لو عاوز تفتح صيدلية..كلاكيت تاني مرة

**A7MED_PHARMA** · 02-12-2010 12:42 AM

السلام عليكم

إتسألت تاني من عضو من الأعضاء الأفاضل جدا في المنتدى عن مشروع الصيدلية
أقول تاني

بسم الله...
المشروع تجاري بحت ..يعني برغم إن المفروض إن الصيدلية تكون مملوكة لصيدلي
إلا إن الموضوع ممكن إدارته بواسطة أي شخص..مهما كانت درجة تعليمه

أنا مش هتكلم عن قوانين وشروط الترخيص..
أنا هتكلم عن المشروع نفسه
أولا: المكان

لازم المكان يكون مناسب لصيدلية .. يعني يكون ملاصق لعيادات أطباء..أو لمستشفى .. أو لتجمع سكني كبير
ده شئ أساسي
وتكون على ناصية شارع ظاهرة .. وواضحة للمارة

ثانيا: الفرشة

فرشة الصيدلية الأفضل إنها تكون من مخزن أدوية موثوق فيه..وبفواتير معتمدة ومختومة
علشان خصومات المخازن ..أفضل بكتير من الشركات
والفرشة المفروض إنها تكون نقدي ..أفضل ليك
أحسن ماتبدأ مديون..وإوعى تقع في فخ إن تفرش بالآجل من الشركات
شركات كتير بتقدم عروض فرش الصيدلية .. بتسهيلات في السداد
لكن ده فخ كبير .. علشان الخصومات بتكون أقل مايكون

ثالثا:الصيدلي

علشان الصيدلية لازم تكون مملوكة لصيدلي (قانونا)..ويكون لها مدير صيدلي(قانونا)
يبقا لو إنت مش صيدلي وعاوز ترخص صيدلية
هتشوف صيدلي معرفة .. وتتفق معاه إنك تاخد إسمه تفتح بيه الصيدلية
على إن إنك تاخد عليه شيك على بياض .. علشان كل حاجة هتبقا بإسمه رسميا
علشان مايجيش يقولك بعدين .. مالكش حاجة عندي
حتى لو أخوك......وإسأل مجرب(أنا)
وصاحب الصيدلة غير المدير
المدير ممكن يكون الصاحب ..أو لأ
المدير لازم يكون غير حكومي ..أو واخد أجازة من الحكومة
وغالبا المدير بتاع الصيدلية ..بيكون بنت
علشان بنات صيادلة كتير بيكبروا دماغهم عن الشغل .. ويقعدوا في البيت وياخدوت راتب من أي صيدلية يسجلوا فيها مدير

رابعا: الأجور

أجر الصيدلي إلي هيسجل صاحب مابين ( 250-300) جنيه شهريا
وأجر المدير للصيدلية مابين (600-750) جنيه شهريا
ساعة الصيدلي بــ ( 50-100)يمكن أكتر ..لكن مش أقل
والمدير غير ملزم بالحضور .. إلا لو هيحضر ..يبقا ساعتها هياخد أجر إضافي ويتحسب بالساعة

خامسا: الأمان
لو إنت مش صيدلي وعاوز تفتح صيدلية
وعلشان في أول الموضوع مش هتكون فاهم الليلة ماشية إزاي
يبقا الأفضل تجيب باركود..وتسجل كل الأدوية
وتاخد بالك من الصيدلي إلي هيشتغل في صيدليتك
صيادلة كتير بيلجأوا للكسب الغير المشروع عن طريق بيع أدوية غير مسجلة ((أدوية الجدول المهربة))
وعلشان مكسبها خرافي..كتير بيطمع فيها

وتاخد بالك
الصيدلي لو حب يعمل من وراك سبوبة من غير مانت تعرف
ممكن يجيب دوا لحسابه..ومايدخلوش على البار كوود..ويبيعه لحسابه الخاص
يعني تفح عينك كويس أوي..وتحط عينك في وسط رأسك

