الموضوع: و اخرتها ...... الهم ارحمنا ؟!

عادي جداً , الطريق الدائري انا بسميه السيرك , كل واحد بيمشي زي ما هو عايز و من اليمين للشمال و العكس , المهم يمشي في اي حته فاضية ,

انا بحاول اتبع قواعد المرور و بحاول اعمل حاجة تانية ,

اني ابقى هادي قدر الإمكان ........

المشاركة الأصلية كتبت بواسطة mmtronic

الاخوة الافاضل

انا حبيت اكتب الموضوع دة رغم انة اتكرر قبل كدة كتير - بس خلاص فاض بيا

موضوع سلوكياتنا فى القيادة - انا بجد خلاص مش قادر استحمل - انا مش عارف احنا وصلنا كدة ازاى

السواقة دلوقتى اصبحت عذاب - هوة احنا بنعمل فى بعض و فى نفسينا كدة لية

انا بحس ان الناس ماشية تنتقم من بعض فى الشارع - كرة عجيب لبعض و استهتار بحياة الناس و استهتار بممتلكاتهم من فئة مش قليلة - يا جماعة دى الشوارع كلها بقت مليانة من العالم دى - عارفيين لو كانو فئة قليلة كان الواحد استحمل بس المشكلة ان الناس بقت معظمها فى الشارع بالشكل الرهيب الى انتم اكيد عارفينة و بتشوفوة كل يوم و بالذات لو بتروح شغلك و بترجع بعربيتك

انا بكتب الموضوع دة و مش عارف اية اخريتها و الله انا دلوقتى كرهت النزول و كرهت السواقة و كرهت اشوف العالم دى

و اليك بعض المواقف الى تخليك تخرج عن شعورك و تفضل تسب و تلعن و لاحظ انا المواقف دى مش من واحد ولا اتنين دا تقريبا 70 % دلوقتى كدة الا من رحم ربى

انا و الله العظيم بحاول التزم بالقواعد و اصول القيادة تلاقى الناس بتبصلك كانك جاى من المريخ لا و ممكن الى يشوحلك و الى بتشوفة بيبرطم و الى ممكن يكبس عليك المهم انة يعدى و خلاص انشلة يخبطك او يخبط عربيتة مش مهم

و اليكم بعض من الكوابيس اليومية


1- تجاهل الاشارة سواء يمين او شمال و الاصرار على تخطيك و تسمع صوت الحرق من وراك علشان يعديك اول ما يشوف الاشارة

2- الى بيمسك الشمال و يمشى على مهلة و الكارثة انة بيعمل كدة و فى طريق سريع زى الدائرى او خلافة تديلة رعشة نور بكل ادب - و لا كانة شايفك - تديلة كلاكس علشان تعدى من الشمال زى القواعد ما بتقول يقوم مشوحلك - طب ما تمشى يا سيدى على اليمين و ليك كل الاحترام

3- و الباشا الى بردة بيمسك اليمين و يتكلم فى الموبيل و نفس الحوار السابق يحصل

4- الى يجى من اقصى اليمين و يكسر عليك علشان يخش شمال لا و يشتمك

5- و لا الى بقى بيمشو فى الشوارع و لا كانهم فى الفورميولا - يا جدعان اتقو الله فى الناس - انتم مش تعبانين فى فلوس العربيات دى - طيب اتقو الله فى الناس الى شارية عربياتها بالشقى و التعب

6- و لا بقى الى بيجى فى المعاكس باليل و انا بكون منور النور الواطى علشان اشوف قدامى و هوة كذلك - فيدينى عالى علشان اطفى النور بتاعى اقوم ارد عليه برعشة تبين انى مش منور العالى لكنى منور الواطى ميعجبوش و يصدر العالى - طيب ما انتا يا بنى ظلط منور نفس درجة النور الى انا منورها و مع ذلك انا عارف انة لازم علشان نشوف الطريق فى الضلمة


و اخريتها موقف حصل الناهردة - ماشى عى الاوتوستراد فى اتجاة طريق السويس و بعد النادى الاهلى اديت اشارة يمين علشان ادخل من جنب الكوبرى علشان اطلع على طريق السويس و الحتة هناك مكعبلة و ضلمة و طبعا امور من الامامير جاى من اليمين بسرعة جنونية انا حتى مشفتهوش راح مفرمل و كان حيلبس فيا طبعا راح طالع منى و منزنق عليا ( بلطجة ) قال بيخوفنى علشان معملش كدة تانى و راح راكن و كاسر عليا قال حينزل يقطعنى - عارفيين انا ساعيتها كنت فى قمة الغليان - قولت اقسم بالله لو رحت فية السجن ما حيهمنى- على الاقل حطلع غيظى فى واحد من الاشكال القزرة دى - رحت قالع النضارة و جيت انزل علشان اجيبة من قفاة راح جارى بالعربية ( طب دا اية دة حد يقولى حاجة قبل ما اتجنن ).

يا اخوانا لية ما نتقيش ربنا علشان ربنا يسترها معانا

اسف على الاطالة بس انا كنت خلاص حفرقع

السلام عليكم الاول بعده انا بحيك على الموضوع ده علشان بجد كان بيسببلى خنقه وشده اعصاب لاكن بجد دلوقتى بقيت بستريح بالسواقه بتاعت الميكروباصات يعنى والله حصل معايا موقف انهارده موقف فى شارع الهرم واحد معاه جيتا وفى نيو ترن عند المريوطيه وهو واخد الحاره الى فى النصف فقولت مش هيدخل مشيت وراه فجاه ادانى اشاره شمال ووقف فى الشارع علشان يدخل التين الى جنبه انا كابس فرامل للاخر علشان اقف لحد لما كنت هلبس فيه مكنش هاين عليه حتى يدخل قدام شويا فبجد فى ناس تخنقق وبعدين فى حكايه ان الواحد مش تعبان فى الفلوس ديه تعتبر حقيقه علشان انا شايف الاستهتار بتاع الشباب علشان بجد متعبناش فى حاجه لكن شايف لما الواحد يجيب سياره من امواله الخاصه هيحافظ عليها لدرجه انه ممكن يركنها فى القه عنده واسف على الاطاله

المشاركة الأصلية كتبت بواسطة akram

عادي جداً , الطريق الدائري انا بسميه السيرك , كل واحد بيمشي زي ما هو عايز و من اليمين للشمال و العكس , المهم يمشي في اي حته فاضية ,

انا بحاول اتبع قواعد المرور و بحاول اعمل حاجة تانية ,

اني ابقى هادي قدر الإمكان ........

فعلا الدائرى بقى عامل زى السيرك من يومين ماشى على الدائرى اتجاه الهرم من عند القاهره الجديده الاقى واحد بيرعشلى من على بعد كتير روحت مدى اشاره يمين وجيت فى الحاره التانيه القى الباشا جاى طاير ووراه عربيتين التلاته مش عارفلهم بيعملو سباق والا ايه باليل بجد ببقى قلقان وانا ماشى على الدائرى فربنا يسترها علينا جميعا

المشاركة الأصلية كتبت بواسطة M.Osman

انا حاسس ان انا اللي كاتب الموضوع ده

موضوع جميل وياريت الناس تاخد بلها من موضوع النور وبلزات لو نينون بلدي من غير عدسات وتلاقية مصدر العبيطة ومنور العالي وماشي عامي الناس في الجهة المقابلة ولا هامة يعمينا بيبقي نفسي في ار بي جي واديلو صاروخ في دماغة