عاوز اخد رايكم قدامي ابيزا 94 علي 15 الف بس فيها لحام شاسية

السلام عليكم اولا

انا معنديش خبرة في العربيات وعاوز عربية اتعلم عليها سواقة ويدوب استخدمها مشاوير بسيطة

قدامي عربية ابيزا 94 بتاعت الشركة اللي انا واحد من اصحابها وهي عربية كانت تستخدم في التوزيع يعني بتلف زي تاكسي في القاهرة وهي معانا بقالها سنة

قررنا نبيعها لان الابيزا عاوزة دلع شوية مش بتاعت شغل وهلك لان كانت كل كام يوم بحوار وتصليح مرة سخونة ومرة عفشة وكدا .. احنا كنا صرفنا عليها تصليح حوالي 1500 مرة و 3000 مرة وتلتميات وربعميات علي فترات

العربية دي فيها لحام في فردة الشاسية بتاعها وانا عارف طبعا ان دا يقلل من تمنها بس هيا بتجري كويس يعني بتجيب علي الدائري 100 و 120

لكل الظروف السابقة ولاننا عارفين اننا حنخسر فيها فزمايلي اقترحو اني اشتريها ليا وازبطها وشريكي قالي خدها حتي ب 15 الف ويوم ما حتصرف تصرفلك 3 ولا 4 وتبقي لما تروح لحد فينا يبقي مخسرناش زي ما تروح لتاجر او لحد غريب

انا باخد رايكم 15 الف في ابيزا 94 وعربية ماشية يعني كل يوم بتطلع شغل حوالي 150 كيلو مش بايظة وواقفة هل دا يعتبر رقم معقول

سؤال تاني العربية دا كانت بيتحطلها بنزين 80 هل فيه طريقة انضف الموتور لاني ححطلها ان شاء الله طبعا 92 بعد كدا لان ال 80 اكيد مش حلو ليها

هيا عيوبها الحالية محتاجة سمكرة في باب ومحتاجة رش للكبوت وبتسخن فبنشغلها المروحة علي طول دايركت وتحس ان الدركسيون تقيل كانة عاوز يتزيت وطبعا تزبيط للصالون من جوة وللتابلوة لان الصالون تعبان اوي وممكن تغير فردتين كاوتش

اية رايكم علما بان العربية كاوتش عريض وبجنوط لونها زيتي

شكرا وانتظر الاراء

بص ياباشا لو العربيه ناوي تجيبها تفضل معاك ومش ناوي تبيع لاي سبب من الاسباب خدها فسعرها كويس وتتلم ب 4 او 5 الاف جنيه كتظبيط سمكره ورش وصالوان وكلام فاضي وبسيط تمام بالنسبه لانك لو هتاخدها وممكن لاي سبب من الاسباب ممكن تبيع يعني ظروف اضطراريه ممكن تخليك تبيع او انك تغير لعربيه تانيه فاعرف انك هتكون رميت فلوسك علي الارض وهتخسر اكتر من ال 15 الاف كمان عشان الابيزا تقيله جدا في سوقها في مصر لان مش كل الناس بتقدرها فاعاده بيعها تقيله حبيتين فمبالك لو كانت مشيسه فمش هتتباع اساسا ولو اتباعت هتكون لحالتين اولا لواحد مغفل يلبسها منك وانت تكون غير امين معاه وده هيكون حراام ولايفضل عشان ربنا يباركلك في فلوسها ياما لتاجر وهيبقي عارف اللي فيها وهياخدها منك برخص التراب عشان برضه يلمها اي حاجه ويلبسها برضه لحد تاني او ملوش خبره .... اما بالنسبه لتغير البنزين فده عادي هتفك التانك وتنضفه عادي جداا وتبدأ تحط 90 او 92 زي ماتحب وكمان هتحتاج اكيد تغير طلمبه البنزين عشان زمانها اتهلكت من ال 80 وممكن سخونيه العربيه برضه الكتيره تكون ادت الي وش سلندر مثلا لقدر الله فنصيحتي ليك ولك حريه الاختيار بس لو مكانك مسترخسش سعرها واخدها لابلاش تاخدها لان هتكون انت الخسران وهما الكسبانين

اقتباس:

