للى عاوز مرسيدس, خلى بالك من العربية دى

السلام عليكم و رحمة الله و بركاته

انا كنت من مدة بدور على عربية مرسيدس معدل:whtauwant: موديل فوق ال1980 و من ضمن الأماكن اللى دورت فيها , موقع كونتكت كارز و بالفعل لقيت واحدة مرسيدس معدل مو1981 و كانت مرفوعة -على حسب كلام اللى عارضها للبيع- 25 سنة و كان طالب فيها 65000 جنيه و هو برضه اللى قايل أن العداد بتاعها عامل 288000 كم ( 288 ألف كم ) , مش 28800 كم ( 28,8 ألف كم ).

المهم بعت أستفسر منه على الموضوع ده بالايميل ده :




السلام عليكم



العربية دى مرفوعة 25 سنة , يعنى بقالها 4 سنين بس بتجرى عالطريق



و العربية عاملة 288000 كم و لا 28800 كم , لأن العربية اللى بقالها 4 سنين بس بتجرى عالطريق , ممكن تعمل 28800كم بس , لكن 288000كم فى 4 سنين بس , كتير أوى, يعنى بمعدل حوالى ال75000كم فى السنة , يعنى حوالى 200كم فى اليوم , يعنى تقريبا العربية كانت بتسافر من المنصورة الى القاهرة كل يوم رايح جاى !!!!!! هى العربية كانت ملاكى بيتى و لا كانت بتشتغل مشاوير ؟؟؟؟



هل الرقم 288000كم فعلا و لا 28800كم فقط ؟؟؟؟؟



شكرا و جزاكم الله كل خير

رد على هو و قال :

ماشاء الله حضرتك مرفوع عنك الحجاب العربية فعلا كانت بتشتغل اجرة بين القاهرة والمنصورة وانا السواق عليها هو حضرتك ركبت معايا قبل كده !!!؟؟؟؟
انت الوحيد اللى كشفت سر العربية
السيارة ليست للبيع


طاب أنا كده غلطان فى حاجة؟؟؟؟

عالعموم , رغم أن العربيات دى مابقتش مطلوبة أوى زى زمان, بس ياريت اللى بيدور على مرسيدس معدلة , يبعد عنها لأن الكلام كده شكله مش ماشى مع بعضه .

مازيراتى كواتروبورتيه

تحيه ليك يارايس علي حسابك الجامد ده

ههههههههه والله ليه حق مايبيعلك العربيه
ده انت جبت قراره

احنا فعلا كان عندنا عربيات فى الشركة بتسافر كل يوم القاهرة - الاسكنرية - الصعيد و تلاقيها موديل سنتين فاتو و عامله 200 الف كيلو و لا حاجه.

اقتباس:

---

المشاركة الأصلية كتبت بواسطة kareemz

احنا فعلا كان عندنا عربيات فى الشركة بتسافر كل يوم القاهرة - الاسكنرية - الصعيد و تلاقيها موديل سنتين فاتو و عامله 200 الف كيلو و لا حاجه.

---

السلام عليكم و رحمة الله و بركاته

أيييييييييييييييييييييييي ييييوه .

شوفت حضرتك قولت ايه؟؟؟

العربية موديل سنتين تلاتة فاتوا , مش موديل 29 سنة فاتوا .

و بعدين هل تعتقد أن عربية عملت 200000 كم فى سنتين زى دى تعتبر عربية لقطة عند البيع .

و كمان , هو فيه حد بيعمل كده , بيروح يجيب عربية مرسيدس أيام ما كانت المرسيدس المعدلة هى أحسن عربية تتركب, عشان يشغلها مشاويير و العربية تعمل 300000 كم فى 4 سنين ؟؟؟؟؟؟؟؟؟!!!!!!!!!!!!!.

و كمان هو صاحب العربية المرسيدس ده , ال 4 سنين اللى العربية مشيت فيهم , كان عشان تعمل مشاوير .

كلام غير منطقى خالص .

اللى حارق دمى , أنه غلطان و غشاش و غالبا كداب و كمان بجح:fdsa: .

