صيانه ال 10000 للماروتي

**love7amada** · 04-12-2010 05:11 PM

طبعا كملت ال 1000 و العربيه كان بقالها مده مش مظبوطه متبرجله كده و بتسقف لو قرصت عليها فقلت مبدهاش
و رحت ع الميكانيكي اللي اعرفه
غيرنا ابلاتين و طقم بوجيهات و نضف فلتر الهوا و بجد حسيت بالفرق
حاجه رهيبه
الاول كان لازم احرق بنزين كتير عشان تمشي دوقتي يا دوب مريح رجلي ع الدواسه و بسيب الدبرياج اسرع كتير
و لسه موضوع التسقيف هجربه بكره هوا و السحب اللي كان ضايع
الابلاتين جبته ب 10 جنيه و ال بوجيهات ان جي ك ب 30 جنيه الطقم الاربعه
و الميكانيكي خد 30 جنيه
و بكره ان شاء الله هغير الزيت و فلتر الزيت و فلتر البنزين و اظبط رجلاش للفانوس

**dr.hazem** · 04-12-2010 09:23 PM

فلتر البنزين متغيروش ملوش لازمه تغييره حاليا
المفروض عالكتالوج بيتغير كل 40 ألف خليك تكون انتا بتعبي طين مش بنزين يبقى غيره كل 20

متغيروش الا لو حسيت بتنتيش والعربية مكتومه

لان كل اللي في السوق مش نفس شكل الاصلي وبيركب بطريقه اي كلام وانا عن نفسي مكنتش اعرف الكلام ده قبل ما اغيره وللاسف غلطت وغيرته بدري لان مكنش عندي الكتالوج

وانا محتفظ بيه والمره الجايه هحطه تاني ان شاء الله,,,,
الاصلي اصلي برضو,,,,,,

انا عن نفسي مش عارف ايه الابلاتين ده وانا عارف انه حاجه مشهوره لكن هتقول ايه,,,, ولا اعرف مكانه حتى والله
ههههههههههههههههه

بس صيانة ال 10 آلاف كده كده مفهاش غير تنظيف بواجي وتغيير الزيت والفلتر وتربيط العفشه
وشيك على بقية السوائل وبس

دعواتك....

**love7amada** · 04-12-2010 10:53 PM

اه العربيه كانت بتسقف ع التالت و الرابع كمان و عشان اطلع بيها كنت احرقق بنزين كتير اسيب دبرياج بطئ جدا دوقتي انا يا دوب مريح رجلي ع البنزين و الدبرياج بسيبه اسرع
و فعلا الميكانيكي ده كويس عشان اعرف ناس بتتعامل معاه و هوا كان ماسك توكيل تيوتا ف السعوديه و نزل فتحله ورشه هنا
و قالي ع اجيب سير كاتينه و دينامو مع الفلتر بما اني نازل كده كده احمد حمي واعينهم معايا للصيانه الجايه قبل ما اروحله و بالنسبه للحديده اللي معجونه عندي قالي مش هلاقيها جديد و اروح اجيبها استيراد و هوا يركبهالي و قالي انها بتاخد الهوا دافي بس من ع حديده الشكمان ف بتحسن الاداء ف الشتاء و لو عايز اعملها اعملها مش عايز خلاص ان تاثيرها مش ماثر اوي

**hamaza81** · 05-12-2010 12:52 AM

وانا كمان داخل على صيانة العشرة باذن الله
انا كنت عملت الـ 1000 والـ 5000 في التوكيل
بس شكرا على كدة

عندي ميكانيكي مية مية في الهرم هاظبط معاه من هنا ورايح الصيانات

أعتقد في صيانة الـ 10000 يبقى كدة مطلوب:
* مراجعة الكهرباء (بوجيهات، أبلاتين، كوندسنر) والتغيير في حالة الحاجة.
* مراجعة جميع السوائل.
* تربيط العفشة
* تغيير الزيت (إن كان معاده جه)
* تنظيف فلتر الهواء
* تبديل أماكن العجل

بس في حاجة غريبة في الكتالوج
بيقولوا سير الكاتينة يتغير كل 100000 كم
مستغرب دي جدا

**dr.hazem** · 05-12-2010 01:58 AM

المشاركة الأصلية كتبت بواسطة hamaza81

وانا كمان داخل على صيانة العشرة باذن الله
انا كنت عملت الـ 1000 والـ 5000 في التوكيل
بس شكرا على كدة

عندي ميكانيكي مية مية في الهرم هاظبط معاه من هنا ورايح الصيانات

أعتقد في صيانة الـ 10000 يبقى كدة مطلوب:
* مراجعة الكهرباء (بوجيهات، أبلاتين، كوندسنر) والتغيير في حالة الحاجة.
* مراجعة جميع السوائل.
* تربيط العفشة
* تغيير الزيت (إن كان معاده جه)
* تنظيف فلتر الهواء
* تبديل أماكن العجل

بس في حاجة غريبة في الكتالوج
بيقولوا سير الكاتينة يتغير كل 100000 كم
مستغرب دي جدا

دي قرأتها في الكتالوج لكن طبعا ده غلط لان اساسا الكتالوج مش معمول لينا
ههههههههههههه
ده بتاع العربية الهنديه اللي ب 5 غيارات وفي منها انجكشن وحتى بوجيهاتها غير

يعني مختلفه عننا
وللاسف التوكيل هنا بينزل العربية بنفس الكتالوج ده
لكن هما هنا في التوكيل بيتغير كل 40 ألف.....

