الموضوع: كيف تختار دراجتك وتحكم عليها ..( للمبتدئين )

السلام عليكم ورحمة الله ...

الموضوع انا شايف انه من أهم المواضيع اللى دايما بيسأل عنه كل واحد عايز يشترى دراجة نارية ومش عنده معلومات كفاية عن الأنواع وأماكن البيع وازاى يحكم على حالة الدراجة اللى هيشتريها وخصوصا ان قلة الضمير بل عدم الضمير منتشر جدا وللأسف فحبيت ان افيد نفسى وكل اخواننا اللى فى المنتدى ويكون موضوع يوضح بنسبة كبيرة لكل المبتدئين
ازاى ميضحكش عليهم حد وربنا يجعله فى ميزان حساناتى وكل الاخوة من وحوش المنتدى اللى يفيدونا فى الموضع ده
وياريت كل اللى عنده معلومة يشارك ...
اولا : نوع الموتوسيكل .. 1- الجودة : متوفرة فى الماركات العالمية وخصوصا اليابانى (ياماها _ سوزوكى _ كوازاكى _ هوندا )
2- قطع الغيار : الهوندا تكسب .. ده بالنسبة فى مصر
3- الشكل : كاستم(ستيد ,شادو) _ ريس( cbr , r1 (_ تريل اوجبلى )

ثانيا : الحالة العامة .. 1- الموتور : هل حل ( اتعمله عمرة ) قبل كده ولا لأ هل صوته طبيعى او ناعم ولا خشن ومش مستقر فى دوارنه وهل بيعرق يعنى من عند الشكمان بيطلع بخار ميه او نقط لو بيعرق يبقى كويس وهل المكنة بتسحب كويس ولا بطيئة فى السحب والتسارع
2- الفيبر : هل الفيبر سليم و ومش راشش قبل كده او متصنع أو اصلى بس اترش قبل كده
3- الشاسية : هل مستقيم ولا فيه عوج يعنى المكنة بتحدف ولا ماشية مستقيمة
وهل فيه لحامات يعنى اتكسر فى حاجة اتلحمت ولا ايه
4- الكاوتشات .. ممسوحة او مشققة أصلية ولا تقليد
5- درجة الحرارة : هل المكنة بتسخن جامد ولا حرارتها طبيعية المروحة بتشتغل مع الثرموستات ولا الثرموستات بيفتح متأخر ..
التانك .. هل فى صدأ ولا نضيف لأنه ممكن يسد الكربراتير
6- العدادات(الــ أر بى ام والسرعة والحرارة ) ولمبات البيان ( الزيت والضوء العالى والمور والاشارات ) هل شغالين كويس ولا فى حاجة فيهم مش شغالة ))

يعنى دي شوية معلومات عرفتها بفضل الله فى خلال 3 شهور من ركوبى للريس ياريت اللى عنده معلومات اكتر يفيدنا
ولو فى خطأ ينبه عليه ,,,

الله ينور عليك

نصيحتي بقه...
قبل ما تشتري البايك...اشتري الخوذة والجوانتي..دي اقل حاجة
الحاجات اللي بتحمي بجد مش رخيصة ..
لو ما قدرتش تشتريهم...يبقى استنى وما تشتريش البايك دلوقتي الا لما يتوفر فلوس الحمايات..

ده رايي..