هو كاتب فلتر البنزين يا على باشا
فلتر الزيت رخيص سعره في بنزينة شل 30 جنيه وفي التويكل كانوا عاملين عليه تخفيض من فترة بـ 18 جنيه مش عارف العرض خلص ولا لسة .
لكن فلتر البنزين كان بـ 150 جنيه وواضح انهم خفضوه شوية بقى 131
هذا هو الفرق .
عرض للطباعة
انا عايز اقولكوا على تجربة حصلت معايا في موضوع المراكز المعتمدة دي . قولت استرخص برده واشوف حاجة جنب البيت بدل مشوار ابو رواش ده .
لقيت مركز خدمة في الرحاب اسمه كارفان وكنت عايز اغير تيل فرامل امامي وكان سعره في غبور 450 جنيه .
روحت كارفان وسالت انتوا فعلا مركز معتمد وكل حاجة عندكو هي اللى عند غبور وفي الضمان وكده ؟
طبعا قالي كل شيء زي مانا عايز وانهم هايختملي الضمان ومافيش فرق بينه وبين غبور خالص .
طيب يا عم بكام التيل قالي بـ 260 جنيه . قولتله ازاي ده في غبور اغلى من كده قالي هو هو نفس التيل وحضرتك هاتشوف التيل الجديد والتيل القديم لما نفكه ولو لقيت فرق قولي بلاش تركبه . قولت ماشي
المهم رفع العربية وفك التيل وجاب التيل الجديد في علبة هيونداي وكله تمام وجاب لقمة تيل قديم ولقمة من الجديد وحطهم على بعض وقالي في فرق؟
بصراحة مكانش في فرق يذكر يعني حوالى مثلا 5 مم اكبر او اصغر حاجة كده . قولتله اومال ازاي عندهم غالي ؟
قعد يرغى انهم لازم ياخدوا خصومات عشان يعرفوا يشتغلوا وان صاحب المركز ده واصل في غبور وعشان كده بياخد اسعار تانية وفضل يرغي يرغي لغاية لما ركبوا التيل ونزلوا العربية وبعدين فاجأني وقالي اصل الجيتز بيركب عليها التيل بتاع الفيرنا وبتاع الهيونداي اكسيل .
قولتله يعني ده بتاع الجيتز ولا لأ ؟ قالي ماهو الجيتز والفيرنا والاكسيل نفس التيل وقالي انهم في غبور بيسعروا كل عربية لوحدها حتى لو نفس قطعة الغيار والجيتز غالية شوية على اساس انها كوري يعني .
المهم اخدت العربية وانا مش مقتنع بكلامه لكن فرق الفلوس مخليني مش عارف اخد القرار السليم .
يويمن ولقيت التيل بيعمل صوت كده كل ماجي اقف . يعني مع الفرامل وانا ماشي عادي جدا لكن اول لما العربية تقف تلاقي صوت حكة جامده كده . بصراحة كسل مني مروحتش هناك تاني وعدى فترة كبيرة حوالى شهرين فقولت خلاص منا لو روحت هايقولي ده عدى شهرين وممكن يكون استخدامك وحش واكيد هاطلع انا اللى غلطان .
المهم روحت غبور في ميعاد الصيانة بقى بعديها بحوالى 4 شهور كده وقولت للمهندس على اللى حصل . قالي ارجعلهم تاني احنا مالناش دعوة .
قولتله ازاي دول مركز خدمة معتمد وانتوا اللى معتمدينه وواخد اسمكوا .
قالي كل اللى حضرتك بتقوله تمام لكن احنا بندربهم وبنديهم الاسم لكن مالناش عليهم رقابة يعني لو بوظوا حاجة في العربية هما المسئولين مش احنا وماينفعش ترجع لغبور في اي مشكلة تحصل من مراكز الخدمة دي .
