انا شارى دى فهلا لقطة هههههههااا
عرض للطباعة
انا شارى دى فهلا لقطة هههههههااا
وانا ببيع العربيه السابقه قعدت اقول للمشتري فيها كذا وكذا وعملت فيها كذا ومحتاجه كذا
الراجل زهق مني
وقالي بقول لحضرتك ايه قلتله قول
قلي انا بشتري منك حته حديده استريحت
قلتله اه
دفع الفلوس واخد العربيه ومشي
انا اخويا وهو بيبيع اللانوس بتاعته القديمه كنت معاه لقيته عمال يقول للراجل على عيوبها وبس وكمان بيقوله انها بعد شويه حتبقى تحتاج كذا وكذا
قولتله يا عمرو ده لو ميكانيكي بتاعه وجاي يبوظ البيعه مش حيقول للمشتري اللي انت قولته ده
وسبحان الله ربنا يباركله اتباعت وبسعر معقول (مش عالي طبعا لكن مش اللي واقع برضه)
ومن ساعتها بجد وقولت انا لما ابيع حقول للمشتري دي فيها ايه بالظبط مش زي مالناس تقول اكشف عليها براحتك لان عمر ما الكشف حيبقى زي اللي سايق وعارف عربيته
يامعلم انتا قولت نقطه مهمه جدآآآآ كل واحد تسئله هو بيبيع ليه يقولك اصلي مسافر ولو مش مسافر مكنتش فرط فيها ده انا افرط في عيل من عيالي ولا افرطش فيها انا حاسس ان البلاد كلها مسافره بقت كلمه عجيبه اسئل اي وحد عايز يبيع ليه يقولك اصلي مسافر والله بقت قله الزمه والضمير دول هو الي مش مخلي الفرج والنعيم ينزل علينا لكن لوعندنا زمه وضمير ربنا هيفرجها معنا وعلي الاقل هيدخل جيوبنا فلوس حلال وهيختفي زمن الغلاء والوباءالي بقيناعايشن فيه بسبب البشر انفسهم
ههههههههههههه موضوع حلو وفكرتنى بموقف
كنت بدور على عربية اسكودا a4 تكون موديل عالى 2008 او 2009 فقلت ادور على النت
لقيت عربية 2008 قلت اكلم صاحبها واتصلت بية
فطبعا حضرتك عارف نظام البيع
بسألة على العربية يرد طبعا العربية تحفها مفيهاش الهوا ومفيهاش خربوش فبريكة برة وجوة
بسألة على الكماليات يرد يقولى فول اوبشن فبقولة ايوة اية هى الاوبشن دى يرد يقولى كل حاجة انت عايزها فيها
فبقولة حضرتك بتصين فى التوكيل يرد يقولى العربية ممشيتش علشان تعمل صيانة اصلا
بسالة هى عاملة كام كيلو يرد يقولى 26000 فبقولة دة كدة المفروض عملت 6 صيانات
قالى حضرتك واخد فكرة غلط عن العربيات الالمانى العربيات الالمانى مبتتصينش اصلا !!!!!!!!!!!!!!!!
فبقولة امال الزيت والسيور والفلاتر دول اية سكت وراح قايلى اه بغيرهم طبعا
قلتلة شكرا فبيقولى ياريت تلحقها لان كل شوية حد يسال عليها وممكن متلحقهاش
مرة زمان كنت بادور على عربية وشفت عربيه شاهين عند واحد تاجر عربيات في العباسية .... وكان كاتب في الاعلان استخدام طبيب .... وروحت شفت العربية وعرفني على صاحبها اللي كان موجود بالصدفة علشان يسأل عن عربيته اتباعت ولا لسة .... اتفضل يا دكتور ....
وجه الدكتور وقعد شوية وسلم ومشي
المهم العربية ماعجبتنيش
وبعد كام يوم روحت لنفس التاجر في نفس المحل بتاعه علشان اسأل لو عنده عربيات تاني للبيع
ولقيت زوجتي عمالة تشدني من ايدي .... ايه يا ستي مالك .... قالتلي مش هو ده الدكتور بتاع العربية الاستعمال طبيب بتاعت الاسبوع اللي فات .؟؟؟؟؟؟؟
وهنا اكتشفت الحقيقة .... الاخ اللي كان عامل نفسه الدكتور .... موظف عند الحاج تاجر السيارات .... وكان ملبسه بدلة وعامل نفسه الدكتور .... استعمال طبيب بقى :ma:
لكن بصراحة قعدت اضحك انا ومراتي بأكتر من تمن العربية .... والعيادة بتاعت الدكتور كمان