سادسا: نواقص السوق

طبيعي جدا نواقص السوق مش هتكون موجودة إلا في الشركات..مش في المخازن
والشركات بتعمل كوتة((عدد محدود)) على كل طلبية كبيرة
يعني علشان تجيب علبتين أنسولين مدعم..لازم تعمل عليهم طلبية كبيرة
ولو عاوز صنف ناقص من السوق .. لازم تعمل طلبية كبيرة ..علشان الشركة تديلك واحدة أو إتنين

أصناف الصيف .. خزن منها في الشتا
والعكس
أصناف الصيف..سحبها في الشتا ضعيف .. وبالتالي خصمها بيكون أعلى
والعكس صحيح

..
والله المستعان
أي أسئلة

**solyahmed** · 02-12-2010 01:07 AM

معلومات قيمه بس سؤال صغير لما انا حجيب صيدلي اسجل باسمه وادفعلوا 300 جنيه في الشهر ومايشتغلش واجيب مدير ادفعلوا 750 ومايشتغلش واجيب صيدلي بالساعه ادفعلوا 1000 او 1500 جنيه وادفع ضرايب وكهربا تجاري انا بقى حكسب ايه ؟؟ يعني المكسب المتوقع كام ؟؟ 25% من تمن الدواء ولا اكتر وايه موضوع حرق الادويه ده هل ده بفواتير ؟؟ يعني لو صرفت ديكور وتمن ادويه 100 الف جنيه مكسبك المتوقع كام شهريا علشان تقدر نحدد راس مالك حيرجع في كام سنه . وبعدين بشوف صيدلات بتبيع ادويه مستورده من السعوديه وامريكا هو ده قانوني ولا ناس بيجبوا الادويه دي ويبيعوها للصيدلايات وعادي ممكن الصيدلايات تبعها ؟

**نور القمر** · 02-12-2010 01:08 AM

يعني لو صيدلي هايسجل صاحب ومدير وهايقف شيفت كمان مثلا 10 ساعات
راتبه هيكون مثلا
300+600+اجره في الساعة(600)=1500
مظبوط كدة؟

**ahmed2y** · 02-12-2010 10:40 AM

شكرا يا دكتور على المعلومات وكمان على معنى كلمة كوتة لانى سمعتها كتير فى الانتخابات ومكنتش عارف معناها

**أحمد كمال** · 02-12-2010 12:24 PM

المشاركة الأصلية كتبت بواسطة ahmed2y

شكرا يا دكتور على المعلومات وكمان على معنى كلمة كوتة لانى سمعتها كتير فى الانتخابات ومكنتش عارف معناها

كوتة دي مش كلمة عربي اصلا .... كوتة = quota يعني "حصة"

**A7MED_PHARMA** · 02-12-2010 05:11 PM

المشاركة الأصلية كتبت بواسطة solyelissa

معلومات قيمه بس سؤال صغير لما انا حجيب صيدلي اسجل باسمه وادفعلوا 300 جنيه في الشهر ومايشتغلش واجيب مدير ادفعلوا 750 ومايشتغلش واجيب صيدلي بالساعه ادفعلوا 1000 او 1500 جنيه وادفع ضرايب وكهربا تجاري انا بقى حكسب ايه ؟؟ يعني المكسب المتوقع كام ؟؟ 25% من تمن الدواء ولا اكتر وايه موضوع حرق الادويه ده هل ده بفواتير ؟؟ يعني لو صرفت ديكور وتمن ادويه 100 الف جنيه مكسبك المتوقع كام شهريا علشان تقدر نحدد راس مالك حيرجع في كام سنه . وبعدين بشوف صيدلات بتبيع ادويه مستورده من السعوديه وامريكا هو ده قانوني ولا ناس بيجبوا الادويه دي ويبيعوها للصيدلايات وعادي ممكن الصيدلايات تبعها ؟

