الموضوع: غربلة على السرعة البطيئة

إمبارح رحت أعمل ضبط زوايا فبتاع الزوايا قاللى إن فيه عجلة مرحلة 1.5 سنتيمتر عن المقابلة ليها وإن العربية محتاجة زرجينة بسيطة (على فكرة ده تانى واحد يقوللى نفس الكلام) فقلت له توكل على الله وقام بعمل الزرجينة مع الضبط على الكمبيوتر لغاية ما وصل لأحسن وضع فى الضبط وبعد كده طلعنا نجربها فكانت زى الفل .
بعد كده رجعنا الورشة واحنا راجعين لاحظ هو إن الكلمة اللى مكتوبة على الطارة جاية بالميل شوية فقاللى نعدلها وبدأ يفك الدركسيون ولكن نظرا لصعوبة الفك قاللى خلاص روح لكهربائى يفكها لك ويعدل الكلمة .
المشكلة بقى إنه كان عنيف جدا جدا فى فك الطارة وقعد يجيب الدركسيون لأقصى اليمين ثم لأقصى الشمال ويخبط على الطارة ويضرب عليها باتجاه الخارج لكن الطارة ماطلعتش أبدا فاضطر يربط المسمار بتاعها اللى فى النص ويقفل على كده

وبعدين وأنا ماشى (بعد العلقة دى) حسيت إن الطارة فيها غربلة بتظهر عند السرعات البطيئة لما باكون بأهدى لمطب مثلا باحس بالغربة دى
فهل المشكلة دى ترجع إلى عنف الصنايعى فى فتح الدركسيون ؟ ولا ترجع إلى العجل مثلا يكون عاوز يتظبط أو يتعمل له Rotation بعد ضبط الزوايا اللى تم ؟

أفيدونا بالله عليكم يا إخوانى