مسابقة أفضل سيارة فى كل فئة : فئة السيارات الصغيرة

**فادى** · 23-03-2008 01:04 PM

فكرت أن نقيم مسابقة لكل فئة من فئات السيارات على منتدى نايل موتورز. و سوف نقسم السيارات الى فئات بحسب الحجم و ليس المحرك, و أرجو من الزملاء مراعاة القواعد الأتية فى الاختيار :
- أن يكون الاختيار محايد لأقصى درجة.
- أن يعتمد الاختيار فى الأساس على معادلة القيمة/ السعر و ليس القيمة فقط, فمثلا يمكن اختيار سيارة ضعيفة و فقيرة الامكانيات لكن تباع بسعر مغرى, بدلا من سيارة قوية و مدججة بالامكانيات لكن تباع بسعر غير منطقى, يعنى نوازن بين السعر و القيمة الفعلية للسيارة.
- أن يؤخذ الأداء فى الاعتبار, يليه الراحة, ثم استهلاك الوقود و الاقتصادية و الصيانة و خدمة ما بعد البيع, ثم يقارن كل ذلك مع السعر.

و سوف نقسم السيارات الى الفئات التالية :
- سيارة صغيرة مدمجة (ميكرو كار).
- سيارة صغيرة.
- سيارة صغيرة كبيرة(سوبر مينى)
- عائلية صغيرة.
- عائلية متوسطة.
- عائلية كبيرة.
- مترفة.
- 4*4 صغيرة.
- 4*4 كبيرة.
- رياضية من المستوى الابتدائى.
- سوبر رياضية.

و سوف نبدأ بالفئة الصغيرة.
و السيارات المتبارية هى :
سوزوكى ماروتى: سيارة هندية من سوزوكى تفتقر الى الأداء الذى لا يستطيع محرك بسعة 800 سى سى توفيره, و بتكنولوجيا تعود الى الماضى, و لكن يميزها السعر المنخفض و حجمها المدمج جدا.
سوزوكى ألتو: تصنع فى الهند أيضا, و لكنها أفضل قليلا, من ناحية الشكل على الأقل.
شيفروليه سبارك: خليفة الدايوو ماتيز سيئة الذكر, لا أعتقد أن شيفروليه أضافت كثيرا للماتيز, لكنها تبقى سيارة تحمل اسم شفروليه العريق.
فولكس فاجن بوينتر: سيارة صغيرة من فولكس فاجن تصنع فى البرازيل, بمحركات كبيرة نسبيا فى هذه الفئة لكن تباع فى مصر بأسعار غير مقنعة.
شيرى كيو كيو :تقليد للشفروليه سبارك أو الدايو ماتيز, انخفاض سعرها لا يبرر تدنى جودتها.

**فادى** · 23-03-2008 05:41 PM

و لازم نضيف انو بعد انتهاء كل الاستطلاعات سوف أقوم بجمع السيارات الفائزة و أضعها فى موضوع منفصل بحيث يكون دليلا للمشترى حول أفضل سيارة فى كل فئة على حسب اختيار الاخوة الأعضاء, و سوف يرفق مع كل سيارة صورة لها و كلمة موجزة عنها.

**Chicco** · 23-03-2008 07:03 PM

فكرة حلوة يا فادي باشا و تقديمك لكل سيارة هايل بس لازم تبقى محايد أكتر من كدة شوية باعتبارك صاحب الموضوع

تفتقر الى الأداء

سيئة الذكر

تدنى جودتها

رغم إتفاقي معك في النقاط ديه لكن الحياد مطلوب من حضرتك عشان ما تأثرش على أراء المشاركين :)
على العموم إختياري في الفئة ديه شفروليه سبارك
(متهيألي بوينتر مكانها مش هنا)

**فادى** · 23-03-2008 07:21 PM

"فكرة حلوة يا فادي باشا و تقديمك لكل سيارة هايل بس لازم تبقى محايد أكتر من كدة شوية باعتبارك صاحب الموضوع

اقتباس:
تفتقر الى الأداء
اقتباس:
سيئة الذكر
اقتباس:
تدنى جودتها
رغم إتفاقي معك في النقاط ديه لكن الحياد مطلوب من حضرتك عشان ما تأثرش على أراء المشاركين
على العموم إختياري في الفئة ديه شفروليه سبارك
(متهيألي بوينتر مكانها مش هنا)"