والكلام اللى هو قالهلوك مظبوط ان تيل الجيتز والفيرنا والاكسيل نفس المقاس بس لكل عربية اللقمة بتاعتها المطابقة للطنبورة بتاعة العربية .
انا مش بقول ان كل مراكز الخدمة بالشكل ده بس انا قولت اعرفكم مسئولية غبور تجاه المراكز دي وان اكيد المراكز دي هدفها الاول هو الربح وده طبعا بييجي بالصيانة والخدمات .
لكن ياريت لو حد جرب مركز خدمة كويس ولقى هناك المعاملة كويسة وفي امانة يقولنا عليه
معلش طولت عليكم
يا جماعه محدش رد عليا انا عايز اركب سماعات للعربيه هل ده هيطلعنى من الضمان ولا ايه ؟؟؟ ارجوكم اى حد مجرب يقولى
رحت التوكيل النهرده علشان صوت الصفارة اللى مع الفرامل من الخلف و ظبتو كل حاجة عملو رجلاش و تشحيم و قالولى انها متعملهاش رجلاش من فترة كبيرة طبعا فترة ما كنت بروح كارافان و ظبتولى كمان السنتر كان فى باب بيعلق الخدمة اتغيرت للاحسن الحمد لله و ا\عاطف بجد شخصية محترمة جداااااااااااا و عامل شغل جامد فى الصيانة هناك
والله يا باشا انا معنديش فكرة عن الموضوع ده .
وبعدين المشكلة ان لازم اللى يرد يكون ركب عدة وراح التوكيل وعملوا معاه مشكلة بسبب العدة .
انت عايز رايي؟
اتوكل على الله وركب العدة لانها م هاتعمل مشكلة باذن الله انت مش اول واحد يركب كاسيت وسماعات . ده احنا يا ما لعبنا وركبنا عدد وسماعات والسلوك كانت بتضرب وبتلمس وعادي يعني
خليها على الله
ماهو المشكله ان التوكيل مقلقنى قلت اسأل الناس اللى مجربه و محدش قالى حاجه انا مش عايز غير واحد يكون مركب عده و لسه بيروح التوكيل
بالنسبة لموضوع الخروج من الضمان دة انا كمان عايز اركب sound system فى العربية بس واحد صاحبى معاه i10 قالى اعمل اى حاجة فى العربية برة التوكيل من ميكانيكا و رش و جنوط و كل دة الا اى حاجة فيها كهربا فى العربية يعنى لا تلعب فى الفوانيس و لا الكاسيت و لو المراية كهربه متلعبش فيها و كدة فانا مقلق زيك بالظبط ز
و بعدين هو اضلا الضمان فايدتة ايه اساسا لو لقدر الله حصل اى حاجة فى العربية هتروح عملها بتدفع تمنها يبقى فين الضمان دة لاكن اى حاجة فيها كهربا بيعملوا ببلاش لاكن اى حاجة تانية مهما بيخدوا حقهم تالت و متلت فيها ز
مش عارف دة رأيى و يمكن يكون غلط او صح لو حد يشارك معانا فى النقطة دى
بص تغير السماعات عادى و حتفضل فى الضمان الا اذا حصل حاجة فى العربية حيقولك من اللى انت عملتو هو السبب هى ديه المشكلة يعنى تلكيكة بقى
يعنى مش عارف اشكرك ازاى يا استاذ مادا على المجهود الى انت عملتة معايا بجد ربنا يكرمك
يا جماعة انا كنت محتار ما بين 3 عربيات منهم اتنين جيتس و استاذ مادا نزل معايا مشكورا و شافهم معايا و نقى ليا عربية منهم و كشف عليها بنفسة و رفعها فى بنزيمة بنفسة و اختار ليا عربية جتيس و مشكورا بجد عمل معايا الواجب لوجهة اللة شكرا جدااااا ليك يا باشا العربية زى الفل معايا
انا رحت التوكيل كشفت عليها لقتها زى الفل و متشكر كتير ليك .................
