البطارية ماتت

**احمد ابراهيم** · 12-12-2010 10:35 AM

السلام عليكم
النهارده نازل ادور العربية لقيت البطارية مبرقة عنيها و مطلعة لسانها و مريلة على نفسها و كل ما اجى ادور مش عايزة تنطق
قولت عليه العوض و منه العوض و البقاء لله

السؤال بقى انا عربيتى لانوس هاف اوبشن و انا زودت عليها زجاج كهرباء و قويت النور و كتاوت و لمبات اقوى
لما اجى اشترى بطارية اجيبها كام يعنى 55 و لا 70 و لا كام لانى مش عارف فى القصة دى

تحياتى للجميع
احمد ابراهيم

**ahmedezzat78** · 12-12-2010 11:32 AM

أولا البقاء لله

الانوس الكامله أصلا بتنزل ببطاريه 55

بس لو ركبت 70 هيكون أحسن فى طول زمن التفريغ لو نسيت نور شغال أو زياده عدد مرات محاولات الدواره فى حاله الأعطال

فيه واحد مثلا بيشغل الكاسيت بالساعات و العربيه واقفه .... فى الحاله دى ال 70 أفضل

يعنى من الأخر كده حسب طبيعه استعمالك و كمان الميزانيه

**tarek_2005** · 12-12-2010 11:43 AM

ال 55 امبير كافية جداً
مع ملاحظة ارتفاع اسعار البطاريات اليومين دول
فيجب المقارنة بين العائد والتكلفة جيداً

مش لازم تشغل الكاسيت والعربية مبطلة فترات طويلة

**احمد ابراهيم** · 12-12-2010 02:30 PM

طيب حد يعرف الاسعار ايه بعد اذنكم ؟؟؟

**MASERATI** · 12-12-2010 03:11 PM

السلام عليكم و رحمة الله و بركاته

أنا أنصح سيادتك بالبطارية ال70 لأمبير الجافة .

أنا طول عمرى كنت بستخدم البطارية السايلة المعروفة دى و كانت بتقعد معايا سنتين بالظبط سواء فى عربية بيجو 505 أو شاهين 1400.

آخر مرة اشتريت للاتنين , البطارية الجافةAcDelco السعودى, و كانت أكتر من ممتازة و الحمد لله و ما شاء الله , لحد دلوقتى , معايا زى الفل, بتاع الشاهين بقالها سنتين و بتاع البيجو بقالها سنة و نص , حاجة لوز اللوز .

ربنا يوفقك و يكرمك و ياريت لما تشترى بطارية, تبقى تعرف أسعار الأنواع المختلفة كام و بالأمبيرات المختلفة و تقولنا , عشان نبقى عارفين الدنيا ماشية ازاى , اصل البطاريات دى بأت مجنونة أكتر من القوطة .

مازيراتى كواتروبورتيه