استفسارات بخصوص صيانة الالف للساجا (عاجل)

**blackbird** · 08-12-2010 08:43 PM

السلام عليكم

انا ان شاء الله حاعمل صيانة الالف للساجا السبت الجاى . وعندى شوية استفسارات :

1- انا سمعت ان الزيت اللى فى التوكيل نوعه توتال وان ده مش كويس وسمعت كتير فى المنتدى بيشكروا فى فيسكو . هل اشترى فيسكو 3000 ولا 5000 (ايهما انسب للساجا ولا مش فارقة ؟؟) وده اول مرة حا حط زيت فيها.
وانا مرة فى البنزينة بفوول بتاع البنزينة عملى كشف على الزيت وقالى الزيت ده زيت تليين بييجى مع العربية والمفروض انك تنزله اول 200 او 300 كيلو هل الكلام ده صح ولا لما اقعد بيه للالف عادى ؟؟

2- ايه اللى بيحصل فى صيانة الالف هل بس تربيط عفشة و تغير الزيت والفلتر ولا فى حاجات تانية ؟؟

3- تكلفة صيانة الالف كام ؟؟

4- لو حبيت بعد كده اربط العفشة لان زى مانتو عارفين شوارع مصر عاملة ازاى :) هل اروح برضه للتوكيل ولا ممكن اعملها بره ؟ و اعملها كل كام كيلو ؟؟ وتكلفتها كام تقريبا ؟؟

5- امتى بغير باقية الزيوت (زيت الباور و الفرامل ) ؟؟

متشكر جدا

**Ayman_52** · 08-12-2010 08:55 PM

-:: وعليكم السلام ورحمـة الله وبركاته ::-

الف الف مبروك على صيانــة الـ 1000 , وعقبال صيانـة الـ 100,000 فى الخير -ان شاء الله-

بخصوص صيانه الـ 1000

1- مادام ناوى تعملها فى فرع ابو رواش يبقى لازم تحجز عالتليفون عشان الزحمه على رقم -0117872000- .

2- التوكيل بيستعمل زيت توتال ... وفيسكو زيت تجربة الناس ليه ايجابيه , بس خليك فى زيت التوكيل فى الاول (عشان حتى لما تغير تحس بالفرق بينهم) ... وموضوع زيت التلين دا فكك مادام التوكيل بيقول على صيانه الـ 1000 يبقى هما ادرى بعربياتهم وزيوتهم .

3- اللى بيحصل فى صيانه الـ 1000 , تغيير زيت الـ 1000 بـ 5000 او 10,000 (حسب رغبة العميل) ... تربيط عفشه , تشيك كامل عالسياره , لو عندك اى ملاحظات اخرى .

4- التكلفه حوالى 160 : 180 جنيه .

5- بخصوص تربيط العفشه ... لو انت بتعمل صيانتك كل 5000 , مش محتاج تربط لان كل صيانه التوكيل بيضبط الموضوع ده لو محتاجه .

6- بقية الزيوت والمياه , فى صيانة الـ 40,000 -ان شاء الله- .

الف الف مبروك على صيانه الـ 1000 , و -ان شاء الله- يكون يوم جميل وهادى

تحيــــــــــــاتــى

**sayed911** · 08-12-2010 09:14 PM

بالطبع لا تعديل بعد اجابات اخي ايمن ولكن بعد الإضافات التي قد تساعد حضرتك بصراحة ها تكون مفيدة ليك ...

بالنسبة للصيانة انا بنصحك خليك في العجوزة انا رحت هناك 9 كنت ماشي 11 بالضبط ساعتين بالضبط وكانت العربية خلصانة وكل ملاحظاتي اتعملت وتم عمل كل شئ من الألف الى الياء ....

بالنسبة لتكلفة الصيانة بالضبط كانت 192.50 le تفاصيلهم مش حضراني حاليا للأسف ولكن هيا كانت الغالبية العظمة للزيت كانت حوالي 147 وتقريبا 17 جنيه ونصف مصنعية والباقي فلتر زيت وحاجة كمان بس ايه مش قادر اتذكر ..

وبالنسبة للزيوت زي ما قالك الأستاذ ايمن خليك احسنلك مع التوكيل عشان يبقى كل حاجة على بينة وتوتال على فكرة ممتاز وبيستخدم في الأعمال الشاقة في الخليج هوة و فيسكو و شل .... ونصيحة روح بدري لو حضرتك مستعجل ... ومتقلقش كل حاجة حضرتك بتطلبها بتتعمل ان شاء الله والله الموفق واي استفسارات اخرى انا موجود ان شاء الله وصحيح لو حضرتك حبيت تجيب الزيت بتاع حضرتك معاك هات 4 لتر عشان هيتم تغير الفلتر كمان وده ها ياخد حوالي نصف لتر يعني الإجمالي للسيارة حوالي 3.5 لتر ...