ايه يا جيتزاوية انتوا فين ؟؟؟؟؟؟؟؟؟؟
موجودين يا مادا بس مشاغل الحياه بقا
فى واحد وانا بسأل عند بتاع الكاسيت معاه جيتز و بيقوللى اوعى تركب سماعات فى الرف لأنه باظ عنده و بقا بيتهز و مش ثابت .. حد حصل معاه الحوار ده؟
السلام عليكم يا جيتزاويه
يمكن دي اول مشاركه ليا انا معايا جيتز 2011 فضي اوتومتك من غير فتحة سقف
الصراحه يا جماعه العربيه دي بسم الله ما شاء الله تحفه من كل النواحي مع ان في حاجات بتحصل كدا بس اكيد كل عربيه وليها شوية تكات كدا انا جايب العربيه من حوالي 3 شهور وحاولت اظبطها شويه يعني جيبت لمبة الاستوب اللي ورا بس كانت اخر واحده الصراحه طلعت عيني لاني جيبت الفانوس من مكان والكفر من مكان واللون بتاعه كان مختلف فرشيته وعلي فكره انا اللي ركبته الموضوع بسيط جدا سلكتين علي شريط لحام علي مسمارين وركب انما منظرها الصراحه بعد مركب كان جامد جدا
اما بقي بالنسبه للشبوره فانا جبتها من الحرفيين الفانوسين ب 400 والمفتاح ب 100 وكنت عاوز اركب فيهم زينون فجبت زينون 8000 كلفن ولما ركبته كانت الفاجعه لقيت زور الفانوس بيسيييييييييييح وبيدخن المهم يعني قعدت افنن واخترع انا والكهربائي وواحد زميلنا لغاية لما اتغلبنا علي المشكله وركب الفوجات بالزينون بس الشكل الصراحه يستاهل التعب اللي الواحد شافه
وبالنسبه بقا للصوت انا جيبت كاسيت سوني اكسبلود وجي ام وسمعتيين بيضاوي وركبتهم في الرف ورا وحتي الان مفيش اي هز او رجه وخليت سماعات الابواب زي ما هيا بس انا لما بشغل الجي ام مبسمعش غير صوت السماعات اللي ورا بس لاني جبتهم 500 وات كينوود والجي ام كينوود 300 وات بيخلو العربيه تترج وده متهيقلي كفايه قوي
فاضل بقي الجنوط انا حطيت جنوط 14 نفس المقاس وخليت الكاوتش القديم اولا حفاظا علي العفشه وثانيا استنفاعا بالكوتش لاني مكونتش ناوي اجيب كوتشات جديده
وبالنسبه للتفييم فانا عشان في اسيوط فالمرور عندنا غبي شويه فكبرت دماغي وحطيت ستاير شد علي الشبابيك اللي ورا وستاره شد علي الازاز اللي ورا بس مش هيركب غير 80 سنتي اكبر من كدا مش هينفع
ولان موضوع وحدت الرفع بتاع الازاز كان بيجنني لاني لازم ارفع كل الازاز قبل منزل وانا طبعا كنت بنسي فركبت وحدتين رفع بس اهم حاجه تركبهم عند واحد نظييييييف عشان فك وتركيب فرش الباب والسنتر وكدا ويعمل الضفيره بتاعتهم كويس
اخيرا بقي جيبتلها فرش جلد بس الصراحه كان غالي شويه لانه اتعمل تفصيل مخصوص لاني مكنش فيه حاجه علي نفس مقاس الكراسي واللون كنت عاوزه نفس اللون الاصلي كان 325 والتركيب 50 بس الشكل مش بطال واهم حاجه انه يحافظ علي الفرش الاصلي
انا طولت عليكم معلش بس والله كان نفسي اعمل المشاركه من زمان والحمد لله ان في رابطه لينا وفيها ناس زي العسل
