الشغل اللى عملته فى العربية النهاردة

**cayman69300** · 10-10-2010 02:23 AM

اولا : على الريق كدة حوالى الساعة 10.30 ص روحت رايح للسمكرى علشان استلم العربية
و استلمتها و كان حسابة 150 جنية على الشغل التالى ( ظيط وش العربية اللى هى الشبكة و الفوانيس & فك الباب الخلف اليمين علشان المنفصلة بتاعتة كانت مكسورة & استعدال حبطة صغيرة فى الشنطة من ورا & استعدال حبطتين فى الرفارف من قدام & تظبيط فواصل الرفارف الامامية و الكبود )
ثانيا : بعد كدة روحت رايح لبتاع الدوكو ( عم سيد الرخيص ) عايز يا عم سيد اروش الاكصدامين و المع العربية كلها من غير ما اودى العربية الفرن - المهم من هنا و هنا اتفقنا على انة هياخد 100 جنية مصنعية ايدة و كتبلى شوية لوازم ( هههههههههههه فى الرخيص لانى معنديش استعداد افتح اوى فى العربية ) و اخدت الورق و روحت اجيب اللوازم بتاعة العربية و الحمد لله جبتها بـ 80 جنية
ثالثا : و انا فى الطريق قلت بالمرة اركب سير الكتينة اللى انا جبتة من عند الشيماء بتاع التوفيقية و فعلا ركبتة و اطمنت على بلية الكتينة و بلية شداد الدينامو
رابعا : روحت طالع علاى الكهربائى و سالتة المروحة البطيئة بتبدا تشتغل على حرارة 95 بالرغم من انها المفروض تشتغل على حرارة 90 بس - الاسطى الكبير مكنش موجود و كان اخوة و هو بصراحة بسم الله ما شاء الله علية حمااااااااااااااااار حصاوى . راح قالى يمكن ترموستات الحرارة الكهربا بايظة و دى تعمل 230 جنية
قاتلة طب يمكن عليها وساخة و المفروض تتصنفر . راح قالى لا . طب ممكن يكون صباع الحرارة بيقرى الحرارة غلط ( بصراحة يمكن فعلا يكون كدة لان دة اللى حصل مع اسلام البنا فى العربية بتاعته ) قالى لا برضوا . فى الاخر قالى ممكن يكون الردياتير فية مشكلة . انا رديت و قالتلة صعب لان الردياتير جديد و الحاجة التانية العربية مبتنقص مية و الحاجة التالتة و العربية سخنة بتبقى الخراطيم مضغوطة على الاخر و فى حالة وجود اى تسريب فى العربية خراطيم المية هتبقى طرية مش مضغوطة
المهم علشان بس متعبش قلبى روحت قايلة على السرعة الرابعة بتاعة مروحة التكيف و راح فاتح الكبود و داس على المقاومة و السرعة الرابعة اشتغلت زى الفل و هو قالى يوم الاتنين انا هجيب مقاومة بالفيشة بتاعتها هبقى اركبها و تنسى انها ممكن تفصل تانى
خامسا : روحت رايح للسروجى علشان اقفل الصالون لان الفبرة اللى جنب كرسى السواق واقعة و الراجل مشكورا طلب منى اروحلة يوم الاتنين
سادسا : روحت رايح لبتاع الشكمان لان الشكمان محمل على العربية و طلع ان العلاقة اللى فى النص الكاوتش مقطوعه و راح مركبها - و كمان لقى العلبة الخلفية التكرير اللى جواها وقع و قالى ممكن نفرغ العلبة و انا قاتلة اغير العلبة بالمرة فى الشتا و خصوصا انى لقيت علبة الشكمان بـ 170 جنية فبصراحة استحرمت و قالت العلبة تبوظ خالص و ابقى اغيرها
سابعا : روحت رايح لبتاع الزوايا . رصصت عجلتين قدام و ظبطت زوايا و اخيرا خلصت على الساعة 6.30 م و مكنتش شايف من كتر المشاوير
تكاليف النهاردة
سمكرى
150 مصنعية + 30 بقشيش
ميكانيكى
20 جنية مصنعية + 5 جنية بقشيش
لوازم الدوكو
79 جنية + 5 بقشيش لان الولاد تعبوا اوى لحد ما جابو نفس لون العربية
شكمان
15 جنية تمن العلاقتين + 5 جنية بقشيش
الزوايا و الترصيص
35 جنية مصنعية + 5 بقشيش
الاجمالى
349 جنية و بكرة الصبح ان شاء الله هودى العربية لرش الاكصدامات و يحلها المولى
تمت