---

المشاركة الأصلية كتبت بواسطة meero_boy2000

بص ياباشا لو العربيه ناوي تجيبها تفضل معاك ومش ناوي تبيع لاي سبب من الاسباب خدها فسعرها كويس وتتلم ب 4 او 5 الاف جنيه كتظبيط سمكره ورش وصالوان وكلام فاضي وبسيط تمام بالنسبه لانك لو هتاخدها وممكن لاي سبب من الاسباب ممكن تبيع يعني ظروف اضطراريه ممكن تخليك تبيع او انك تغير لعربيه تانيه فاعرف انك هتكون رميت فلوسك علي الارض وهتخسر اكتر من ال 15 الاف كمان عشان الابيزا تقيله جدا في سوقها في مصر لان مش كل الناس بتقدرها فاعاده بيعها تقيله حبيتين فمبالك لو كانت مشيسه فمش هتتباع اساسا ولو اتباعت هتكون لحالتين اولا لواحد مغفل يلبسها منك وانت تكون غير امين معاه وده هيكون حراام ولايفضل عشان ربنا يباركلك في فلوسها ياما لتاجر وهيبقي عارف اللي فيها وهياخدها منك برخص التراب عشان برضه يلمها اي حاجه ويلبسها برضه لحد تاني او ملوش خبره .... اما بالنسبه لتغير البنزين فده عادي هتفك التانك وتنضفه عادي جداا وتبدأ تحط 90 او 92 زي ماتحب وكمان هتحتاج اكيد تغير طلمبه البنزين عشان زمانها اتهلكت من ال 80 وممكن سخونيه العربيه برضه الكتيره تكون ادت الي وش سلندر مثلا لقدر الله فنصيحتي ليك ولك حريه الاختيار بس لو مكانك مسترخسش سعرها واخدها لابلاش تاخدها لان هتكون انت الخسران وهما الكسبانين

---

نسيت اعلق علي حاجه انا كان معايا عربيه سيات 133 زمان موديل 81 كنت بجيب بيها 130 عادي جداا وبن خالتي معاه ابيزا جبنا بيها 180 علي طريق مصر اسكندريه عادي برضه جدا وواحد صاحبي معاه فيرنا قفلنا بيها العداد برضه عادي جداا قصدي اقول لحضرتك ان الجري مش مقياس ووريت لحضرتك نماذج مختلفه يعني مش شرط :M_yes[1]:

لو مش حتغيرها قريب خدها

بس غالبا حتحتاج مكنة جديدة بعد فترة بسيطة

خدها واتكل على الله
بس متزبطهاش على الاورجنال يعنى لا ظبطها على قد مهى محتاجه بس
انت لسه بتقول هتتعلم عليها وهتعمل بيها مشاوير بسيطه يبقى فعلا دى بالنسبالك فرصه مش وحشه
وبعد اما تلاقى نفسك بقيت فى السواقه كويس هتلاقى نفسك زهقت منها وعاوز تغير للاحسن فلو صرفت عليها كتير هتخسر كتير
انت اصرف على قد اللى انت محتاجه بس ومتفتحلهاش
ومباركه عليك العربيه الجديده(ولا نقول القديمه)

انا رأيي بلاش العربيه مشمومه و ال15000 ممكن تجيبلك واحده 128 زي الفل و تركب و تتعلم و زي مانت عاوز و بعد كده حتعرف تبيع لانك لابد في يوم من الايام حتبيع فمبتبقاش اتعلمت بكتيييير
و ربنا يوفقك

و ليه تاخدها انت ؟؟ انا لا اشكك فى نزاهة اصحاب او شركاء حضرتك بس انا شايف ان الجواب على سؤالك فى اول سطر كتبته انك ما بتعرفش فى العربيات !!! انا كانت معايا ايبيزا و عارفها و عارف عفشتها خفيفه جدا !! و لحام فى الشاسيه يعنى مصيبه و انت بتجرى لا قدر الله لو اللحام اتفك .. انا شغال فى شركة بترول و لما بنحب نلحم حاجه ماتفكش ابدا بنجيب لحامين اجانب و معاهم رخص معتمده و مفتشين بيطلعوا شهاده للحام ده .. يا ترى انهى اسطه هو اللى لحمها او اقول لك انا عطاها مجرد بنطتين تلاته لان اى لحام يستخصر يمشى باللحام على شرخ و اسهل له يبنط يعنى ينقط .. خللى بالك و كده خطر لك و لاى حد راكب معاك

اقتباس:

---

المشاركة الأصلية كتبت بواسطة mexmarine

و ليه تاخدها انت ؟؟ انا لا اشكك فى نزاهة اصحاب او شركاء حضرتك بس انا شايف ان الجواب على سؤالك فى اول سطر كتبته انك ما بتعرفش فى العربيات !!! انا كانت معايا ايبيزا و عارفها و عارف عفشتها خفيفه جدا !! و لحام فى الشاسيه يعنى مصيبه و انت بتجرى لا قدر الله لو اللحام اتفك .. انا شغال فى شركة بترول و لما بنحب نلحم حاجه ماتفكش ابدا بنجيب لحامين اجانب و معاهم رخص معتمده و مفتشين بيطلعوا شهاده للحام ده .. يا ترى انهى اسطه هو اللى لحمها او اقول لك انا عطاها مجرد بنطتين تلاته لان اى لحام يستخصر يمشى باللحام على شرخ و اسهل له يبنط يعنى ينقط .. خللى بالك و كده خطر لك و لاى حد راكب معاك

---

اخدها انا لان شركائي الاتنين واحد حيتجوز بكرة والتاني كمان شهرين فظروفهم مش سامحة .. انا ححاول اكشف علي اللحام واشوف منة خطورة وهل ليه تاثير علي سير العربية ولالا .. علي فكرة هوه حضرتك في شركة ايه :)