الموضوع: كل ماتريد معرفتة عن تعليق السيفيك وكيفية تظبيطها

طبعا كلنا عارفين ان كتير اوى مننا مش بيعمل صيانة الهوندا عند فنى متخصص بيبقى راجع لظروف المكان او عدم وجود وقت كافى

وطبعا مع شوارعنا الجميلة بتلاقى العفشة بتبدأ تدب مع اى نقرة او مطب وتروح تغير وتعمل وفى الاخر نفس الموال

فى الموضوع دة ان شاء الله هقول فية عن كيفية تظبيط العفشة واية اللى محتاج يتغير عشان ترجع العفشة زى ماكانت

اولا : العفشة الامامية :

مكوناتها :

تتكون العفشة الامامية للجنب الواحد :

1: علبة دركسيون( جريدة مسننة وبنيون )
2: تيش
3: مقص علوى واخر سفلى
4 : 4 كاوتش ميزان
5: كوبلن خارجى وداخلى مع اكس توصيل ( لة مقاس معين لكل سيارة حسب نوع الماتور )
6: طنبورة ديسك امامى
7: مساعد + سوستة + بطاحة
8: بيض شمعدان
9: شمعدان
10: بلية طنبورة
11: 3 كاوتشات تراب

ودية صورة لاجزاء العفشة الامامية

كيفية تظبيط العفشة والعيوب :

دلوقتى هقوم بتحليل كل نوع فى العفشة الامامية واعراضة لما يبدأ يبوظ وسعرها جديد واستيراد حسب الترتيب بالاعلى :

1: علبة الدركسيون :( الاسكاترة )

علبة الدركسيون من اهم المكونات اللى بتكون موجودة فى العفشة لانها لو بايظة وكل عفشتك سليمة هتحس كأنك راكب مراجيح وتسمع تخبيط فى اى مطب

وعشان تتاكد ان علبة الدركسيون عندك سليمة :

1: هز الدركسيون وعينك على العجل لو لقيت مع اى حركة بسيطة للطارة الكاوتش بيتحرك يبقى كدة علبة الدركسيون سليمة ولا يوجد بها بوش ,غير كدة يبقى العلبة مبوشة ويلزملها طقم اصلاح

2: ممكن يكون العلبة مافيهاش بوش بس العلبة نفسها من جوة بدأت تروسها تتاكل وتضعف ودية بتبقى اسمها حشوة علبة الدركسيون وبتضطر تغيرها لما تسمع صوت خبط مع اى ارض غير ممهدة وغربلة فى الطارة وايضا بتحدث بعد سرعة 80 كيلو

- سعر علبة الدرسكيون جديدة نوع واحد لكل الفئات الEX,SI,SIR

4200 جنية جديدة , 1100 جنية استيراد لا يوجد منها غير ذلك

2: التيش :

التيش عبارة عن زراع صغير فى اولة صامولة تلف فى العمود الصلب الخارج من علبة الدركسيون واخرة بلية بعمود صغير

ودة لما بيبوظ بتحس بصوت خبط فى العجلة نفسها اللى بيبقى التيش بتاعها بايظ , دة غير ان التوجية بيبقى خفيف جدا لما تيجى تكسر شمال مثلا , وعلى السرعات العالية فوق ال 100 مثلا بتلاقى العربية خفيفة فى التوجيهة
السعر : تمنها استيراد 80 جنية للواحدة مافيش منها جديد على ماعتقد

3: المقص العلوى والمقص السفلى :

اولا المقص العلوى : بيكون على شكل مثلث فى الجنبين الخلفيين فى كاوتشة محكمة جدا , وفى اول المثلث بلية بعمود صغير بيتم تركيبة فى الجنب المخصص لية وبيكون مكانة امام المساعد من الاعلى

لو عايز تعرف اذا كان كويس ولأ بتخرج المقص دة بتشوف مدى احكام البلية الامامية , ثانيا : بتمسك المقص تحاول تتنى الجنب الخلفى لو رجع لوحدة يبقى كدة تمام لكن لو فضل على الوضع اللى انت سيبتة علية يبقى لابد من تبديلة
عيوبة بيخلى العربية مايلة شوية من قدام , مع النزول من المطب بيعمل صوت تزييق وخبطة بسيطة
السعر : 100 جنية استيراد للواحد والاتنين 150 جنية

* المقص السفلى : ودة عبارة عن عمود فى اخرة كاوتشة وفى اولة كاوتشة يجب ان تكون سليمة والا هتحس بأى مطب دة غير عومان العربية
والمقص دة بيتوصل بالشمعدان وواصل باجنب العربية

السعر : 150 جنية للمقص الواحد او 130 جنية على حسب استيراد ( يفضل )

