الموضوع: نداء الى ملاك الدايو بالله عليكم ساعدونى

الزرار اللي حضرتك تقصده اسمه ذراع سحب الهواء

اقصى اليمين يعني اعاده توزيع الهواء داخل السياره , وبيتم استخدام النظام ده في الطرق الترابيه او لتجنب الدخان في الطرق او اي ملوثات اخرى , وللحصول على اداء اسرع في التبريد او التدفئه , تقدر تقول انك بتقفل دايره الهواء وبتخلي نفس الهواء البارد موجود جوا العربيه

اقصى الشمال يعني نظام الهواء الخارجي , والنظام ده بيسمح بسحب الهواء من الكابينه وادخال هواء جديد (الهواء الخارجي) ليحل محله , وفي النظام ده بتكون كفاءه وسرعة التبريد اقل

الزرار ده ملهوش اي علاقه بحراره العربيه

زي ما قولت لحضرتك الفكره كلها انك بتحدد اسلوب التبريد ما بين هواء متجدد , وبين دائره هواء مغلقه

لكن اللي حصل ده ربما يكون بسبب حاجه تانيه حصلت بالصدفه , في نفس الوقت اللي جربت فيه استخدام ذراع سحب الهواء

حضرتك جرب الحوار تاني وتابع اداء مراوح التبريد في الكبوت مع تشغيل التكييف , وتأكد من منسوب مياه التبريد وكل شئ

وعلى فكره الوضع المناسب لشوارعنا الجميله هو وضع دائره الهواء المغلقه


ومعلش هستأذن حضرتك لو تقدر تحمل المانيوال بتاع اللانوس لانه فيه باب كامل عن نظام التبريد , من خلاله هتعرف افضل وضع يناسب احتياجاتك

انا برضة شايف ان لف المفتاح ملوش علاقة بسخونة العربية بس تفسير زيادة الهواء البارد لما لفيت المفتاح انك فتحت ممرات دخول الهواء الخارجى مع دفع موتور المراوح . و تحلليلى انك حسيت بالبرودة اكتر ان 90% السربنتينة الداخلية عاوزة تتنضف بدليل لما فتحت الهواء الخارجى و سرعة العربية الهوا دخل و زود الدفع للهوا مع المروحةالداخلية

فى حاجة فى دماغى لو انت عملتها ممكن يكون ليها علاقة بالسخونة . انت لفيت المفتاح اللى علية علامات البارد و الساخن و جبتة ناحية الاحمر و رجعتة تانى ؟؟ لان ممكن تكون سربنتينة المياة الساخنة كانت شبة فارغة او فارغة و لما لفيت المفتاح سحب ميية من العربية لملو السربنتينة و بالتالى الميية نقصت بشكل عام فى العربية و ادى للسخونة . دا احتمال . عموما برضة بص على الميية فى القربة و اتاكد انها مظبوطة مش ناقصة و لو طلعت ناقصة يبقى تحليلى ممكن يكون صح . و الله اعلم