شهادة حق في تكنو وان وشكرا كريم منير

بسم الله الرجمن الرحيم

الموضوع اللى بعمله ده هو شهادة حق لوجه الله في مركز تكنو وان ومديره مهندس احمد الشحات ..
الحكاية بدات في رمضان لما مراتي عملت حادث جامد شويتين بعربيتها الشيفرولية سبارك
الحقيقة انا مفكرتش كتير ويدوبك بس كلمت أ/كريم منير علشان استشيره ...
مش عايز اطول عليكم كتير بس من ساعة ما كلمته وهو تبنى الموضوع وتبنى العربية وتبناني شخصيا ...
وكان بيروح يشوف العربية اكتر منى انا شخصيا ....
وبدون الخوض في تفاصيل كتيرة اوى ومكالمات كتيرة اوى مع أ/ كريم منير علشان كان في حاجة معينة عطلتنا شوية في بدء السمكرة في العربية بس المهم انى استلمتها النهارده والحمد لله ....
العربية ولله الحمد والشكر رجعت بفضل الله وبفضل مركز تكنو وان وبفضل المهندس الهمام ذى الضمير اليقظ احمد الشحات افضل من الاول ...
وعايز اقول حاجة مهمة جدا المهندس احمد لما شاف العربية قالى حتتكلف تقريبا 10000 جنية او اكتر ومع شراء ربع كامل مكناش عاملين حسابه يعني حتتكلف حوالى 13000 ... المفاجئة ان بعد الانتهاء من العربية مهندس احمد قالى سعر اقل كمان من اللى قال عليه ودي اول مرة اشوفها ، طول عمر الواحد لما سمكرى بيقوله ان العربية حتتكلف مبلغ لازم بعد الانتهاء يطلع اعلى مش اقل ، علشان كده انا بقول ان مهندس احمد راجل راضي برزقه الحلال بدون طمع ولا جشع وده اصبح امرا نادرا في هذا الزمان ....
بالنسبة لاستاذ كريم منير فهو بعد كل هذه الاتصالات اللى دوشت دماغة بيها اصر انه يكون جانبي وانا باستلم العربية وبرضو المركز حملوا حساب ساعة الحساب ... ا/ كريم كان معاه بنته الأمورة كنزي وانا كان معايا ابني مروان ( كنت حطلب اديها بس يا خسارة طلعت في اولى ابتدائي ومروان في kg ))
أ/ كريم .... انت جدع اوى اوى واسم على مسمى اشكرك من كل قلبي يا ابو عبد الرحمن
م/ احمد الشحات ... انت مكسبك كله بأذن الله حلال في حلال ربنا يزيدك بالحلال ...

اخيرا انا عارف ان العربية السبارك ماتخصكوش بس انا بعتبركوا زي اخواتي وعيلتي وحبيت احكلكوا على الموضوع
ونفس النص حعمل به موضوع في قسم شيفرولية

بسم الله الحمد لله
( سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ )

اللهم بارك فى مركز تكنو وان واغنيه بالحلال
والف مبروك على العربية وربنا يكفينا شر الحوادث

اشكرك ياباشا على اشتراكك في الموضوع
وربنا يكفينا ويكفيك شر الحوادث

استاذ احمد
الاول حمد الله على سلامه العربية وبصراحة تكنو وان مابيخيبوش ظني في شغلهم وخاصة مهندس احمد الشحات
فيه تفاصيل كتير جدا بيوفر فيها للعميل وكانه قلبه عليه مش مجرد عميل هايخد منه فلوس ويمشي
يعني بصراحة حركة الاكصدام مع القطعية وانه يبقي ب 350 بدل 650 عجبتني جدا
ماهو اللي ب 650 ده تايواني
وال 350 ده اصلي مستعمل
حركة الكشاف اللي بعت جابه من التوكيل في ابو رواش من غير مكسب عشلن يخلص شغله ونزله في الفاتورة بتاعتك بنفس تمنه بالظبط بعد ما شفنا الفواتير

انت راجل ابن حلال وفلوسك حلال وربنا اراد يخلف عليك في مصيبتك تكون كفارة لذنوبك وفي نفس الوقت ماتبقاش معيوبة
خاصة ان القطعية فعلا هي اللي وصلت المبلغ لل 9 الالاف
وكان ممكن تخلص اقل من كدة الفين ولا حاجة بس بسبب حتت كارتيرة دفعت تمن قطعية كاملة
ربنا يعوض عليك
ربنا يباركلك في مروان ويجعله ذرية صالحة و والله احنا نتشرف بيه وبابوة
وانا ماعملتش اي حاجة غير حاجة غير واجبي ناحيتكم
ويا رب ماتزورش تكنو وان غير في الصيانات بس بعد كدة

ربنا يبارك فيكم جميعا ويجعل حبنا لكم وحبكم لنا في الله

وصدق النبي الكريم صلى الله عليه وسلم حين قال:

((إِنَّ الْمُؤْمِنَ لِلْمُؤْمِنِ كَالْبُنْيَانِ يَشُدُّ بَعْضُهُ بَعْضًا وَشَبَّكَ أَصَابِعَهُ))