وعموما بالنسبه لكل الحاجات الفنيه زي السخونه والرجه والزيت والسحب واقصي سرعه والخ............. فانا هجمع كل خبرة ال3 شهور واكتبها في مشاركه تانيه ان شاء الله
يا جماعة لو عايز اجيب الاستوب ؟؟؟ منييين ؟؟؟
و ايه طريقة التركيب و كدة و هيتكلف كام ؟
بص يا مهاب باشا
اولا السلام عليكم
ثانيا الاستوب ده متكون من فانوس وكفر بلاستيك وانا دورت عليهم كتير بره التوكيل ملقتش حاجه تمشي فروحت التوكيل اي نعم السعر كان خرافي علي حته فانوس وكفر بس انت بتركب حاجه اصلي وهتنساها وهتركب علي طول من غير اي اختراعات السعر كان 155 للفانوس والكفر ولما روحت اجيبهم من حوالي اسبوع كانو اخر قطعه معرفش جتلهم تاني ولا لا كان الفنوس في فرع وسط البلد اللي فظهر مبني الجمهوريه والكفر كان في الفرع بتاع شارع دمشق اللي فمصر الجديده عند بنك عوده
ثالثا التركيب سهل جدا
هتفتح شنطة العربيه وتشيل البلاستكه المستطيله اللي مغطيه مكان فتحات المسامير وتجيب الفانوس وتوصله سلكتين وتعديهم من الفتحه بتاعت خرطوم الرشاش اللي ورا وتمشيهم لغايه الفنوس اللي ورا يمين او شمال مش هتفرق وتفك الفانوس (يمين او شمال) وتوصل السلكتين علي الطرفين بتوع نور الفرامل (يعني دوس فرامل وشوف انهي لمبه بتنور ووصل علي الطرفين بتوعها)
وخلاص قفل الفانوس اللي ورا وبعدين قفل هوا كلهم مسمارين وبعدين قفل فانوس الاستوب فمكانه بمسمارين برده وبعدين حط الكفر هتلقيه بيركب كبس كدا وشكرا
يا رب اكون قدرت ارد علي كل استفساراتك
ايه يا جماعه انتو نمتو ولا ايه مش لاقي حد يعني؟؟؟؟؟؟؟؟؟؟
عاوزين نرجع تاني ونسال تاني اللي عنده استفسااااااااااااار يقول وربنا يقدرنا ونرد
Whynotانت كده تماااااام اوى انت كده خلتها عروسه بس انت كده وش بره الضمان و التوكيل متبرى منك اكيد بس بصراحه انت زى الفل . انا معماتش اى حاجه لسه غير فاميه بس ان شاء الله ناوى اركب سماعات بس مشكلتى فى اللى خوفنى من ان الرف بيبوظ و بيتهز مع الصوت و بيزن ممكن بقا اسألك انت لقيت فرش جلد نفس اللون ؟ اصل لو اللون يفرق حاجه بسيطه عن لون الباب هيبقا شكله وحش جدا .. و الصوت عندك ايه ظروفه مش محتاج صب ولا حاجه؟ ولا فى زنه ولا حاجه؟ و اى جديد عرفنا بقا
ربنا يعينك يا باشا ويقدرك على مشاغل الحياة اللى مش بتخلص دي .
انا في واحد اعرفه معاه جيتز ركب رف خشب ورا وحط عليه السماعات وطبعا ماتركبش في الرف الاصلي بتاع العربية عشان مايبوظش.
بس شغالة تمام ولا فيه رجة ولا حاجة . والرجة دي بتيجي من ان الرف مش متثبت كويس او في بوش لما بتقفل الشنطة ودي ليها 800 حل يعني .
اهلا بيك في النادي يا whynot ومنور معانا ان شاء الله .
والله انا فرحان ان في واحد قلبه جامد زيك انضم لينا عشان انا بحس ان معظم الناس بتخاف تلعب في العربية خصوصا لما بتكون لسة في الضمان وانا كنت واحد منهم برضه مكدبش عليك .
