الموضوع: الاستخدام الامثل للفتيس الاتوماتيك

متابع باهتمام

مع ان فى موضوعات كتير فى القسم مثبتة على كيفية استخدام الفتيس الاتوماتيك , بس حجاوبك

اولا لازم تشيل من دماغك الخوف انك كنت بتسوق مانيول ومرة واحدة لقيت قدامك فتيس اتوماتيك
الحياة بسيطة جدا , وجدا كمان

لما تيجى تركن العربية , وقبل ما تعشق على الp ارفع فرامل اليد وبعد كدا انقل على الp وده عشان متحملش على التروس وانت واقف وخصوصا كمان لو راكن على مطلع او منزل

لما تكون طالع على كوبرى والكوبرى بطئ او واقف , ممكن تطلع على الغيار اللى مكتوب عليه 2 او 1 , عشان يعطى قوة للسيارة وميكنش فى حمل عليها , وانا بعمل كدا بس فى المطالع اللى المطلع فيها عالى ومائل جامد ,

ولما تكون فى اشارة ممكن تفضل على الd عادى وانا بفضل واقف عادى بيه ولو طولت شوية ممكن تجيبها على الn ولو طولت اوىىى اكتر من 10 دقايق عشق العربية على الp وبطل العربية , لان الوضع اكيد حيكون ممل

وبخصوص الصيانة مفيش فى اى حاجة غير تغير زيت فتيس كل 40 الف كيلو بس , ومهم الانتظام على تغير زيت الفتيس , ويكون ف مكان محترم

وتحت امرك يا فندم

المشاركة الأصلية كتبت بواسطة just_meroo

انا شاكر لشرحك جدا بس افهم من كلام حضرتك ان النقله من ال n الى ال d بتكون من غير ما ادوس على الزرار الفضى الكبير؟؟ وكنت عاوز اعرف ينفع انقل من ال 1 الى ال2 الى الd والعربيه ماشيه وياترى هكون محتاج ادوس على الزرار الفضى ولا لا ؟؟ انا كنت قريت من فتره استخدام الزرار الفضى فى موضوع لكن مش فاكر بالظبط فين لانه كان من فتره كبيره .. واسف على الاسئله الكتيره.

اوعى تنقل من غير ما تدوس على الزرار الفضى اللى فى الفتيس , اى نقلة وتحرك للفتيس لازم تدوس على الزرار ده

وبخصوص انك تنقل من الL الى 2 ثم الى d والعربية ماشية , ممكن عادى وبردوا لازم تكون دايس على الزرار الفضى , وبعدين قولنا الL و2 دول عشان المطالع القوية والمنازل فقط

وممكن تحرق بالغيار Lو2 بيهم فى السرعات لماتيجي تشد مع واحد بالعربيه فبيكون كالاتى :

بتقفل الاوفر درايف وبعد كدا بتجيب العصايه علي L لغايه ما تجيب اخر الار بي ام ,و بعد كده تنقل علي 2و تجيب اخره بردوا ,و بعد كده تفك الاوفر درايف و تنقل علي D

وزى قولتلك فى المطالع والمنازل تانى تسخدم الغيارات ال1 و2 وتحرك الفتيس بالزرار اللى فى الجنب الفضى وبعد كدا تنقل على الd وكل ده وانت ماشى

المشكلة اللى لازم تاخد بالك منها ان اوعى تنقل على r وانت ماشى , اوعى لان ده غلط طبعا او وانت على ال r تنقل على الd من غير ما تكون العربية واقفة وبتدوس فرامل

ملحوظة : لو عايز تنقل من الd الى ال2 وانت ماشى على الاقل السرعة تكون 40 مش تنزل مثلا على 80 او 100 عشان غلط

وايضا لو عايز تنقل على الL هو يستحسن وانت واقف , ولو حكم الامر وانت ماشى يبقا يادوبك والعربية بتتحرك بسيط

نيجى بق الى زرار shift lock

عشان موضوع المفتاح اللى مش بيخرج من الكونتكت لو قفلت العربية وجبت العربية على الn
الزرار ده بقا بيحلها
بمعنى :
بعد لما تبطل العربية وتخرج المفتاح وهي علي ال p دوس علي الزرار shift ده ودوس على زرار الفضى للفتيس وحرك الفتيس علي ال n هتلاقيه بيتحرك معاك
لان من غير انك تدوس على زرار الشفت ده الفتيس مش حيتحرك الى الn
فده فايدة الزرار , انه بيحرك الفتيس بعد ما بتشيل المفتاح الى الn عشان لو راكن فى مكان وعايز تاخد المفتاح وتسيب العربية ممورة
او راكن فى مطلع وعايز العربية تكون مركونة بتمويرة مع فرامل اليد عشان ميكنش فى حمل على التروس

ملحوظة اخيرة ومهمة جدا

فى حالة لو حنركن قبل ما ننقل الى p لازم نشد الهاند بريك او فرامل اليد , عشان نرمى حمل العربية كله على الخلف و بعد كدة اعمل الفتيس على ال P لكن لو عملت الفتيس الاول على الP الحمل كله بيكون على قدام وعلى تروس الفتيس الاوتوماتيك وكمان بتكون متحملة على الكبالن وده غلط طبعا

وبكدا نكون غطينا كل الاسئلة الهامة
وتحت امركم فى اى استفسار اخر
وتقبلوا تحياتى