مازيراتى كواتروبورتيه

حضرتك استاذ ----والعربية دى عدادها قالب دى ماشية اكتر من مليون كيلو لانها بتسافر200/30 يساوى 6000كيلو فى 12تساوى72000فى السنة فى 28سنة تساوى2016000(2مليون و16000كيلو) يبقى عندنا احتمال من اتنين اوا ان العداد ملعوب فية او ان العربية ماشية فعلى 2288000كم او3288000كم

اقتباس:

---

المشاركة الأصلية كتبت بواسطة mmmmgogommmm

حضرتك استاذ ----والعربية دى عدادها قالب دى ماشية اكتر من مليون كيلو لانها بتسافر200/30 يساوى 6000كيلو فى 12تساوى72000فى السنة فى 28سنة تساوى2016000(2مليون و16000كيلو) يبقى عندنا احتمال من اتنين اوا ان العداد ملعوب فية او ان العربية ماشية فعلى 2288000كم او3288000كم

---

السلام عليكم و رحمة الله و بركاته

ياااااااااااااااااااااااه .

دا أنت طلعت معلم و الله.

فعلا , العداد بيبقى ست خانات بس و ممكن العربية دى فعلا تكون عاملة أكتر من مليون ولا اتنين و فوقهم ال288000 كم .

و الله أنت أستاد و رئيس قسم .

ماجاتش فى دماغى دى .

مازيراتى كواتروبورتيه

دا الواحد المفروض يعمل ساحر وهو بيشتري مستعمل بقى
مفيش اي مصداقيه الا ما رحم ربي

عماار يا مصر

اول حاجة مينفعشى تبقى عاملة العدد دا من الكيلومترات ويطلب فيها السعر يعنى غالبا هتبقى المسالة مسالة غلط وهو بيكتب العدد دا زود صفر تانى حاجة يا سيدى الفاضل من الواضح جدا من خلال الرد بتاعه ان هو بيهزر اول حاجة انه جاب المدن اللى انت ذكرتها فى الاميل اللى بتسال فيه وحطها هيا هيا فى جوابه وبيقولك انك مرفوع عن حضرتك الحجاب من ضمن الهزار تالت حاجة انه قال ان العربية مش للبيع ودا عشان بيحسب حضرتك كمان بتهزر معاه من خلال سؤالك ليه

اقتباس:

---

المشاركة الأصلية كتبت بواسطة vedodido

اول حاجة مينفعشى تبقى عاملة العدد دا من الكيلومترات ويطلب فيها السعر يعنى غالبا هتبقى المسالة مسالة غلط وهو بيكتب العدد دا زود صفر تانى حاجة يا سيدى الفاضل من الواضح جدا من خلال الرد بتاعه ان هو بيهزر اول حاجة انه جاب المدن اللى انت ذكرتها فى الاميل اللى بتسال فيه وحطها هيا هيا فى جوابه وبيقولك انك مرفوع عن حضرتك الحجاب من ضمن الهزار تالت حاجة انه قال ان العربية مش للبيع ودا عشان بيحسب حضرتك كمان بتهزر معاه من خلال سؤالك ليه

---

السلام عليكم و رحمة الله و بركاته

بالنسبة للعداد , أنا سألته ادا كان العداد 28800كم و لا 288000 كم , هو ماكالفش خاطره و قال ايه الصح فيهم .

بالنسبة لأن العربيات المرسيدس بتشتغل مشاوير , فده معروف جدا لأن العربية مريحة جدا فى السفر و سعرها مش غالى و صيانتها سهلة , أنا لما كنت آجى أسافر من المنصورة للمطار , كنت بركب مع واحد بيوصلنى للمطار و بياخد 170 جنيه و ده لو شوفته و أنت ماتعرفهوش شخصيا , راجل عاااااااااااااادى جدا و محترم و راكب عربية مرسيدس معدلة كحلى شيك جدا و لا يخطر فى بالك أن العربية دى شغالة مشاوير و الراجل ده -ربنا يديله الصحة- كل يوم بعربيته فى مصر و عنده عربيتين تانيين مرسيدس معدلة, بيشغلهم لحسابه و كله تمام و هو محافظ على العربيات بتاعته لأنها مصدر رزقه و لو راح وقف بعربية منهم فى السوق, ماحدش هيعرف أن العربية دى كانت بتطلع مشاوير, لأ و كمان هيلاقوا الرخصة باسمه , يعنى عربيته هتتباع هوا , لأنهم هيتأكدوا أنه مش تاجر .

