من الرحاب لميدان رمسيس

**abo_lamar** · 09-12-2010 06:05 AM

السلام عليكم يا شباب
عايز اعرف الطريق من الرحاب لغاية ميدان رمسيس عند سوق التوفيقية ازاي ؟
وشكــــــــــــراً

**mahmoud_magdy** · 09-12-2010 06:41 AM

طريق القاهره السويس اتجاه القاهره طبعا
وهتفضل مكمل علطول لحد ما توصل صلاح سالم (متنزلش النفق) وادخل صلاح سالم (يمين)
وتاخد اول يو تيرن (قريب جدا) هتمشي في اتجاه العباسيه وتدخل العباسيه (ادخل يمين الكوبري وعدي خط السكه الحديد) وبعد كدا اطلع الكوبري وافضل ماشي علطووووووول لحد ما توصل الميدان
ومن هناك انا معرفش فين التوفيقيه ممكن تسأل

طريق اخر : بعد ما تمشي في صلاح سالم وتاخد اليوتيرن هتفضل مكمل علطول وتطلع اول كوبري (وعلى ما اعتقد تاني كوبري مش فاكر) وتنزل نفق الازهر بعد ما تخلص النفق ادخل يمين (امشي براحه بعد ما تخلص النفق الناس هناك واكلين فول 24 ساعه وهتحس ان كلهم قرفانين من الدنيا) وبعد كدا شمال هتلاقي بنك فيصل على يمينك امشي علطوووووووول (في اشارات ومش فاكر اسم الشارع ده ايه بس هو مشهور يعني حاجه كدا يوليو باين) هتلاقي اخر الشارع المحكمه (مبنى كبير وهيبان من اول الشارع)
اول ما تعدي العبد (على شمالك) اسأل والف مين يدلك (خد بالك من اليفط اللي على الشوارع عشان متدخلش عكس)

ملحوظات:
القاهره السويس بتفضل ماشي فيه علطول اتجاه مصر الجديده بتعديي الدائري وطريق المطار وبعد كدا مدينة نصر وبعد كدا مصر الجديده
لحد ما توصل صلاح سالم (تاني مره بقول متنزلش النفق وادخل يمين عشان تدخل صلاح سالم)

ملحوظه : الطريق التاني اسهل بكتير
ملحوظه اخرى : ركز على الكلام اللي بين الاقواس كويس

يارب تكون فهمت حاجه من الشرح ده حضرتك
عشان انا مش فاهم ههههههههههه
شكرا ليك

**abo_lamar** · 09-12-2010 07:29 AM

لأ فهمت وشكرا يا باشا

**moroeminem** · 09-12-2010 12:53 PM

متاسف يجماعة انى هكتب الوضوع بتاعى هنا بس انا كل ما اضغط موضوع جديد ميظهرش حاجة

انا عايز اروح شركة وصلة اللى فى الحى العاشر وده عنوانها
26 شارع محمد متولى الشعراوى

وده العنوان من على موقع الشركة

Mostafa El Nahas St. Extension, 26A EL-Sheikh Mohamed Metwaly EL-Shaarawy St.
10th quarter Nasr City, Cairo, EGYPT.

ياريت يجماعة حد يقولى لو انا ركبت تاكسى من موقف السلام اقوله ينزلنى فين بالضبط علشان ابقى قدام الشركة
ياريت تقولوى حاجة معروفة علشا السواق ميوديش حته غلط