قبل ماحكى الاول لازم اشكر أ\ مروان أ\وسام على ذوقهم واحترامهم لأنهم فعلا واجهة مشرفة لبروتون
البداية فى الاستقبال وقبل ماوصل عز العرب مروان كان متابع معايا بالتلفون لحد ماوصلت ولاقيتو منتظرنى قدام المعرض قمة الذوق والاخلاق الصراحة . حضرتك تحب تجرب الاوتماتيك ايوة كتبت شوية بيانات وبعدين طلعنا نجيب العربية طبعا شكلها من بره كلنا عارفينه ازاى بيخطف النظر لونها اسود وفيها سبويلر بس الموديل ده من غير كساحات وعتب والكشاف الامامى كاربون نازلة به كده .
من فتحة الباب وقفلته تحس بتقل الصاج بتاعها القعدة جوة ليها احساس تانى انت راكب عربية شيك وسبور فى نفس الوقت الكراسى semi recaro والتابلوه شكله مختلف عن العادى دورت العربية صوت الموتور يدى احساس انه عايز يجرى شغلت الكاسيت من الطارة ال multi-function وعليت عالاخر صوت السماعات كويس جدا والمفاجأة لما شغلت التكييف والعربية لونها اسود والجو يومها كان حر فى دقيقتين كان تلاجة تكيفها قوى جدا بجد.
لما ابتديت اتحرك سنسور الباركينج عملى جدا وبينجز فى الوقت بس المرايات الجانبية صغيرة والمراية الشمال عادية مش بتجيب زاوية كبيرة زى اليمين واعتقد دى مسألة تعود .
استجابة الفتيس الاوتماتيك فى النقل سريعة من R ل D سحبها على الطريق قوى بالنسبة لاوتماتيك انا ماقرصتش عليها جامد لأنى مش بحب السرعة بس استجابتها ممتازة مع الكيك داون العفشة ماسكة نفسها ومش بترزع بالعكس انا حسيت انها ناعمة الى حد ما . الطارة بتلم بسرعه لأنها لفة ونص ودى فايدتها فى الغرز وفى الركن.
.جربت الفرامل ال abs جبت الدواسة للاخر وجربت احود يمين وشمال فعلا بتجيب معايا بس كان فى صوت غريب وانا دايس حسيته مع الاوتوماتيك بس . جربت المانيوال بعدها فرق شاسع فى السحب فعلا عرفت اد ايه الاوتوماتيك بيكتم العربية متعتها مع المانيوال اكتر بكتير .
انا طولت عليكم معلش الخلاصة ان العربية عجبتنى جدا وحبيتها اكتر بعد ماسوقتها .