ممكن تلاقي أدوية خصوماتها 15%..وممكن تلاقي أديوة خصوماتها 40%
السرنجات مكسبها أكتر من 60% .. الفياجرات مكسبها أكتر من 65%
منتجات شركة بيور كلها(صبغة أو يود أو ماء أكسجين أو فزلين وخلافه) ..مكسبها حوالي 50%
وأديوية ممكن تكون خصمها 5%
يعني المتوسط بيكون 25 %..وأشياء أخرى
..........................................
أنا مثلا مبيعاتي 900 جنيه في اليوم
بيخرجلي منهم مكسب صافي 225 جنيه في اليوم
يعني6750 تقريبا في الشهر
بخلاف الايجار ..والتأمينات ,, والكهربا التجاري .. والتليفون التجاري .. والهوالك والتوالف .. والضرايب
ورواتب العمال ..يدوبك بيفضل الي يكفيني
ولو أنا مش صيدلي ..كان إتخرب بيتي
........................................
الأدوية المستوردة دي..طريقة جديدة من الصيادلة لتحسين دخلهم
أديك شايف المصاريف عاملة إزاي
هيا مش قانونية .. لكن مش حرام
وأديك شايف سلسلة العزبي .. بتعمل إلي هيا عاوزاه وتبيع أي دوا حتى لو مش متسجل في السوق المصري
والدنيا زبادي في الخلاط

المشاركة الأصلية كتبت بواسطة نور القمر

يعني لو صيدلي هايسجل صاحب ومدير وهايقف شيفت كمان مثلا 10 ساعات
راتبه هيكون مثلا
300+600+اجره في الساعة(600)=1500
مظبوط كدة؟

تمام كده
الصاحب غير المدير غير الصيدلي الي هيشتغل
يعني كل واحد له راتب .. ولو عاوزاهم كلهم يبقوا شخص واحد ..يبقا ياخد الرواتب دي منفصلة

المشاركة الأصلية كتبت بواسطة ahmed2y

شكرا يا دكتور على المعلومات وكمان على معنى كلمة كوتة لانى سمعتها كتير فى الانتخابات ومكنتش عارف معناها

المشاركة الأصلية كتبت بواسطة أحمد كمال

كوتة دي مش كلمة عربي اصلا .... كوتة = quota يعني "حصة"

أحمد بيه جاب المفيد

كوتة يعني حصة

**A7MED_PHARMA** · 02-12-2010 07:44 PM

بالنسبة لموضوع حرق الأدوية
أنا عاوز أوضح النقطة دي ,,,علشان محدش يلتبس عليه الأمر

كمدوب شغال في شركة .. مطلوب منه يوزع(مثلا) 1000 علبة كيتوفان على الصيدليات ..على إن الخصم إلي هيبيع بيه للصيدلية يكون 25 %
والمندوب لما يوزع الكمية دي .. هياخد منها 5 % مكسب(مثلا)
يعني دلوقتي الشركة هتبيع الكيتوفان ده على خصم 25%+ 5% للمندوب

متابعني لحد كده
ساعتها المندوب علشان يوفر وجع دماغه .. واللف على الصيدليات .. ويبيعهم في أقل وقت
بيروح لمخزن أدوية
وبدل ماالمندوب ياخد 5% مكسب .. بياخد 2% بس
والــ 3 % الزيادة بيضيفهم على خصم الدوا ..بدل مايبقا 25% .. يبقا 28 %
يعني بدل ماالمندوب يبيع للصيدلية على 25 % .. بيبع كل الكمية إلي معاه للمخزن على 28 %
المخزن يبيعها للصيدلي على 27%.ويكسب هوا 1%

دي عملية حرق الدوا
يعني المندوب بيبيع للمخزن..على حساب ربحه هوا
لكن طبعا المندوب لما يبيع أكتر
الشركة هتديله مكافأت .. يعني الكل كسبان من كل ناحية
الشركة باعت أكتر
والمندوب عمل سبوبة
والمخزن عمل سبوبة
والصيدلي أخد الدوا بخصم أحسن

الموضوع: لو عاوز تفتح صيدلية..كلاكيت تاني مرة

LinkBack

أدوات الموضوع

عرض

لو عاوز تفتح صيدلية..كلاكيت تاني مرة - انشر الموضوع فى :

-

-

-

-

المواضيع المتشابهه

كلاكيت الموتور تاني مرة

لو عاوز تفتح صيدلية؟؟؟

كلاكيت تاني مره

كلاكيت تاني مرة

كلاكيت تاني مره

الكلمات الدلالية لهذا الموضوع

المفضلات

المفضلات

ضوابط المشاركة