**thug** · 10-10-2010 02:41 AM

عديت علي كل دول يا دوك ومارضتش تفتح اوى ههههههههههههههه
عموما الله ينور علي الصيانه الدوريه دي وطمنا يا دوكتور
ولو أحتجت حاجه من بورسعيد احنا في الخدمه برده ;)

**cayman69300** · 10-10-2010 03:04 AM

المشاركة الأصلية كتبت بواسطة thug

عديت علي كل دول يا دوك ومارضتش تفتح اوى ههههههههههههههه
عموما الله ينور علي الصيانه الدوريه دي وطمنا يا دوكتور
ولو أحتجت حاجه من بورسعيد احنا في الخدمه برده ;)

يخليكم ليا
بس انا عندى وجة نظر
ممكن الواحد ياكل الاكل بتاعه فى اى من دول
طبق الومنيوم
طبق زنك
طبق بلاستيك
او طبق صينى و حوالية الشوكة و السكينة و يعيش حياتة
دى وجهة نظرى
اركب عربية رايقة و اقعد احنتف فيها على اد ما اقدر بس ابقى مبسوط
يعنى فى الكلام اللى انا كتبتة و لا يهم ان الشكمان ساقط شوية و لا يهم ان وش العربية فاتح سنتين و لا يهم ان خلوص الرفارف مش زى بعض
على اية الواحد لما يعيش يعيش صح
مش ادينا عايشين و السلام
مش كدة و لا اية رايك

**lancerevolution** · 10-10-2010 07:06 AM

أمال لو ناوى تفتح كنت عملت إيه بقى
بالنسبة لعلبة الشكمان انا مغيرها ب 85 جنية عند واحد عندنا

**mexmarine** · 10-10-2010 07:13 AM

هو ده الكلام الصح و مبروك الصيانه و التظبيط يا دكتور

**ashrafnoby** · 10-10-2010 09:29 AM

مبروك الصيانه و التظبيط يا دكتور ويارب تكون العربيه حلوه وتمام

**kar!m** · 10-10-2010 09:39 AM

ميه ميه يا دكتور .. كل ما تصرف على العربيه .. كل ما تريحك أكتر.
يا راجل ده انا لما بغسل العربية بحس انها فاقت كده و سحبها اتحسن

**mifs** · 10-10-2010 02:41 PM

100 /100 يا دكتور والله ينور على حضرتك وربنا يباركلك فيها
بس اللي انا مستغربله مصنعية الميكانيكي 20 جنيه !!!! مقابل تغيير سير الكاتينة
انا مغيره عندنا مع طرمبة الماية ب 120 جنيه بالعافية

**cayman69300** · 10-10-2010 04:08 PM

المشاركة الأصلية كتبت بواسطة mifs

100 /100 يا دكتور والله ينور على حضرتك وربنا يباركلك فيها
بس اللي انا مستغربله مصنعية الميكانيكي 20 جنيه !!!! مقابل تغيير سير الكاتينة
انا مغيره عندنا مع طرمبة الماية ب 120 جنيه بالعافية

يا سيدى هى جت فى مصنعية سير الكتينة
متبقاش من كله
كفاية علينا الاشتغالات اللى عندنا هنا
هقولك على اقتراح ابقى تعالى صييف عندنا ههههههههههههه

**thug** · 10-10-2010 04:25 PM

المشاركة الأصلية كتبت بواسطة kareemz

ميه ميه يا دكتور .. كل ما تصرف على العربيه .. كل ما تريحك أكتر.
يا راجل ده انا لما بغسل العربية بحس انها فاقت كده و سحبها اتحسن

اه والله ماتعرفش كل ماجي أغسل العربيه جوه وبره ومتور وعفشه بحس أن العربيه أتحسنت والموتور بقه صوته هادي مع السحب
ولو حاطت برافين بقه عالتابلوه بتحس أنك راكب E clsass

الموضوع: الشغل اللى عملته فى العربية النهاردة

LinkBack

أدوات الموضوع

عرض

الشغل اللى عملته فى العربية النهاردة - انشر الموضوع فى :

-

-

-

-

-

-

-

المواضيع المتشابهه

سايس الجراج اللى قدام الشغل بهدلى العربية بمسمار عشان مركنش !!!!!!!!

اللى عملته صح ولا غلط

الشغل اللى عملته فى العربية النهاردة

مين راح الشغل النهاردة؟؟ (مساحة للفضفضة)

تصدقوا إن الشغل طلع قافل النهاردة

الكلمات الدلالية لهذا الموضوع

المفضلات

المفضلات

ضوابط المشاركة