المشاركة الأصلية كتبت بواسطة أشرف العدوي
حصلي نفس حوارك بالظبط مع نفس الثلاجة و نفس الشركة
و بعد سنة رجعتلهم التلاجة و أخدت فلوسي كاملة ( عافية ) الذوق مش بيجيب معاهم نتيجة
انا اول ماجبتها حصل نفس مشكلتك و اتصلحت مرتين و في المرة التالة غيرولي الباب ( هي كانت 18 قدم نو فروست )
و بعد كدة باظت تاني
الفني كان بيجي يسخن ماية يغسل الباب و يمشي
فضلت كدة بتاع اربع شهور كل اسبوعين الفني يجي يغسل الباب ( قال يعني انا مش هعرف اعملها )
بعد خناقات غيرولي التلاجة كاملة و المفاجئة ان نفس المشكلة موجودة في الثلاجة الجديدة
فضلت بتاع 4 شهور كمان الفني يجي يعمل نفس الحوار
و في اخر مرة جه ما كنتش موجود في البيت و اتصلوا بيا قالولي انه زعقلهم و قل ادبه عليهم و قالهم مش جاي تاني و الي عندكوا اعملوا و بلطج يعني .
المهم اتصلت بيهم اتخانقت معاهم في التليفون و بعتولي واحد بعد شهر غير الي كان بيجي
الي جاي هو الي مهم
خدت اجازة من الشغل و البيه جه بعد ميعاده بـ 6 ساعات و جاي عامل فيها كبير صناعية أيديال
قبل ما يمد أيده في الثلاجة قولتله التلاجة دي هترجع و هاخد فلوسها كاملة و شدينا مع بعض
و قفلت عليه باب العمارة و قعدته على السلم
قولتله كلم الي عايز تكلمه الثلاجة هترجه يعني هترجع و ما تضيعش وقتك و وقتي انا ممكن اخليك قاعد كدة مدى الحياه
قالي انا زنبي ايه قولتله و انا زنبي ايه
المهم كلم حد عندهم في الشركة و خلاني اكلمه لقيته بيقولي انت كدة تبقى خاطفه و ممكن نستعمل معاكم القانون و الكلام الفارغ ده
قولتله الراجل في بيتي و ممكن البسه سرقة عادي يعني
و قعدنا نغلس على بعض شوية قولته انت بتضيع وقت ابعت حد معاه حق الثلاجة و عربيية ياخدها و يديني فلوسي غير كدة ما عنديش اي حلول
المهم بعد ساعتين بعتولي حد فعلاً خد الثلاجة و أداني وصل بقيمة الثلاجة اروح اصرفه من الأدارة بتاعتهم عند جامعة الأزهر ش امتداد رمسيس
روحت تاني يوم صرفت الفلوس بعد رخامة بس الحمد لله خلصت منها و زودت الف و نص و جبت توشيبا و طبعاً فرق السما من الارض