بس دلوقتي خلاص بقى عادي ممكن راكب حاجات وافك حاجات , مش بقيت بخاف اوي يعني .
ياريت لو تبعتلنا بقى شوية صور لعربيتك والجنوط والزينون والاستوب عشان نتفرج ياباشا .
وربنا يباركلك في العربية وتفضل زي الفل معاك على طول .
عم مادا مقدرش انشغل عنك دانا بقوللك على مشاغل الناس التانيه انما انا معاك يا معلم . و ان شاء الله هركب سماعات و جى ام و خلاص بقا بس لو العربيه خرجت من الضمان هاخد عربيتك ههههههههه
الاخ العزيز ahmed casper اولا بالنسبه للضمان فشغل الميكانيكا كله لسه في الضمان لاني مجيتش جمبه في حاجه اما بالنسبه للكهربا فطول منتا عارف انت بتعمل ايه في عربيتك وكل سلك جديد بتوصله عارف ممكن يروح فين ويجي منين فمتخفش وخصوصا اذا كنت بتعمل الكلام ده عند حد فاهم وواخد دورات علي العربيه لان الكهربائي اللي شغال معاه واخد دورات علي العربيه فان شاء الله مفيش مشاكل وبالنسبه للضمان فانا بعمل كيلومترات كتير وكدا كدا هعدي ال60 الف كيلو بسرعه فمش مشكله انا داخل علي ال10 الاف كيلو وربنا يسهل ويسترها
اما بالنسبه للصوت انا مركبتش رف خشب انا قطعت في الرف الاصلي وعموما حتي الان مفيش اي هزه ولا رجه بيبقي فيه زنه في السماعه نفسها ودي بتتظبط من ال جي ام وانا شايف ان العربيه مش محتاجه صب لانها ملمومه من جوه فالصوت بيبقي كويس جدا مع الجي ام بس
اما الفرش فانا عملته تفصيل واكدت علي اللي عمله انه يجيب اللون الازرق نفس درجة الجلد الازرق بتاع الفتيس والدركسيون والحمد لله طلع تقريبا هوا هوا لدرجة ان الناس اللي بتركب معايا ملحظتش اني ركبت الفرش من كتر ما هوا قريب جدا من اللون الاصلي
وبالنسبه للاسم انا اسمي زياد ممكن تقولي زيزو
يا رب اكون قدرت ارد علي كل اللي انت عاوزه
مهاب باشا
السلام عليكم
بالنسبه للفوجات الحمد لله شغالين تمام وزي مقلت علي الاسعار قبل كدا ومكانهم
بالنسبه للضمان فالطبيعي انهم يقولولك ان العربيه برا الضمان اذا لمستها انا عن نفسي قولت انا عاوز اعمل حاجه في العربيه يبقي اعملها وان شاء الله ربنا يسترها طالما انا عارف انا بعمل ايه وعند مين
وكدا كدا اللي بيعملهالتوكيل زي منتا بتعمله تمام عند واحد فاهم بس الفرق الفلوس طبعا في التوكيل بينفخو الواحد
مادا باشا العظـــــــــيم
انا الصراحه متابع كل تعليقاتك ومواضيعك من ايام الرابطه اللي الله يرحمها مش عارف راحت فين والاخت شيمو صاحبت الفكره برده مش عارف راحت فين
المهم انا اسمي زياد ويا ريت تقولي زيزو
وان شاء الله هصورها صور نضيفه كدا بس مستني استنضف مكان حلو كدا والنور فيه يكون كويس واظبط الصور وانزلها ان شاء الله
ايه يا جماعه هيا الرابطه مفيهاش غيرنا احنا الاربعه ولا ايه يا رب ناس تانيه معها جيتز تكون بتقرا الكلام وتشارك مش تقرا بس
زيزو باشا
انت طرحت حوار فعلا مفيد وهو موضوع الاسم ده لان اغلب الناس مش كاتبه اسمها الحقيقي ودي مشكلة ان الواحد يبقى ليه اصدقاء وبيكلمهم كل يوم ومش عارف اسمهم ايه .
