ايه احسن ميني لاب توب في السوق؟

**tabeb** · 07-12-2010 09:02 AM

يا جماعة عايز اجيب ميني لاب توب في حدود 2500 بالمواصفات دي
-حجم الشاشة اكبر حجم في فئة الميني
-هارد ديسك مش اقل من 320
-رامات 2 ميجا
-الواي فاي بتاعه بيلقط كويس لان انا شغلي ع النت كتير جدا
-يكون مفيهوش مشاكل مع usb modem
-كارت الصوت والسماعات الداخلية كويسين
-الgames ماليش فيها
-شغلي عليه عبارة عن انترنت وبرامج صوتية (بكثافة) وفيديوهات واوفيس
-اهم حاجة البطارية تكون بتقعد اكبر فترة ممكنة
-ياريت لو يكون عليه ويندوز 7

ياريت كمان يا جماعة افضل مكان اشتري منه خصوصا الضمان ميكونش فيه مشاكل

**beetleMOSH** · 07-12-2010 10:02 AM

مفيش غير ديل بالمواصفات دى
و انا كنت شوفت واحد فى شهر 7 او 8 و كان عامل برضه 2400 2300
فى السخاوى
بس مش فاكر الهارد كان 250 ولا 320

بس هو راماته ازيد من 1 جيجا
لان اللى اهارد بتاعه 160 و رامات 1 جيجا
كان ب 1800 1900

وده كان اغلى عشان الرامات و الهارد و البطاريه كانت 6 سيل

و المينى كله حجم الشاشه 10
و بصراحه ندمت انى مجبتش ديل
و الكلام ده فى السخاوى
شكله جامد و فيه الوان كتير

**eng/muhamad** · 07-12-2010 10:42 AM

شوف ده
Lenovo S12 12"
هيعجبك ان شاء الله

**LanCeLoT** · 07-12-2010 01:10 PM

انا كمان بدور عى حاجه زيك كده .. بس تكون شاشاه 12 .. لأني عندي واحد hP شاشه 12 .. بس البروسيسور 1.6 ونفسي اجيب واحد تاني زيه بس بروسيسور اعلى .. لان اللي معايا تقيل شويه ..

**د.محمود صلاح** · 07-12-2010 03:26 PM

هحكيلك على تجربتي ..

الأسبوع الماضي اشتريت ميني لابتوب HP mini 210-2070ee
في عمان هنا ثمنه حوالي 2300 ج

رام 2 جيجا
بروسيسور 1.83 أتوم - الأعلى في فئته -
320 جيجا هارد 7200 لفة مضاد للصدمات
جرافيكس 256 تؤخذ من الرام
واي لان وبلوتوث وكاميرا وكارد ريدر
3 فتحات يو اس بي
فتحة سلك اللان
كيبورد انيق وجميل وحروف مطبوعه عربي
وندوز 7 ستارتر - محدود الإمكانيات قليلا - أصلي بالطبع
شاشة 10.2 بوصة
كيباد مالتي تاتش رائع بمميزات جديدة ورائعة
البطارية 6 خلايا ويستمر عملها الى 10 ساعات - ولكن بالبرودباند مودم قول كده 5 ساعات بالراحة -
لونه وردي أنيق ووزنه 1420 ج
السماعات قويه جدا جدا كانك من لابتوب كبير وهي سوبر دولبي وهذا ما خلاني اشتريه لأن كل اللي معاه النوع ده من اللابتوب سوني أو اسيوس بيشتكي من ضعف الصوت .

فيه موديل - لم يكن موجود وقتها وليس ما هو اللي معي حاليا - فيه فتحة SIM برودباند موديم موتورولا , وبالطبع كده انت مش محتاج تشبك الجهاز بأي حاجة ..

