الموضوع: مؤشر الحرارة وصل للاخر

تعمل اية لو ماشي وبتبص فجأة علي عداد الحرارة لقيتة علي الشرطة الحمراء ؟

دة اللي حصل معايا بالظبط النهاردة وطبعا وقفت وبطلت الموتور ونزلت اجري وسحبت في ايدي الطفاية من تحت الكرسي بالرغم من انة مفيش دخان ولا حاجة مولعة بس هو القلق اني لما هفتح الكبوت هلاقي اكيد كارثة

فتحت الكبوت وببص علي الحوض لقيت الهواء السخن طالع كأنة من فرن وبفتح غطاء القربة بشويش وبالراحة خالص عشان ميضربش لقيت انة معملش حتي صوت فوران المية جواها

شيلت الغطاء و كانت المفاجأة انة مفيش في القربة ولا نقطة مياة ... روحت جيبت ازازة مياة ودورت العربية والحرارة برضو عالية وفضلت ازود مياة لغاية لما خلصت الزجاجة كلها وروحت جيبت زجاجة تانية وبرضو خلصتها وجيبت واحدة كمان واخدت نصها بس وكل دة المراوح شغالة علي السرعة التانية

طبعا طلعت اجري علي المنطقة الصناعية وكانت الحرارة نزلت شوية وهناك لما تم الكشف علي العربية اتضح انة الريداتير مخروم وعمال يسرب مياة وكمان غطاء القربة ضرب من السخونة وبقي مفوت وبيلف علي الفاضي وتم سد الخرم بعجينة كدة او مش عارف مادة غريبة كدة والراجل قالي لو منفعش اللحام ابقي اشتري ريداتير تاني و طبعا اشتريت غطاء قربة اصغر من بتاعي ب 25 جنية وتم تركيبة و زودت مياة والحرارة رجعت لطبيعتها تاني

دلوقتي بقي انا عاوز اعرف هل وش السلندر ممكن يكون اتأثر او حصلة حاجة من عدم وجود مياة ؟ وازاي اتأكد انة فعلا الوش باظ عشان الميكانيكية كل واحد بيفتي علي مزاجة ؟

السلام عليكم يا جماعة انا لسة راجع من برة كان عندي مشوار بعد الصلاة و الحمد لله الحرارة في وضعها الطبيعي بس لما فتحت القربة قبل لما ادور الموتور كانت ناقصة حوالي نصف سنتيمتر وطول المشوار كانت السرعة التانية للمراوح هي اللي شغالة

اللحام بالظبط كان عبارة عن ان الراجل جاب سائل كدة في ازازة صغيرة و رش نقطتين علي الجزء الي بيسرب في الريداتير وثني حتة من الماسورة علي الجزء وجاب لمبة لحام زي بتاعت السمكري وفضل علي الجزء دة لغاية لما حسيت انة الريداتير هيسيح من السخونة وبعد كدة جاب عجينة او خامة مش عارفها وحطها علي الماسورة المخرومة وسابها حوال 15 دقيقة .... دة بالظبط اللي حصل

بعد كدة اشتريت غطاء للقربة ولما سألت علي اللي زي بتاعي كل الناس قالت اشتري بتاع الاوبل احسن من دة وفعلا دورت علية لغاية لما لقيتة اصلي عشان كان في صيني ب 10 جنية

الريداتير بتاعي خامتة الومنيوم وطبعا لحام نحاس فية مينفعش لانة هيسيح الريداتير ولما سالت الراجل علي لحامة برضو بالومنيوم قالي برضو مينفعش لانة هيبوظ الدنيا من السخونة بتاعة اللمبة وفعلا قالي الاحسن تشتري واحد تاني انا سالت علية لقيتة ب 225 جنية جديد زيرو و ب 250 جنية استيراد بس حالة الاستيراد مش مضمونة اوي

العريية كان فيها مية خضراء من حوالي شهرين ولا يمكن تكون هي اللي خرمت الريداتير لانة المفروض انها تحافظ علية من الاملاح اللي في المياة العادية وانا ناوي فعلا احط مياة خضراء تاني بس لما الامور تستقر ةنشوف اللحام دة هينفع ولا لأ

انا لسة مبصيتش علي الزيت واذا كان عمل زي الطحينة ولا لا وكمان مخدتش بالي اذا كان في نقط زيت علي المياة بس المراوح دلوقتي شغالة علي السرعة التانية مش عارف لية

بجد شكرا لكل اللي رد عليا انا هنزل مشوار بالليل واجرب تاني وربنا يستر انا خايف علي الوش يكون حصلة حاجة لانها مش هتبان دلوقتي و ممكن اكون مسافر ويعمل حاجة مني في الطريق