ركبت فتيس اتوماتيك للزلموكه 88

**maged** · 23-03-2008 05:38 PM

غيرت الفتيس المانيوال بتعها واشتريت فتيس اتوماتيك بحوالى 5000 جنيه بالتركيب وعارض الفتيس المانيوال بتاعها للبيع على فكرة هى زلموكه 230 موديل 88 وكمان اشتريت جنوط ب 1800 جنيه وعارض جنوطها الحديد الاصليه للبيع ايه رأيكم

**kimo-nubira** · 23-03-2008 05:40 PM

1000 مبرووووووووك علي التعديل وربنا يباركلك فيها

**Xpert** · 23-03-2008 05:54 PM

انا لسه عامل العكس في عربيتي البي ام .. احب اقولك بقي ..
انا خامس فتيس اوتوماتيك يركب عندي .. اخر مره سالت عليه عندي كان ب 4500 جنيه .. غيرت ركبت مانوال .. المانوال يتراوح سعره بين : 600 جنيه للفتيس العادي .. لحد 1500 للفتيس الاسبور ..
الفتيس ال Zf الالماني فيه عيوب خد بالك منها .. اعمله صيانه دوريه و غير او اغسل فلتر الزيت بتاعه و غيرله الزيت في مواعيده و اوعي .. اوعي .. تدوس بنزين و هيا مش اخده غيار .. سواء علي ال بارك او النيوترال ..
ما علي الرسول الا البلاغ ..
سيب الفتيس القديم و حاجه المانوال القديمه .. هاتحتاجها ...

**cpt_shawky** · 23-03-2008 06:56 PM

لو ممكن تشرح خطوات التحوبل للاتوماتيك بالتفصيل ومين اللى بيعملها وتكلفتها ؟؟؟

**Xpert** · 23-03-2008 07:06 PM

عنيا :
1-فك الموتور و الفتيس ... ان لم يكن فك الموتور ضرورياً في بعض الاحوال
2-فك الفتيس من علي الموتور .. بالاضافه لمجموعه الدبرياج ( الدسك و الاسطوانه و البليه) ... بالاضافه لترس الفلام + البليه اللي جوه الكرنك ...
3-بتغير البليه + الفلام + بتركب القربه (التورك كونفرتر) + الفتيس
4-تركيب الموتور بالفتيس في الحوض + توصيل واير الكيك داون
5-بتشوف في معظم احوال الجر الخلفي بتطلب تغير الكردان .. و قواعد الفتيس ..
6-تغير الردياتير + توصيل خراطيم التبريد من الفتيس للردياتير
7-تغير عصايه الفتيس و البدالات جوه العربيه
8-في بعض احوال العربيات الجديده يتطلب الامر تغير ضفيره و نظام الانجكشن للموتور .. و دي تعرفها لو الفتيس داخله فيشه كهرباء ..
9- تست درايف ....

**cpt_shawky** · 23-03-2008 07:08 PM

عفوا اكسبرت السؤال موجه لماجد صاحب الموضوع :D:D

**Xpert** · 23-03-2008 07:10 PM

خلاص اسحب اجابتي :p :D:D:D

**maged** · 23-03-2008 11:55 PM

ولا خطوات ولا يحزنون الموضوع مأساوى ومنصحش اى حد بيه نهائيا لان صاحب العربيه والدى وهو اشترى العربيه وبعد شرائها بيومين مشى فى طريق جسر السويس وكان زحمه جدا جدا لذلك قرر تغيير الفتيس الى اتوماتيك لكن انا مكنتش مقتنع ابدا وزعلت منه وحاولت اثنيه عن رايه لكنه كان مصمم لان الميكانيكى (طبعا ميكانيكى متخصص مرسيدس) اقنعه بذلك عشان يعمل شغل
المهم اشترى الفتيس من الحرفيين + لسته طويله من لوازم التعديل ورجع بيها للميكانيكى وبعدين الميكانيكى معجبوش الفتيس فذهب هو مع والدى وانا معاهم لاختيار فتيس افضل واختار واحد بعد فحص اكتر من 40 فتيس وفى الاخر الفتيس اللى خده وركبه طلع بايظ برضه فذهب والدى لترجيعه وبعد ذلك كان الحل ان المحل بعت لواحد متخصص فتيس اتوماتيك عشان يشوف ايه المشكله فى الفتيس عشان ميتكررش الموضوع وفعلا الراجل فك الفتيس حته حته وطلع الاشياء التالفه وجاب فتيس تانى واستبدل الاجزاء التالفه كلها وخد وقت حوالى 8 ساعات وركب الفتيس تانى وجربه وطلب من والدى يجى تانى يوم عشان يفكه مرة تانيه عشان يغير حاجه تانى وفعلا غيرها تانى يوم وركب الفتيس تانى طبعا ده كله بعيد عن الميكانيكى اللى ركب الفتيس اول مره وبعد التركيب اصبح الفتيس ممتاز لكن للامانه رغم ان والدى مقتنع بالفتيس لكن انا مازلت شايف ان تغيير الفتيس مشروع فاشل واشتغاله كبيره جدا لان الميكانيكى الاول خد 400 جنيه والاخصائى التانى خد 400 جنيه هذا بخلاف 4500 ثمن الفتيس ولوازمه بلاضافه الى بعض الخراطيم الجديده هذا بخلاف زيت الفتيس اللذى تم تغييره 3 مرات

لذلك اؤيد بشده كلام الاستاذ xpert فى عدم وجود داعى لتعديل سيارة مانوال الى اتوماتيك لكن اللى عايز يركب اتوماتيك يشترى سيارة نازله من بلدها اتوماتيك احسن وللاسف والدى اقتنع بكده اخيرا لكن بعد فوات الاوان
سؤال الى الاستاذ xpert انا مش فاهم يعنى ايه اوعى تدوس بنزين على وضع p طيب لما اسخن العربيه اعمل ايه

**Xpert** · 24-03-2008 12:06 AM

لما تسخن الفتيس سخنه علي السلانسيه .. زي ما قلتلك فتيس الزد اف ده ملزق من جوه .. لو الار بي ام علي الباركينج و النوترال الفتيس بيبوظ ال a pack clutch , و ده مسؤل عن اللقطه الاولانيه ... لو باظ شيل الفتيس و ارميه ..
الفتيس اللي انت جايبه رجعه علشان الفتيس الاوتوماتيك اللي بيتفك مابيتلمش تاني ...