الموضوع: LED Speedometer, work log

الحلوة اتكلمت

كنت ناسي سلك واصل بين الأي سي الأولى و الثانية و الشك في الأي سي رقم 2 كلفني أني اشتريت واحدة تانية و ركبتها مكان القديمة اللي من حسرتي افتكرتها اتحرقت. ما علينا

دلوقتي فاضل حاجتين أساسيتين
1- تركيب السنسور مع واير السرعة و المعايرة
2- تركيب العداد في مكانه

[YOUTUBE]http://www.youtube.com/watch?v=UuR9ERaUgi0[/YOUTUBE]

===============================
===============================

الواير حركته على السرعات البطيئة بالذات مش منتظمة و أنا جربت الدايرة على طرف واير السرعة لكن لاحظ أنه كان مائل على الموتور (السنسور). عموماً أنا في دماغي النهاردة أنزل أشوف هاركب الموتور ازاي في ترس السرعة بتاع الفتيس دايركت من غير الواير اللي بيرعش ده

[YOUTUBE]http://www.youtube.com/watch?v=tL6b0ad3udc[/YOUTUBE]

أسيب لكم الفيديو ده على ما أرجع لكم. نازل دلوقتي مشوار و هاشوف أركب السنسور ازاي في الفتيس

[YOUTUBE]http://www.youtube.com/watch?v=fhxCAZezDpU[/YOUTUBE]

رجعت

أولا: أنا مش مجنون، أنا في دماغي حاجة و هاعملها

أيوة رفعت الموتور (موتور العربية مش البرينتر) و نزلت الفتيس




كنت متوقع أن الموضوع هيكون مجرد بنطة لحام عند بتاع الشكمانات. رحت له الصبح و خدته على جنب و الموضوع كذا كذا. نزلت معاه تحت و بصيت على الفتيس و شرحت له الوضع، قال لي أجيب الميكانيكي الأول. رحت للميكانيكي (على بعد 10 متر) و شرحت الموضوع برضه راح من غير ما يبص قال لي "الفتيس هيتحل!!!!"
بصراحة الراجل بيتكلم صح لأن الشغل لازم يكون مظبوط و فك الفتيس و (البيبة) و هي اللي بتاخد حركة من ترس في عمود الفتيس و تنقلها برة لواير السرعة سابقاً



بص للسنسور بتاعي و بص للعمود بتاع البيبة، راح باعت صبي جاب له فتيس تاني و خلع البيبة بتاعته و ركب العمود بتاع دي مكان بتاعتي. البيبة بتاعتي كان تجويفها مربع، بينما الثانية كان تجويفها مسطح زي المفك العادة و دي أسهل في الشغل و أقوى و أعرض



نقل على السنسور بتاعي و راح مشغل الصاروخ و قعد يبرد في الترس بتاعه عشان يبات داخل البيبة. بات.
بعدين عمل شق عمودي من فوق الترس، و راح جايب حتة صفيح و تانيها و مظبطها بحيث تدخل من ناحية في البيبة و من الناحية التانية في السنسور. جميل



ناقص إيه؟ نوسطن السنسور و نثبته في الفتيس
رحت لمخرطة و عمل خرم 4مم في الفتيس و جبت مسمار معدي في السنسور و خرم الفتيس و رحت قافله بصامولة
و جربت الحركة بإيدي من داخل الفتيس، لفيت الترس لقيته بيلف بسلاسة و حلو جداً و السنسور استحمل كل اللي اتعمل فيه و لسه بيطلع كهرباء

طبعاً مع كل مرة الميكانيكي يشغل الصاروخ، و الخراط يشغل المثقاب. أقول السنسور مش هيشتغل تاني مع كمية الحرارة اللي اتولدت دي أو هيقفش بالرايش اللي دخل فيه و طلعته بعد عناء

حالياً العربية بايتة عند الميكانيكي لأني اتأخرت عليه على ما رجعت من المخرطة
و نكمل بكرة و هااااااااانت جداً

و شكراً مقدماً للميكانيكي اللي شغل مخه و قبل الشغلانة و عايز يعملها صح و بدون ذرة لحام

===========================================
===========================================

الغرض من تنزيل الفتيس:
1- تغيير عمود البيبة من المربع إلى المسطح
2- عمل خرم في جسم الفتيس لتثبيت السنسور

هو أنا مالحقتش أصور لكم البيبة دي عاملة ازاي لما طلعوها برة، هي عبارة عن عامود معدني بالداخل بأحد طرفيه يوصل الواير للخارج و طرفه الداخلي عليه ترس مائل بياخد حركته من عمود الفتيس اللي رايح لعامود الكردان
عامود البيبة محاط بجسم أسطواني فايبر مش معدني و بيتحكم في مكانه بمسمار من الخارج (واضح في الصورة)