السعر جديد تايوانى : الاتنين 180 جنية ( غير مستحب )

4 : كاوتش الميزان :

كاوتش الميزان من اهم العناصر الاساسية فى ظبط السيارة لانة بيتكون فى الجنب الواحد من 4 كاوتشات وبيتم استخدامة فى الفصل مابين اجزاء العفشة وبيركب على حاجة اسمها اطباق + مسمار الميزان

عيوبة بتلاقى العفشة خفيفة مع مطبات الهواء بالذات

السعر : RBI تايلندى 70 جنية للجنبين لا يوجد استيراد او اصلى

5 : الكبالن:

اولا : الكوبلن الخارجى ( راس الكوبلن ) :

رأس الكوبلن الخارجى دية اللى بتنقل الحركة الى العجل من الفتيس وبتمشى فى حركات امامية وخلفية وعلوية وسفلية وبتتكون من مجموعة من البلى

واعراضها انك لما تيجى تكسر شمال او يمين بتسمع صوت زى طقطقة ودة معناة ان مكان البلى بدأ يبقى فية بوش ومابقاش محكم
ولازم يتغير عشان مع الوقت ممكن يفرك ويؤدى الى كسر الكوبلن

العيب الثانى ممكن يكون مجرى بلى الكوبلن نفسة بقى خفيف فيسبب رعشة اثناء السرعات او عدم احكام دقة التوجية عند الدخول فى المنحنيات الخفيفة

سعر الكوبلن الخارجى للواحد : 280 جنية بالنسبة للSI ,SIR
225 جنية بالنسبة للEX

- الكوبلن الداخلى : الكوبلن الداخلى مهم جدا حيث يتكون من جسم الكوبلن + 3 صلايب فى احدى الجنبين تكون مربعة وفى الجنب الاخر وهو الايمن تكون صلايب دائرية

وهذا الكوبلن يتحرك فقط فى اتجاهين امامى وخلفى فقط وعمرة طويل

ومشاكل الكوبلن دة تظهر بوجود صوت خبط حديد×حديد اثناء التحرك الى الامام او الخلف , او عند الدخول فى ارض غير ممهدة

امتى تعرف انة بايظ : الكوبلن بيطلع بيتم الكشف على ال 3 صلايب لو لقيت الصليبة خفيفة او مبوشة بيتم تغيرها

نيجى لجسم الكوبلن نفسة واسمة عند الفنيين ( القلة ) :

بيتم الكشف عليها عن طريق تمرير الاصبع على المجرى اللى بيتم تركيب الصليبة فيه للبحث عن ريجة او تأكل فى المجرى نفسة لو بقيت الكلام دة يبقى يتغير فورا عشان يمنع صوت الخبط

سعر الكوبلن الداخلى كامل 150 جنية , سعر الصليبة الواحدة اصلى 30 جنية

- الاكس : ( عمود التوصيل ):

الاكس دة مهم جدا لانة اللى بيقوم بربط الكوبلن الداخلى بالكوبلن الخارجى وتثبيتهم فى الفتيس لاتمام عملية نقل الحركة

والاكس دة بيبقى فية جزء مشرشر لازم يكون سليم فى نهايتة واولة
لازم يكون مش واخد خبطة او مش معوج عشان مايتسببش فى رعشة

الاهم بقى لازم يكون نفس المقاس وكل ماتور ولية المقاس الخاص بية , ولازم يكون فية 5 ملى بوش فى كل ناحية لضمان سلاسة فى الاداء وعدم حدوث رعشة

الاكس مش بيجى لوحدة لازم يكون معاة كوبلن خارجى وداخلى

سعر الاكس كامل بالكبالن فى التوكيل : 4200 جنية , استيراد : 350 جنية

6 : الطنابير :

طبعا الطنابير مهمة جدا لانها دية اللى بيتركب فيها العجلة ولازم تكون مظبوطة ولا يوجد بها ريجة
واى تلف بيؤدى الى رعشة على السرعات , رجة مع الفرامل بعد سرعة 80 كم , عدم ثبات بدال الفرامل اثناء الضغط علية

سعر الطنبورة اصلى 600 جنية للواحدة

استيراد : 300 جنية جنبين

جديدة : يابانى : 450 جنية , المانى 250 جنية

7: المساعدين والسوستة والبطاحة :

المساعد من اهم العناصر الاساسية فى العفشة لانة بيخلى العربية ماتميلش جامد لو بتاخد ملف , بتحافظ جدا على شاسية العربية , نعومة وراحة عند المطبات غير كدة يبقى المساعد بايظ

