 كم دلوقتي أستلمتها من 3 شهور تقريبا .

عرفنا أن الموتور القديم اللي كان راكب في الجين 2 لغاية 2008 ... فيه حاجة مهمة :
نقطة العزم بتثبت عند عدد لفات معين قبل ما تعلى تاني و يزيد السحب
تأثير النقطة دي كان في السحب على سرعات صغيرة ( لو بتشد مع حد بتبان لو أنت ماشي على عدد لفات موتور صغير )
و الموضوع ده كان ظاهر قوي في الأوتوماتيك و يكاد يكون خفيف قوي في المانوال .
ده رسم توضيحي من شركة بروتون نفسها بيوضح معدل صعود العزم بين الثلاثة مواتير
كامبرو عادي ( 110 حصان )
كامبرو أي اه اف ام (110حصان)
كامبرو سي بي أس (125 حصان)



طيب فرق السواقة أيه ؟؟؟

لا فيه فرق في السواقة
الموتور الجديد أنعم .......... أستجابته أحلى و أنعم بكتير خصوصا على السرعات الصغيرة و لغاية 130 كم -س

الموتور صوته بقى عادي زيه زي أي عربيه تانية
الصوت الرياضي في الكامبرو القديم أختفى

طبعا الموتور الجديد اللي فيه تكنولوجيا iafm صوته أهدى و أنعم في أستجابته و خصوصا الأوتوماتيك

اللي يسوق كامبرو أوتوماتيك القديم و كامبرو iafm أوتوماتيك الجديد هايلاقي فرق واضح في السحب ما بين الأثنين .

الفروق كمان ما بين الموديلين ( 2007 و 2010 )

العفشة أنعم ..............
الكاوتش متغير الأول كان فيه سيلفر ستون و الجديدة فيها جود يير .....
بحس أن السيلفر ستون كان ماسك في الأرض أحسن من الجود يير .... مش عارف يمكن علشان كان ناشف
طبعا صوت الكاوتش على الأرض مع السيلفر ستون كان أعلى و مع الجود يير أقل شوية .

فيه فروق تانية و لكن غير جوهرية
القديمة فرشها كان أحلى من ناحية الشكل ( أذواق و بتختلف )
القديمة كان فيها ساعة في التابلوه ........ شالوها في الجديد
الساعة دي كانت تحفة و جميلة و لذيذة و عملية جدا و أحسن من الديجيتال اللي أستبدلوها بها
نسيت أقول ان الساعة كانت ساعة عادية بعقارب
ده الشكل الجديد للتابلوه بدون ساعة



و ده الشكل القديم

العدادات القديمة طبعا كانت أحلى و مميزة جدا ( العد فيها كان فردي )
الجديدة غيروا طريقة العد إلى العد الزوجي و غيروا الألوان كمان
دي العدادات الجديدة


و دي العدادات القديمة الجميلة جدا في رأيي


الكونسول في الجديدة عملى أكتر و علبة التخزين الوسطى ( ما بين الكرسي الأمامي و الخلفي أكبر في المساحة )
و كمان فيها أمتداد خلفي علشان الناس اللي قاعدة ورا تقدر تضع كانز مثلا ( علبة مياه غازية صفيح )


كان فيه جراب نظارة أعلى كرسي السائق ............ شالوه

الشكل العام الخارجي للعربية أتغير من الأمام تغيير بسيط
أنا شايف ان القديمة أحلى من الأمام ( الفوانيس و الشبكة الأمامية )



تم اضافة سبويلر خلفي لكل موديلات 2009 و 2010 بدون أستثناء
هو شكلا جميل و طبعا له أهمية في الثبات على السرعات العالية و لكن المنطقة دي بيبقى صعب تنظيفها شوية مقارنة بالعربية اللي مكنش فيها السبويلر .

تم اضافة ميزة أخرى للسي دي
و هو خاصية قراءة الأسطوانات اللي فيها أغاني بأمتداد أم بي ثري MP3

نقلوا مكان أزرار التحكم في الزجاج الكهرباء في كرسي السواق بدل من كونسول السيارة الأوسط . ( و كمان خامة تصنيع الأزرار أفضل خصوصا زرار تحريك المريا )


مفيش فروق تانية ما بين العربتين غير الحاجات اللي قلتلكم عليا

يبقى تجميعة و تلخيص للفروق الجوهرية
الموتور أنعم و أستحابته أفضل على السرعات الصغيرة ) و الكامبرو القديم أستجابته أفضل لو أنت ماشي على سرعى عالية قوي معدي مثلا 150 )
العفشة أنعم .
مستوى التقفيل مش مختلف و هو جيد جدا من رأيي .


طبعا مش هاعدد المميزات الأخرى للعربية علشان كلنا عارفينهم ( الثبات و الكماليات و السعر ) بدون تفاصيل .

الحمد لله رب العالمين القديمة مظهرش فيها أي عيب و الجديدة مريحاني على الأخر و كله تمام .
اللهم بارك فيما أعطيت و رزقت ......... و أحفظنا من الحسد و الحاسدين و أسترنا من شر الطريق .

الف مبروك يا كبير :)

الموديلين فيهم مميزات و عيوب في رأيي