الحاجة التانية أن أنا ماعرفش ادا كان هو بيهزر و لا بيتكلم جد , بس اللى أنا متأكد منه أنى أنا مش بهزر لأنى أنا بالفعل بقالى أكتر من 6 شهور بدور على مرسيدس معدلة 200 نظيفة و العربية دى أنا أول ماشوفت اعلانها و قريت كلمة أنها مرفوعة 25 سنة قبل ما أقرأ الكيلومترات باعتها , قلت خلااااااااااااااااص , أنا لقيت اللى أنا عايزه , لحد مالقيت أنه قايل أنها عاملة فى 4 سنين بس , 288000 كم !!!!!! , قلت فى بالى, يا بن الكTEEEEEEEEEEEEEEEET , لأنه بالفعل انسان بيتلاعب بالناس , هو عارف كويس أن أى عربية مرسيدس 200 زى دى يتعلن عنها فى أى مكان و صاحبها يقول عليها أنها كانت مرفوعة 25 سنة , هيلاقى مليون واحد يكلموه , بينما هو فى الأول و الآخر انسان غشاش و ده واضح من كلامه اللى هو قاله مش اللى أنا قولته.

ده أنا من جديتى فى البحث عن عربية , بلغ بى الأمر أنى مستعد أجيب 230 مش 200 و أغيرلها الموتور , بس تكون نظيفة , للأسف , تلاقى ناس كتيرة عاملة اعلان أو تلاقى تجار و وسطاء , يكلمونى يقولولى , طلبك عندنا و العربية نظيفة و بيتى و مش متهانة و أول يد كمان و كلام قرع كتير من ده و أروح و أحيانا كنت أسافر و ألاقى العربية اللى أنا رايح أشوفها , أفضل وصف ليها , أنها زباااااااااااالة .

زمان كان اللى بيبيع عربية مشنة , بيستحى أنه يقول عليها أنها سليمة و كان بالكتير أوى يقول أنها راشة جوه نظافة, دلوقتى عادى جدا أنك تلاقى واحد معاه عربية مغيرة نص أمامى أو سقف و بكل بساطة , يقسم بالله أن العربية دواخل فابريكة و عربيات تانية يبقى باين للأعمى أنها زباااااااااااااااالة و تلاقى اللى بيبيعها عمال يشعر فيها كما لو أنى أنا أعمى فعلا و مش شايف العربية , آخر مرة, روحت أشوف عربية , لقيتها معقولة و الشنطة و الحوض و القوايم و السقف تمام , بس لقيت أنه واضح جدا وضوح الشمس , أن الشنب مرشوش , ماهو يعنى فى عربية مو 1984 , بقالها 26 سنة, الشنب لما يترش , مهما كان البوهيجى حريف , لازم يفرق عن الفابريكة لأن الدوكو بتاع الفابريكة قديييييييييييييييم أوى, المهم , قولتله , الشنب ده مرشوش , لقيت اللى بيبيع العربية , بيبصلى ببلااااااااهة شديييييييييييييدة كما لو أنى قولتله أن العربية دى فيات مش مرسيدس و قاللى أنا مش فاهم أنت قصدك ايه ( بيكمل استهبال بأه ) و لما قرصت عليه فى الكلام , قاللى , أصل دى بتبقى أمور عادية لأن كان فيه عربية نص نقل ريحت!!!!!! و خلوا بالكم من ريحت مش العربية لابسة فى وشها , لأ , ريحت , على الكبوت , طاب ده تقوله ايه , واحد تانى كان بيبيع عربية , أنا شايف بأم عينى , المعجون تحت البوية عند مفصل الكبوت اليمين و هو يحلفلى أن العربية دواخل فابريكة .

عالم عاوزه الحرق صحيح :beatdeadhorse5:.