انا اسمى احمد واتشرفت بيك وبكل اللى في الclub وياريت نقدر نساعد بعض فعلا ونتعلم من بعض .
انا عايز اقولك بقى ان انا ساكن في التجمع الخامس والنهاردة كان امطار جامدة اوي وهي بدات من امبارح والشوارع كلها مياه . ومشوار واحد بس على الدائري يخلي العربية كأنك لسة راجع من الرالي . انا بقى بعشق منظر العربية وهي عليها طين كلها والمساحات معلمة في الزجاج . انا قربت اوصل للمرحلة دي يعني مشوارين كمان كده بكرة ولا حاجة وهاتبقى وصلت للمرحلة اللى بحبها . مع ان مراتي وكل الناس بتقعد تقولي انت ليه سايبها كده بس هاعمل ايه بقى ؟ بحبها كده .
مع اني لسة غاسلها من يومين بالظبط والعربية من جوه فله .
هابقى اصورها جايز تعجبكوا . جايز
جايز
ايه يا مادا انت بترش العربيه طين بدل مط ولا ايه هههههههه طب لو عايز تطينها تعالالى طنطا و اديها وش التراب عندنا كتير و تراب البلاد الىى حولينا بتصب عندنا و شويه مطر و بتبقا لوووووز
يا جماعة انا لحد دلوقتى مشفتش واحد عامل tuning للجيتز فى مصر
هل محدش معتبرها عربية شبابية و الكل مركز فى السيفيك و الجولف و اللانسر و كدة ولا ايه الحكاية
اخر حاجة شفتها بيكون مركب جنط و مفيم العربية و لمات زرقة و خلاص
و الله هى مش نحتاجه حاجه انا اكتر عربيه شفتها كانت مفيمه و مركب سبويلر و جنوط و زينون و ستيكر صغير و والفوانيس الى ورا عدسات بصراحه مش محتاجه اكترمن كده . بس اللى انا نفسى اعرفه الواحد لو عايز يؤكب فلتر هواء رياضى اركبه فين ده الكبوت صغير جدا و مفيش مكان لأى حاجه
اعتقد عشان زي ماقلت قبل كده ان التعديلات بتتعمل في عربيات عدى عليها مثلا 10 سنين شغل عشان ماتضايقش لما تفك اكصدامتها ورفارفها وتنفخ وتوطي وتعمل عتب وتلعب في الكهرباء .
يعني كل ما العربية بتقدم قلبك بيقوى على انك تلعب فيها براحتك
لكن الجيتز تعتبر لسة جديدة برضه
الله يرحمك يا 128 . كانت ملكة التعديلات وتسقيط المواتير والعدد والتنفيخ وكله والله .
دلوقتي الواحد بيشوف منها عربية كل فين وفين
والله يا ابو حميد انا سالت واحد صحبي مركب فلتر برضه وبص على الكبوت عندي وقالي انه هايركب مكان الفلتر القديم بالظبط .
قال اني هافك الفلتر القديم بالعلبة بتاعته بالماسورة اللى داخلة لغاية جوه دي كلها وهاركب الفلتر الجديد في نفس المكان بالماسورة بتاعته الجديدة .
بس خلى بالك ده واحد صحبي . مش خبير يعني
ماهو المشكله لو شلت الفلتر الاصلى و ركبت الفلتر مكانه بظبط مش هيبقا اداء كويس لأنه هيبقا فوق الموتور و الهواء هيبقا سخن جدا يعنى يعتبر ملهاش لازمه انما كل اللى مركب بيمد ماسوره لحد مكان فاضى يقدر ياخد منه هواء بارد على قد مايقدر و ده صعب عندنا خالص