عبقرية hp عاملين ريكفري براتيشن لاسترجاع ونودوز بالكامل بمجرد الضغط على F11

المروحة مزودة بخاصية dynamic cooling تزيد وتنقص سرعتها مع سرعة البروسيسور لزيادة عمر عمل البطارية

جهاز عملي جدا جدا وخفيف وصغير وكتكوت ومعاك في كل حته ويكفي اني بشحنه اول اليوم وبيفضل معايا اليوم كله شغال زي الموبايلات كده .. وشغال افلام بملئ الشاشة بصوت وصورة رائعة ومسلي جدا جدا جدا

العيوب .. مش مريح في تصفح النت للقراءة لصغر حجم الكلام والصفحة ..

بطيء نسبيا - بالمقارنة بالكور كواد او كور 5 - ولكن بصورة غير ملحوظة بشدة

**tabeb** · 07-12-2010 09:51 PM

شباب جزاكم الله خيرا علي الافادة
فعلا متشكر
دكتور محمود صلاح
بالنسبة لتصفح النت الموضوع limited اوي ولا معقول؟؟
وهل صغر الشاشة ده بيتعب العين؟
لو سمحتلي يا ريت تقوللي علي الموديل اللي بتقول عليه اللي نزل بعد جهازك؟
ويا ريت لو تعرف السعر هنا في مصر؟
وشكرا جزيلا

**tamatemo** · 08-12-2010 01:57 PM

بص انا دلوقتي بدور علي نت بوك او ميني لاب زي ما بتقول

قدامي اختيار من اتنين

hp 210-1011 : Intel atom n450, 1.66ghz, 2gb, hdd 250gb 10.1", webcam, bluetooth, windows 7 starter (blue / red)

وفيه دا

dell 1018: Atom n455, 1.66ghz, 2gb, hd250, 10.1" wxga webcam, w.lan, bluetooth, 3usb, card reader,1.2kgm, win 7starter black, blue, red, pink

الاول ب 2000 والتاني ب 2200

ال Asus انا سالت عليه
1جيجا رام وهارد 160 كان عامل 1800 تقريبا

**kar!m** · 08-12-2010 02:28 PM

انا لسه شارى Lenovo S10-3t من الامارات .. البروسيسور الجديد N475 و هارد 250 و رامات 2 جيجا و فيه بلوتوث و كارد ريدر و 2 USB و Face recognition وويندوز 7 .. و جاى معاه هديه External DVD writer .

البروسيسور ده اخره 2 جيجا رام على فكره.

هو Tablet PC يعنى الشاشة بتلف و يكون زى الاى باد كده .. و اداءه كويس جدا كتصفح الانترنت و الاوفيس .. انما طبعا برامج تقيله انسى .. برضه من عيوبه ان سماعاته الخارجيه مش كويسه خالص.. انما الهيدفون كويس جدا.

بص لو انت مش فى حاجه ماسه انك تشترى حاجه صغيرة .. هات لابتوب عادى أحسن .. عشان كل ما تتصفى الانترنت متقعدش ت Scroll فوق و تحت .. انما أنا جبته عشان بقضى وقت كبير فى المواصلات.

**د.محمود صلاح** · 09-12-2010 12:16 PM

المشاركة الأصلية كتبت بواسطة tabeb

شباب جزاكم الله خيرا علي الافادة
فعلا متشكر
دكتور محمود صلاح
بالنسبة لتصفح النت الموضوع limited اوي ولا معقول؟؟
وهل صغر الشاشة ده بيتعب العين؟
لو سمحتلي يا ريت تقوللي علي الموديل اللي بتقول عليه اللي نزل بعد جهازك؟
ويا ريت لو تعرف السعر هنا في مصر؟
وشكرا جزيلا

الانترنت معقول مع اخفاء التاسك بار السفلي لا يوجد مواصفات اعلى من اللي اشتريته انا في الشرق الواسط - دبي- راجع جميع الأجهزة على النت قبل الشراء والأسعار متقاربة HP® - Holiday Deals on Laptops, Desktops, Printers, Servers and more