الموضوع: تقرير عن رحلة صيد بالعين السخنة

السلام عليكم ورحمة الله وبركاته
في جلسة ما ......احد اصدقاء والدي هاوي غطس وسلاح وحاجات من دي وكلمنا انه مرة راح يصطاد رجع بحوالى 300ك فيليه الموضوع سخن في دماغي و اقترح علينا القيام برحلة صيد و تأجير قارب اتفقنا علي ميعاد الذهاب وحضرنا الشنط وكنا حوالى 15 فرد مشينا بليل بعد العشاء وأول مرة استخدم طريق العين السخنة.....الصراحة اول مرة امشي علي طريق بالحلاوة دي والعداد تقريبا مكانش بينزل عن 160:140كم تقريبا ومكنت بوصل لسرعة 180ك براحة تامة ومع ان الطريق كان مضلم بس برضه مكانش فيه خوف او قلق من اي شيء وجربت امشي في الضلمة دي وانا مطفي الأنوار...كان الصراحة احساس ممتع ومثير اوي
وصلنا بليل وبيتنا في شاليه خاص بأحد الأصدقاء واتحركنا بعد الفجر
المفروض اننا كنا نجيب معانا سنارات بس صديق الوالد قاللنا انتم مش هتحتاجوا الكلام ده كفاية خيط يكون فيه الطعم والسمكة هتطلع علي طول....والطعم اللى كان معانا كان عبارة عن سبيط وجمبري ماركة سوق العبور
اليخت كان محجوز قبلها بحوالى 3 ايام من المرسي اللى امام بورتو السخنة ركبنا اليخت واخذنا وقت عمال ما التصاريح والأجراءات خلصت وابتدت الرحلة
يوم مشمس وجميل وقعدة اجمل علي سطع اليخت
ابتدينا في الصيد وجهزنا الخيوط وكان فيه ناس معاها سنارات
كل واحد رمي الطعم بتاعه اول واحد طلع سمكة في حجم البلطي بس ملونة وشكلها جميل اوي استبشرنا وهللنا وكبرنا علي هذه السمكة وافتكرنا اننا هنرجع وال3 ايس بوكس اللى معانا هنحتاج فوقيهم تاني
ووصلنا لمعدل عالمي في الصيد وهو الصيد بسرعة سمكة/ساعة 15 فرد طوال اليوم ما طلعوش غير سمكة نتصور جنبها وسمكة كاليماري كانت الصراحة تحفة و3-4 سمكات شبه السردين بس علي كبير شوية
وطول اليوم ننزل الجمبري كطعم يرجعلنا الفارغ بتاعه كقشر للجمبري
الرحلة كانت ممتعة وممكن تنفع مقابلة شبابية جميلة خاصة انه كل ما العدد ما يكتر تكاليف تأجير اليخت تقل لأن ايجاره مرتفع جدا ويفضل ان اي رحلة للصيد ما تكونش قبل شهر 4

المشاركة الأصلية كتبت بواسطة ameerahmad

ممكن تفاصيل أكتر عن الاجراءات

هو اللى بيحصل ان بيبقي فيه واحد من المخابرات او حرس الحدود بييجي ياخد بيانات الأشخاص اللى علي اليخت ويطابق العدد الموجود بالعدد المثبت برخصة اليخت كان فيه عندنا مشكلة ان اليخت مرخص لتسع افراد بس معرفش ازاي وحليناها بالعافية شوية اهم حاجة وانت رايح تحجز تتأكد من العدد المرخص له اليخت علشان ممكن تلاقي بتوع حرس الحدود يرخموا معاك وينزلوا حد منكم.

المشاركة الأصلية كتبت بواسطة eng/muhamad

طيب اليخت ده انت اللى بتسوقه و لا بيطلع معاك حد بيعرف يسوق و لا ايه النظام
عشان نفسى فى الموضوع ده اوووووووووى بس اكون لوحدى على اليخت

بيطلع معاك طقم كامل السائق و2 بيخدموك معاه بس مش هتحس بأي متعة لو طلعت لوحدك.