مازيراتى كواتروبورتيه

بص حضرتك اكتر عربيه فيها لعب هيا ال200 ممكن تكون قطعه نص و يقولك الدواخل فابريكة يا باشا
مافيش اكتر من النصب في شراء و بيع العربيات لازم تعرف واحد امين و تتعامل معه
انا كنت مره شايف مرسيدس 280e و البادج 280e و اوتوماتك و المنكة سته سلندر انجكشن و العدا في ار بي ام و اخره220 و الراجل قعد يحلفلي ساعة انها مش 200 ان هيا 280e و لما خدت رقم الشاسيه لقتها اساسا عربيه ديزل و هوا مسقط المكنة و رشه دواخل و العربيه لو ادتها من غير فلوس مش حخدها
و العداد بتاع الw123 بيقلب علي مليون لو عامله 200 الف فابريكة يعني مش ملعوب في العداد و لا كان مفصول والكلام دا و الموتور برقم الشاسيه يعني الموتور بتاعها لسه متغيرش
200 الف مش كتير العربيات دي بتعمل كليوات كتييير اهم حاجة البارومة و الدواخل اي حاجة تانيه تتعمل
و دايما خليك فاكر ان المرسيدس القديم عربيات جميله و الناس بتعتز بيها جدا و طول ما العربيه مش مزعله صاحبها مش حيبعها
فصعب شويه تلاقي حالق نضيفة و اصبر
و انشاء الله تلاقي حالة نضيفة

اقتباس:

---

المشاركة الأصلية كتبت بواسطة MBhead

بص حضرتك اكتر عربيه فيها لعب هيا ال200 ممكن تكون قطعه نص و يقولك الدواخل فابريكة يا باشا .................................

200 الف مش كتير العربيات دي بتعمل كليوات كتييير اهم حاجة البارومة و الدواخل اي حاجة تانيه تتعمل
و دايما خليك فاكر ان المرسيدس القديم عربيات جميله و الناس بتعتز بيها جدا و طول ما العربيه مش مزعله صاحبها مش حيبعها
فصعب شويه تلاقي حالق نضيفة و اصبر
و ان شاء الله تلاقي حالة نضيفة

---

السلام عليكم و رحمة الله و بركاته

أنا مش معترض على كلام سيادتك, بس فى الأيام اللى احنا فيها دى و بالأسعار بتاع المرسيدس المعدلة دى, تبقى 65000 جنيه كتير عليها أوى لو كانت عاملة 288000 كم , ده لو كان قال أنها 288000كم و طلب السعر المعقول بتاعها , يعنى بتاع 40000 جنيه, كنت شوفت العربية و يمكن كنا خلصنا فيها , بس هو طماع و جشع و نصاب.

أنا من غلبى فكرت أشترى واحد كانت معروضة فة Contactcars ب 22000 جنيه مو 1977 أو 1976 , مش فاكر بالظبط, و أجيبلها قطمة مو 1984 - 1985 فيها كل حاجة و ماخدش من العربية اللى هشترها دى أى حاجة الا الشاسية و راكب عليه الكروسليه , و أخد من العربية التانية كل كبيرة و صغيرة , بس استصعبت الفكرة لحسن تكون العربية الموديل 77 دى حتى الكروسليه بتاعها مش سليم , يبقى ماعملتش حاجة .

هيييييييييييييييييييه , ربنا يعين و يسر الأمور

مازيراتى كواتروبورتيه

بالنسبة للعداد فدلوقتي كله بيتلعب فيه الديجيتال والعادي...
غير الموديل ده ممكن تجيبله عداد استيراد ب150ج وماشي رقم قليل ويبقى العداد مش ملعوب فيه!!!
انا كان معايا واحدة 200 الموتور الاسود في 2006 بعتها ب68,000 كانت ماشية 230,000 سفر موديل 84, راشة برة طبعا, مغيرة رفرف وكبوت وراشة جزء صغير في كارتيرة العجل الشمال..
طبعا قولت عاللي فيها قبل ما ابيع بس كانت العربيات غالية اوي..
كانت فيها تكيف وسنتر ومركبلها ازاز كهربا قدام وفيها rpm ‎...
والله العربية كانت حكاية بس كانت عايزة عمرة وانا مش بحب اعمل عمرات وقدمت قوي..

