الموضوع: انت لو مكانى تفكر تجيب ايه

السلام عليكم و رحمة الله و بركاته

الحمد لله العربيه الى كانت معايا بفضل الله و بفضل الموقع اتباعت من كام يوم كده

و تبدا بقا طبعا بعدها رحله البحث عن سياره اخرى

كنت بفكر فى كذا موديل و كل ما اقول موديل يطلع فيه الى فيه و حجات كتير
يعنى اجى اقول الكورسا الهاتش باك يقولوا غاليه قطع غيارها و ضيقه و كلام من ده
نيجى نقول حاجه تانيه يقولوا لا دى قديمه لا دى ضعيفه لا دى ضيقه

طبعا اى حد بيدور على عربيه اكيد عارف انا بتكلم فى ايه
دا طبعا غير الى كا واحد من اصحابك و اقاربك يفتكس و يقولك على موديلات تانيه هو نفسه فيها

المهم انا قررت انى زى ما بعت العربيه من على المنتدى هنا اجيبها برضه "ان شاء الله " من على المنتدى برضه
و كان فيه شروط لازم تكون متوافره فى العربيه الى هيكون ليا فيها نصيب
الا و هى:
السعر : فى رنج الـ30 الف تقل تزيد الفين
الموديل : فوق 2000 او 1995
المواصفات و الكماليات: مش لازم لا سنتر ولا انذار وزجاج كهرباء و الكلام ده كله بيتعدل و بيتضاف للعربيه مش قضيه
بس المهم ليا هو """---التكييف و الباور مش الهاف باور ---"""
حجم الماتور:من 1300:1500 علشان معايا اخبار 200% البنزين هيغلى
و برضه العربيه تكون شبابيه مش مثلا زى المازدا 323
و قطع الغيار و اسعارها عامله ازاى
و اخيراا سعر اعادة البيع كمان سنتين ميكونش برضه يخس النص مثلا


انت بقا تفكر لو مكانى فى موديل اييييييييييييه؟؟
و الى عنده عربيه بالمواصفات دى يا ريت يقول

و شكراا جزيلاا مقدما و ياريت مكنتش طولت عليكم

بسم الله الرحمن الرحيم
عليك و على الاكسيل 1500 مش 1300