شكرا على الاطراء, و عموما أنا بحاول أكون محايد قدر الامكان, لكن حبيت انى أكتب كلمة موجزة عن السيارة, يكون فيها رأى لا خلاف عليه بالنسبة للسيارة قدر الامكان, و أعتقد مثلا انو 99% من الأعضاء متفقين معى انو شيرى كيو كيو تفتقر للجودة.
البوينتر حطيتها هنا على أساس انو البولو تخش فى الفئة الأعلى قليلا و الجولف فى الفئة الأعلى منهم. هيا بين صغيرة مدمجة و صغيرة. عموما كل بلد ليها تصنيف خاص يعنى التصنيفات بتختلف بين أمريكا و أوروبا, هنا بحاول قدر الامكان تصنيف السيارات بحسب المتعارف عليه فى السوق المصرى. و أرجو أن أكون وفقت. اعذرونى طبعا اذا كان هناك بعض الأخطاء فى التصنيف.
و عموما أنا لم أقصد التأثير على الأعضاء و لكنى أقول رأيى بشكل مقتضب, و للأعضاء حرية الاختيار.

**Chicco** · 23-03-2008 07:26 PM

أو كي يا باشا ......و هو فعلا السوق المصري يحير..... على العموم موضوع حلو و مجهود مشكور في إنتظار الباقي :)

**hazem_khidr** · 23-03-2008 07:28 PM

خليفة الدايوو ماتيز سيئة الذكر

الكلمه دي فكرتني بسبور اوتو يا عم فادي .
يا اخي سبحان الله من كتر ما الواحد قرأها كل ما اكتب موضوع عن اي عربيه بتلاقيني بتكلم بلسانهم و بطريقتهم.
فاكر العدد اللي طلع سنه 99 باين و كان في صوره الماتيز و هيا بتقلب و كاتبين ماتيز تقلد مرسيدس A في الانقلاب :)

**فادى** · 23-03-2008 07:35 PM

"لكلمه دي فكرتني بسبور اوتو يا عم فادي .
يا اخي سبحان الله من كتر ما الواحد قرأها كل ما اكتب موضوع عن اي عربيه بتلاقيني بتكلم بلسانهم و بطريقتهم.
فاكر العدد اللي طلع سنه 99 باين و كان في صوره الماتيز و هيا بتقلب و كاتبين ماتيز تقلد مرسيدس A في الانقلاب "

فعلا سبور أوتو مأثرة جدا فى أسلوبى عند الحديث عن السيارات لكثرة قرائتها, أسلوبهم راقى و مميز جدا, بس كمان فيه مجلة اسمها "توب جير"(مش بلاقيها حاليا) هى تعريب لمجلة أجنبية هتلاقى الأسلوب مشابه لسبور أوتو جدا بس سبور أوتو أفضل و أمتع فى قرائتها.
أنا فاكر الموضوع كويس بتاع الماتيز و أفتكر كان عنوانه "دايو ماتيز تقلد صغيرة مرسيدس فى الانقلاب".:)

**hazem_khidr** · 23-03-2008 08:07 PM

شفت بقي يا عم فادي اخوك مذاكر ازاي:)
انا عندي اعداد لسبور اوتو من سنه 1977 تخيل بقي !!!!
يعني يعتبر قريت معظم اعدادها و لما ابراهيم فخري سابها و راح اتومبيل بقيت بجيبها برضه علشان الراجل دا بحترمه.

**fahd_628** · 23-03-2008 08:17 PM

حازم باشا انا كمان كنت بحب جدا جدا سبور اوتو بس خلاص بقى بعد ما النت بقى فية كل حاجة و بقيت بنزل حلقات FIFTH GEAR و TOPGEAR فا مبقتش محتاج اوى المجلة و بقيت بمل منها غير طبعا لما تشوف العربية على الحقيقة فى الفيديو

و دول مجموعتى البسيطة من مجلة سبور اوتو مع كام مرجع كدة كان بينزل كل سنة للسيارت كلها

:D :D : D :D :D :D :D

**hazem_khidr** · 25-03-2008 03:19 PM

يااااااااااااااااااااه
دا خريجين سبور اوتو كتير اهو :)
انا كمان حبقي اصورلك جزء من المجلات اللي عندي لان فيه حوالي 3 سنين و نص مجلات لسه في الامارات مش عارف اجيبهم و زميلي لسه ما بعتهمش (حوالي 30 كيلو)!!!!!