هام للى مسافر بكرة الصبح أو دلوقتى

**lancerevolution** · 02-12-2010 01:09 AM

الدنيا شبورة جدا على الطرق الزراعية الرؤية ممكن تقول 50 متر بالعافية
محدش يعمل حسابه إنه هيجرى و يا ريت الى يعرف يأجل سفره يأجل
و الصبح أكيد هتبقى أسواء من كدا
الى مضطر يسافر يا ريت يبدر شوية و يمشى براحة

**yahiahelaly** · 02-12-2010 01:38 AM

يعني حضرتك مش مثل زي امبارح ولا اكتر يا ريت الرد بسرعه عشان بروح الشغل بدري

**dodo2000** · 02-12-2010 01:44 AM

انا رايح القاهرة بكرة ان شاء الله مواصلات هى الشبورة بتبقى للساعة كام

**M.Osman** · 02-12-2010 01:45 AM

انا امبارح راجع من القاهرة للمنصورة مشي داخل السحاب

الصورة دي اول امبارح :

**osama.m** · 02-12-2010 02:00 AM

الصحراوي النهادة الصبح كان مقفول .. و الشبورة عالية جدا على معظم الطرق ربنا يسترها علينا

**ainshouka** · 02-12-2010 02:19 PM

دى المرة التانية اللى امشى فيها فى شبورة بهذا السوء

المرة الاولى كان معايا اخويا وهو بيطلع راسه من شباك وانا من شباك واحنا الاتنين ماسكين الدركسيون مع بعض

المرة التانية كانت الساعة 1:30 بعد منتصف الليل (ليلة الخميس) بس المرة دى كنت لوحدى

فعلا كانك ماشى وسط السحاب ووقفونا كتير عند اخر وصلة المريوطية اللى بتتفرع بعد كده عشان تمسك اسكندرية الصحراوى او الزراعى وكانوا مانعيين الناس تاخد الصحراوى والمرور موقف كل العربيات

اول موقفنا مكنش فيه شبورة الا على خفيف لكن لما وقفنا كتير حسينا كأننا جوه فيلم رعب وابتدا الغمام الابيض يكتر من كل ناحية

ومشينا بعد كده وكملت على اسكندرية الزراعى كان فيه حتت بعتمد فيها على عواميد النور عشان اعرف السكة ماشية طوالى ولا الطريق بيلف

وحتت تانية الدنيا كانت ضلمة كحل فشغلت gps عشان ابقى عارف الطريق اللى انا ماشى فيه منين بيودى على فين وبيلف امتى عشان ملاقيش نفسى لبست فى خرسانة

قبل مسيب الزراعى كانت فيه عربية من بتوع المرور كانت واخدة المقدمة وكلنا كنا ماشيين وراها ومانعة اى حد يعديها

المشكلة اللى قابلتنى هى انى اعرف فين مطلع الكوبرى اللى بينزلى على قويسنا من الزراعى ودى الحمد لله كنت حلبس فى الخرسانة بتاعته وش عشان لقيته ظهر امامى علطول برغم انى كنت ماشى بطئ جدا

اكبر مشكلة قابلتها فعلا من بعد شبين عشان اروح منوف

طريق رايح جاى وحواليه زراعات كتير ومظلم فى حتت كتير وملفاته كتير ودا كان اعتمادى الاساسى على الموبايل

والحمد لله عدت الى ديار الوطن سالما غانما

**Amro_ON** · 02-12-2010 04:18 PM

هي الشبوره بتنزل الساعه كام على اسكندريه الزراعي؟

أصل انا ناوي ان شاء الله اسافر لبنها الساعه 9 بليل عشان الزحمه وكده

**ihabchina** · 02-12-2010 04:57 PM

الف شكر على المعلومة

**KHALED AYMAN** · 02-12-2010 05:10 PM

اول يوم فى الشبوره ...
رجعت من المصنوره للمحله فى حوالى ساعه و ربع !!
مع ان الطبيعى تلت ساعه ..او نص ساعه لو مش بجرى يعنى
الطريق كان معدوم الرؤيه و عواميد الاناره مطفيه
كنت ماشى انا و كروز و كليو و شارك ...محدش شايف حاجه خاااااااالص ماشيين نحدف على بعض ...بمعنى ..لو انا اكتشفت انى هطلع على الرصيف ...اقوم حادف يمين ..يقوم هو كمان حادف يمين ,,وهكذا
انا فجاه لقيت العربيه بتطلع لفوق !!!
اكتشفت انى طلعت كوبرى