صوت طقة مش عارف منين

**msaleh2031** · 09-10-2010 12:57 PM

عندى صنى سوبر صالون 2006 ماشية 60000 كم بسمع صوت طقة قدام من تحت ومش بتيجى فى المطبات غيرت البطاحات و4 قواعد موتور و2 مقص امامى وبارات دركسيون وبرضه الطقة لسه موجودة مش عارف اعمل ايه روحت التوكيل مرتين واكتر من ميكانيكى بس بيفهموا محدش عرف يلاقيها. حد عنده حل وربنا يجازيه خير

**Bishoy.Girgis** · 09-10-2010 02:00 PM

حضرتك بتقول انك مش بتسمع صوت الطقة في المطبات .. طيب حضرتك بتسمعها امتي لما العربية بتكون ماشية ولا هي واقفة .. طيب لو هي ماشية بتسمعها علي سرعة رينج كام انما لو هي واقفة و بتسمع الصوت ده يبقي حضرتك دا الزيت و بيرجع مكانه تاني و العفشة بتريح يعني مفيش مشكلة
هنستني رد حضرتك و اي خدمة

**egypt0777** · 09-10-2010 02:02 PM

حضرتك غير العفشة كلها مش ناقص غير علبة الدريكسيون

ان راى انساها خالص

**Ahmed.TV** · 09-10-2010 02:11 PM

اولا ايه كل ده اللى حضرتك غيرته , ده كتير اوىىىىىىىى , ده منهم لله اللى قالوا لحضرتك كل ده وخالوك غيرته

حضرتك موصفتش بالظبط ممكن يكون الصوت عبارة عن ايه
بس لو صوت تزيق خفيف وانت واقف على مطلع او منزل او فى تراب وبتلف الدريكسيون ده بيكون صوت العفشة وهى بتريح

اما لو صوت جى من قدام وناحية العجل مع طقة وونة وبتبان وانت ماشى على السرعات ممكن يكون البلى عاوز يتغير

فياريت تقولنا اى احساس من دول بيوصلك
لان حرام انت غيرت حاجات كتير مكنش مفروض تغيرها دلوقتى ابدا

واى مركز خدمة حضرتك روحته ومعرفش يشخصلك الموضوع وقالولك ايه

وباذن الله تتحل امورك على خير
وطمنا عليك

**egypt0777** · 09-10-2010 05:30 PM

انا مش خبير فى الاوتوا بس ممكن تكون فى حاجة فى الفتيس

عموما مش حنسبق هل حضرتك كشفت على علبة الدريكسيون

**maged george** · 10-10-2010 12:24 AM

معلش انا ليا تصور كده انه ممكن يكون في الكوبلن الداخلي مش الخارجي يعني الصلايب وده حصل مع واحد صاحبي بس في اسبيرانزا وبيبان الصوت قوي في نخعة العربية لقدام او وراء ومالوش دعوة بالمطبات وابقى طمنا كده ايه الاخبار وان شاء الله سليمة.