المهم لو حضرتك بتدور على حاجة فأحسن حالات تلاقيها في الصعيد عشان بيعشقو المرسيدس ان شاء الله من موديل 1930!!!
عموما لو لقيت حاجة كويسة قدامي هبلغك ولا قررت عدم الشراء؟؟

متخدش بالك مع الناس دى
بيقوا عايزين يبيعوا العربية و فاكرين بقيت الناس قراطيييس

اقتباس:

---

المشاركة الأصلية كتبت بواسطة bedo13

بالنسبة للعداد فدلوقتي كله بيتلعب فيه الديجيتال والعادي.................................... ........

المهم لو حضرتك بتدور على حاجة فأحسن حالات تلاقيها في الصعيد عشان بيعشقو المرسيدس ان شاء الله من موديل 1930!!!
عموما لو لقيت حاجة كويسة قدامي هبلغك ولا قررت عدم الشراء؟؟

---

السلام عليكم و رحمة الله و بركاته

يا باشا , ألف شكر و جزاك الله كل خير , أنا فعلا بدور على واحدة تكون 230 , مش 200 و تكون موديلتات 1984-1985 عشان, أنا عاوز أغير الموتور اللى فيها بموتور زلمكة موديل بعد ال91 بالفتيس و التكييف .

ألف شكر و ربنا يجعله فى ميزان حسناتك ان شاء الله

مازيراتى كواتروبورتيه

اقتباس:

---

المشاركة الأصلية كتبت بواسطة maserati

السلام عليكم و رحمة الله و بركاته

يا باشا , ألف شكر و جزاك الله كل خير , أنا فعلا بدور على واحدة تكون 230 , مش 200 و تكون موديلتات 1984-1985 عشان, أنا عاوز أغير الموتور اللى فيها بموتور زلمكة موديل بعد ال91 بالفتيس و التكييف .

ألف شكر و ربنا يجعله فى ميزان حسناتك ان شاء الله

مازيراتى كواتروبورتيه

---

ان شاء الله ادورلك بس بعد الامتحانات , اسبوعين كده ان شاء الله..
دعواتك..

ليه 230 مش 200؟؟

السلام عليكم و رحمة الله و بركاته

اقتباس:

---

المشاركة الأصلية كتبت بواسطة bedo13

ليه 230 مش 200؟؟

---

أنا عاوز ال230 , مش ال200 لأن زى ما أنت عارف أن ال230 طول عمرها ضريبتها و استهلاكها للبنزين أعلى من ال200 و بالتالى اللى بيجيب 230 , مابيبقاش الفلوس فارقة معاه و بالتالى مش هتبقى عربية متهانة و كمان سوقها مش ماشى أوى فى البيع و الشرا زى ال200 و بالتالى , هتكون سعرها أقل من ال200 انفس سنة الموديل و كمان هتكون الفرصة أكبر فى شرائها من صاحبها اللى هو أول أو تانى يد بالكتير و هتبقى بيتى , مش من تاجر لأن التجار بيبعدوا عن ال230 لأن لو تاجر معاه واحدة هتبقى تقيلة فى البيع و هتقعد فى أرابيزه , لأن ضريبتها اليومين دول 1300 جنيه لكن ال200 ضريبتها 400 جنيه شاملة كل حاجة !!!!!!!!!!!!

اقتباس:

---

المشاركة الأصلية كتبت بواسطة bedo13

ان شاء الله ادورلك بس بعد الامتحانات , اسبوعين كده ان شاء الله..
دعواتك..