بعد كده لو احتجت أخلع/أغير السنسور أو حتى أرجع أركب واير عادي مش هاحتاج تنزيل فتيس ولا مكنة تاني. كله شغل مسامير اخلع و ركب و الميزة أنه مافيش ولا لحام. و السنسور ده أو غيره ينفع مستقبلاً لعداد seven segment و لو هاعمل عداد كيلومتر odometer كمان عادي و أبقى ريحت نفسي من السنسور و حواراته

دي صورة بعد التركيب من تحت العربية. واضح السنسور متثبت في الفتيس بمسمار و صامولة من نقطة واحدة و ده كفاية. بعدين أنا ملأت الفراغات بينه و بين الفتيس بلحام Epoxy لزيادة التثبيت و العزل كمان




ده فيديو قبل المعايرة

[YOUTUBE]http://www.youtube.com/watch?v=doJEW_z5DtU[/YOUTUBE]

اتضح عيب مهم جداً في الإشارة اللي طالعة من السنسور تخليه ينفع لعجلة ببدالات مش عربية :(
واضح أن الإشارة على سرعة أكبر من 50 تقريباً بتكون سريعة جداً أو ضعيفة جداً للدرجة اللي بتخللي الـ LM2917 تترجمها غلط و تبقى الزيادة في فرق الجهد الخارج منها مش متناسبة مع السرعة.



يعني الموضوع باظ ولا إيه؟؟؟؟ رجعت بالأفوميتر أشوف شكل الإشارة اللي طالعة من السنسور إيه ممكن نطلع بحاجة جديدة. لقيت خاصية تانية ممكن تستغل كويس و هي أن الموتور لما يلف بيشتغل كمولد و بيطلع كهرباء AC وجدت أنها متناسبة بشكل خطي و بانتظام مع سرعة العربية. طيب إيه العته اللي كنت فيه ده؟ ما هو انت عندك voltage متناسب مع السرعة إيه اللي يخليك تعمل دايرة frequency to voltage؟ و لقيت أنه على الرابع و على RPM 4500 فرق الجهد تقريباً 28 فولت. جريت بمعنى كلمة جريت على ال datasheet بتاع ال LM3914 أشوف أقصى فرق جهد تتحمله كإشارة لقيته 35فولت

رحت موصل الإشارة بمقاومة متغيرة 47Kohm و منها على PINs no 5 بتاعة ال LM3914 و جرب يا عمنا.


دي الدائرة بعد التعديل على صورة newhansol
على فكرة أول LED بينور مع الكونتاكت على طول، أنا ما وصلتوش



عايرته على الطريق باستخدام GPS الموبايل بحيث لما السرعة على الموبايل 90 ظبطت العداد عندي على 100

و عملت لكم فيديو قصير و فيديو طويل. و العداد شغال مع المارشدير كمان

DONE!!!

[YOUTUBE]http://www.youtube.com/watch?v=wAUQjoejmOM[/YOUTUBE]

بالنسبة للتكلفة سؤال مهم طبعاً

مكونات الدائرة :
55 جنيه

ميكانيكي: فك و تركيب الموتور و الفتيس
100 جنيه

مخرطة:
5 جنيه


السنسور:
موتور برينتر ink jet قديمة

طبعاً غير الوقت و المجهود و شوية رفايع كده

موضوع فك الموتور و الفتيس ده يشفع له عدة حاجات منها أني مش محتاج أكرره، و الخرم اللي اتعمل ده ساهم في التثبيت بشكل ممتاز، و بعد كده ممكن أركب أي سنسور غير ده (يتعمل له قاعدة و يركب بنفس المسمار) + أني ممكن في أي وقت أرجع أشتغل بواير

امال لو شوفت الشغل التقيل بقى فى الSeven Segment
على فكره انا لاقيته منزل الموضوع ده فى منتدى اليكترونيات اجنبى مش فاكر اسمه بصراحه و حتى كتبتله تعليق هناك مش فاكر قرا ولا لاء

بس السؤال دلوقتى ... انتا عامل الدايره بتعت السيفن سجمنت واليدات فى دايرتين منفصلتين ؟؟؟ لأن لو كده يبقى حتقرفك فى المعايره لأنك حتبقى بتعاير عدادين مع بعض
او تعاير واحد فيهم على سرعة العربيه و التانى تعايره على الاولانى