السوستة بتبقى هية اللى رافعة العربية وبتخفف الحمل عن المساعد + تخفيف الاحساس بالمطب

فلو لقيت جنب اوطى من جنب يبقى كدة السوستة ودعت

البطاحة : بتبقى راكبة فوق المساعد ومتصلة بجسم السيارة وعبارة عن كاوتشة ورولمان بلى بيخلى المساعد يلف مع كسر العجل سواء يمين او شمال

فلما تسمع صوت تزييقة فى الكسرات اكشف عليهم

8 : بيض الشمعدان

بيض الشمعدان بيبقى متركب على طرف الشمعدان نفسة ناحية الخارج وبيبقى راكب علية الجنب بتاع السيارة

لو البيضة دية باظت بتسمع صوت خبط وانت ماشى على ارض غير ممهدة وخبط مع الطلعة

سعر الواحدة استيراد 80 جنية

9: الشمعدان :

الشمعدان دة اللى بيكون متوصل بشاسية السيارة وشايل العفشة كلها

ودة بيبقى عامل زى المثلث وفية كاوتش فى اخر الطرف والبلية اللى اتكلمنا عليها

10 :بلية الطنبورة :

طبعا عارفين ان بلية الطنابير مهمة جدا لانها بتقوم بتنعيم حركة السيارة

والبلية دية موجودة داخل السرة اللى بيبقى فيها مسامير العجل

وعشان تتجرب بيتم وضع السيارة على جهاز الموتسيكل ويقوم هذا الجهاز بتدوير العجلة سريعا ثم البدأ فى سماع اذا كانت البلية اصبحت خشنة او تصدر صوتا عالى مع سرعة الدوران

ويتم تغير البلية عن طريق وضعها على مكبس لازم وإلا هتفرك

وسعرها استيراد الواحدة 150 جنية بالسرة

11: اخيرا كاوتشات التراب :

يوجد فى كل جنب 3 كاوتشات للتراب

اتنين للكبالن وواحدة لعلبة الاسكاترا

الكاوتش دة مهم جدا عشان لو مقطوع او اى حاجة بيدخل تراب للكوبلن او لحشو العلبة وبيؤدى الى تلفهم بسرعة جدا

سعر الكاوتشة جديدة اصلى 30 جنية , تايوانى 15 جنية

دية كانت العفشة الامامية

نيجى بقى للعفشة الخلفية:

تتكون العفشة الخلفية من عفشة مستقلة للجنبين وروابط متعددة الوصلات:

1: جلبتين ركب
2: كاوتشات ميزان
3: شدادين
4: مساعد + سوستة
5: مقصين خلفيين

اولا : جلب الركب :

ودية بتركب عند اخر الركبة الخلفية ومهمة جدا وبتفرق جامد اوى فى ثبات العربية , وراحتها فى المطبات وعدم الاحساس بالمطب , على فكرة بتعلى العربية لما بتكون سليمة , وبتخلى العربية ماتهبطش اوى حتة مع التحميل

سعرها اصلى للواحدة 250 جنية , تايلندى 180 جنية , تايوانى 170 جنية

ثانيا : كاوتشات الميزان :

ودية مهمة جدا فى راحة العربية واتزانها على الطريق مع السرعات

وسعر الكاوتش 100 جنية اصلى للواحدة , وتايوانى 90 جنية للاتنين

ثالثا : الشداد:

ودة بيكون ماسك جسم العربية بالجنب الخلفى وبيتكون من كاوتشتين من اعلى واسفل

سعر الشداد اصلى 220 جنية للواحد
سعر الشداد تايوانى 90 جنية للواحد
سعر الشداد استيراد الواحد ب75 جنية

بالنسبة للمساعد والمقص نفس الكلام هينطبق فى العفشة الامامية على العفشة الخلفية وتم شرحها مسبقا فى الاعلى

فى النهاية اشياء مهمة عشان تظبط العفشة :

1: تغير كاوتش الميزان كل سنة او كل 15000 كيلو

2: الكشف على الكبالن

3: تغير مايلزم من كاوتشات او جلب لضمان صلاحية باقى الاجزاء

للحفاظ على الكبالن :

1: بالنسبة للناقل المانيوال يتم الضغط على بدال الدبرياج عند الدخول فى المنعطفات الحادة ( الاتوماتيك يجيب الوضع على الN ثم الرجوع للD4 مرة اخرى

2: الاهتمام بابقاء كاوتشة التراب الخاصة بالكبالن سليمة والكشف عليها دائما

3: عدم الضغط على البنزين بشدة فى المنعطفات , او الانعطاف بسرعة

4: طبعا الامركة , والخمسات بيدمروها

يارب يكون الموضوع عجبكوا ويكون مفيد ليكوا