---

ان شاء الله ربنا يوفقك و يكرمك

اقتباس:

---

المشاركة الأصلية كتبت بواسطة hossamhookman

متخدش بالك مع الناس دى
بيقوا عايزين يبيعوا العربية و فاكرين بقيت الناس قراطيييس

---

بالظبط كده , هو موضوع القراطيس ده أكتر حاجة ضايقتنى و حرقت دمى من الغشاش الحرامى ده !!!!!!!!!!!!!:khd:

مازيراتى كواتروبورتيه

اقتباس:

---

المشاركة الأصلية كتبت بواسطة maserati

السلام عليكم و رحمة الله و بركاته

أنا عاوز ال230 , مش ال200 لأن زى ما أنت عارف أن ال230 طول عمرها ضريبتها و استهلاكها للبنزين أعلى من ال200 و بالتالى اللى بيجيب 230 , مابيبقاش الفلوس فارقة معاه و بالتالى مش هتبقى عربية متهانة و كمان سوقها مش ماشى أوى فى البيع و الشرا زى ال200 و بالتالى , هتكون سعرها أقل من ال200 انفس سنة الموديل و كمان هتكون الفرصة أكبر فى شرائها من صاحبها اللى هو أول أو تانى يد بالكتير و هتبقى بيتى , مش من تاجر لأن التجار بيبعدوا عن ال230 لأن لو تاجر معاه واحدة هتبقى تقيلة فى البيع و هتقعد فى أرابيزه , لأن ضريبتها اليومين دول 1300 جنيه لكن ال200 ضريبتها 400 جنيه شاملة كل حاجة !!!!!!!!!!!!





ان شاء الله ربنا يوفقك و يكرمك






بالظبط كده , هو موضوع القراطيس ده أكتر حاجة ضايقتنى و حرقت دمى من الغشاش الحرامى ده !!!!!!!!!!!!!:khd:

مازيراتى كواتروبورتيه

---

انا عايز حضرتك تاكد الاول انا ينفع تنزل في السي سي يعني تركب موتور اقل من موتور العربيه لان في بنود اتغيرات مع القانون الجديد يعني دلوقتي مثلا لو معاك عربيه مرسيدس و عايز تركب موتور بورش مثلا مش حيرخص العربيه اما الاول كان كلو بيترخص و عايز اقول لحضرتك ماتشوف 200 احسن لان الموتور مش حيعمل اقل من 8 الاف و حتسقط المكته و كل دي مصاريف و وجع دماغ و حتجيب كده سعر ال200 بردو و اكيد حضرتك عارف ان 230 قبل القانون الجديد كان ترخصها 290 باين ولا حاجة كده و الفرق في الاستهلاك بردو مش كتير اوووي لتر او لترين بالكتير اوي يعني ماكنتش عايز واحد معاه فلوس عشان يركبها و في ناس و الله معاها فلوس و بتطلع عين العربيه معاها و تبهدلها
مراعيه العربيه ملهاش اي علاقة بالفلوس انا ساعت بشوف ناس راكبه عربيات جديده و غاليه و ماشيه كلها تراب و متخبطة من شمال و يمين
و اصبر و ان شاء الله حتلاقي حاجة نضيفة و انا ممكن اشوف لحضرتك 200 اصل صاحبها كان من فترة بيقولي عايز يجيب عربيه عيون 2008 فا لو حيبعها حكلم حضرتك علي طول هيا حالة الفابريكة راشه رفرف شمال قدام يس اما الباقي كله بويه مصنع و العربيه مفهاش اي حاجة و موديل 85 مواصفات امريكاني كامله عدا فتحة السقف
اسف علي الاطاله

اقتباس:

---

المشاركة الأصلية كتبت بواسطة mbhead

انا عايز حضرتك تاكد الاول انا ينفع تنزل في السي سي ..........................

---

السلام عليكم و رحمة الله و بركاته

يا باشا , ألف شكر على تعبك و زوقك .

أنا اللى أعرفه أنه فى المرور حديثا , ماعدوش بيمانعوا أنك تنزل بالسى سى , بس يكون نفس ماركة العربية هى نفس ماركة الموتور اللى هيتركب لها.

أصل اللى معاه 200 و نظيفة هتلاقيه طالب فيها سعر عالى أوى و مبالغ فيه جدا لأنه بيقى عارف قيمتها فعلا , لكن ال230 , أهى ممكن تكون مش مرغوبة شوية و بالتالى يكون سعرها نزل و خاصة أن ضريبتها السنوية أصبحت حوالى 1100 جنيه .

ربنا ييسر و يصلح الأحوال

و شكرا لكرمك و زوقك تانى مرة .

300000 مش كتير في المرسيدس لكن هو مبالغ في السعر وكمان في حكاية مرفوعه