تحياتي

**aymanay32** · 05-12-2010 03:52 PM

اولا فين الميكانيكى الممتاز دة و عنوانة
ثانيا انته جيبت من اين الابلاتين ابو 10 جنية دة
ثالثا انا كمان عاوز اربط العفشة علشان عامل 19.600 كيلو و فاضلى 400 كيلو ممكن اعملهم فى يومين مثلا و بكدة هادخل على صيانة ال20 الف و محتاج عفشجى معقول

رابعا انا كنت جيبت فلتر بنزين من سوزوكى سنتر ب10 جنية او 15 جنية مش فاكر بالظبط كام و لسة مركبتوش لانى كنت مستنى اركبه مع صيانة ال20 الف فهل انتظر شوية لغاية صيانة ال40 الف

خامسا ايه نوع زيت الفرامل الباكم اللى ممكن استعمله لو عاوز اغير زيت الفرامل
و عندى الزيت شايفه ناقص شوية هل ازوده و لا لاء

**love7amada** · 05-12-2010 11:29 PM

اولا زيت الفرامل متزودوش طالما منزلش عن ال min
ثانيا الميكانيكي هنا ف فيصل ف شارع الملكه متقاطع مع العشرين
فلتر البنزين انا لسه هجيبه بكره و اركبه ان شاء الله عنده بس هوا انا شفت الفلتر عندي كان زفت كانه معبي شحم
لكن عفشجي معرفش الصراحه غالبا هروح بريدجستون او هسال الميكانيكي بكره
الابلاتين من محل ف شارع حي الهرم قدام موقف المساكن و الميكانيكي هوا اللي قالي عليه

**sab3aawy** · 06-12-2010 09:02 AM

الأبلاتين أو مقطع التيار قطعة كهروميكانيكية تشبه الى حد ما الاجزاء المعدنية الموجودة داخل مفتاح الاضاءة الموجود بالمنزل، هو عبارة عن نقطتين تلامس معدنيتين احداهما ثابتة والأخرى مركبة على ذارع من المعدن، عند دوران عمود الاسبراتير يكون فيه كامة( جزء بارز) تقوم بتحريك هذا الذراع حركة ترددية فى كل لفة فيقوم بملامسة وابعاد نقطتين التلامس طوال الوقت بشكل ترددى ، وظيفة الابلاتين كما هو واضح من اسمع العربى(مقطع التيار) هى تقطيع التيار، لماذا تقطيع التيار؟ لأننا نحتاج لتيار ذو قيمة فولطية عالية لتوليد الشرارة بالبوجيهات، وبالتالى نحتاج لمحول يقوم بتحويل تيار السيار ال 12 فولت الى تيار اكثر من ألف فولت للشرارة، والمحول لا يستطيع العمل على التيار المستمر المتوافر من بطارية السيارة لذلك لابد من تحويل التيار المستمر الى متردد حيث يقوم الأبلاتين بتقطيع التيار المستمر الى متردد ويقوم الكوندنسر بما نسمية( تنعيم حواف موجة التيار) حيث يعمل الكوندنسر كخزان كهربائى صغير جدا يتم تعبئته فى لحظة توصيل الأبلاتين ثم يقوم بالتفريغ بشكل متدرج بعد فصل الأبلاتين بحيث لا يكون فصل التيار حادا وانما متدرج وهى الظروف التى يحتاجها المحول(البوبينة) للعمل ، دورة التقطيع المصحوب بالشحن والتفريغ دى بتتم بتدردد يترواح من 7 الى 66 مرة فى الثانية الواحدة بحسب سرعة دوان المحرك التى تترواح بين سرعة السلانسيه واقصى سرعة دوران مسموح بها للمحرك
نظام الأبلاتين والكوندنسر نظام ميكانيكى قديم يعيبه انه ككل الانظمة الميكانيكية يحدث به تآكل نتيجة للحركة، ومع الوقت تم استبداله بأنظمة الكترونية بدأت بالسبراتير الالكترونى فى السبعينات وهو كان يحوى قطعة الكترونية حلت محل الابلاتين والكوندنسر، ثم مع ظهور سيارات الحقن الالكترونى اصبحت مجموعة موزع الشرارة (البوبينة والسبراتير) كلها الكترونية فى قطعة واحدة، وحاليا فى السيارات الأحدث اصبحت هناك بوبينة منفصة لكل بوجيه مع قيام وحدة التحكم الالكترونى للمحرك بتحديد موعد الشرارة لكل بوبينة وهو ما يعطى مرونة عالية جدا فى ضبط موعد الشرارة ومنع التسقيف
تقريبا فى الوقت الحالى مفيش عربية بتزل زيرو بأبلاتين وكوندنسر وحتى بكاربراتير سوى الماروتى

الموضوع: صيانه ال 10000 للماروتي

LinkBack

أدوات الموضوع

عرض

-

-

-

-

المواضيع المتشابهه

صيانه 20000 للماروتي

تم عمل صيانه العشرين الف للماروتي

صيانة ال 10000 للماروتي 2009 داخل التوكيل ولا برة؟

صيانة 10000 للماروتي

صيانه ال 10000 كم لل Frv

الكلمات الدلالية لهذا الموضوع

المفضلات

المفضلات

ضوابط المشاركة