طيب يا باشمهندس ايه سبب ترطيب البوجيهات دة يا ترى انا عملت حاجة غلط
البوجيهات لسه جديدة مغيراها من اسبوعين اعمل ايه علشان مايحصلش تانى؟؟؟؟؟؟؟؟؟؟
عرض للطباعة
طيب يا باشمهندس ايه سبب ترطيب البوجيهات دة يا ترى انا عملت حاجة غلط
البوجيهات لسه جديدة مغيراها من اسبوعين اعمل ايه علشان مايحصلش تانى؟؟؟؟؟؟؟؟؟؟
انا هغير الفلاتر علشان شوفت الباشمهندس سبعاوى مغيرها فى صيانة الـ20000 وانا عربيتى دلوقتى 19800 بالظبط فحتى لو مش محتاجة دلوقتى يبقى هتحتاج بعد فترة صغيرة وانا عايزة اخلص
دة غير انى هغير الزيت فهغير معاه فلتر الزيت
ولما اروح للميكانيكى هخلية يشوف الابلاتين والكوندنسر كمان (بردة علشان شوفت الباشمهندس سبعاوى مغيرها فى صيانة الـ20000 ) وكمان يشيك على الموبينه وباقى الحاجات الى ممكن تخليها تقف تانى
بصراحة انا مش حمل عطلة تانية وربنا يعلم الاسبوع دة عدى على ازاى
والله يا اختي العزيزه من الاول قلتلك ان البوجيهات مرطبه وصدقيني العربية مش محتاجه حاجه من تغيير فلاتر
هوا بس بشمهندس سبعاوي غير حاجات كتير مش في وقتها
كل اللي حضرتك محتاجاه ان البطاريه السيئه دي تتبدل بواحده تانيه وتنظفي الكربيراتير وخلص الموضوع
ارجعو لكتالوج العربية وشوفو ايه اللي بيتغير وامتى يتغير
فلتر الهوا كل 40 ألف لو المنطقه نظيفه ويعاد تنظيفه كل 5 آلاف كيلو اما لو شوارع متربة يغير كل 40 ألف ويعاد تنظيفه كل 2500 كيلو
فلتر البنزين كل 40 ألف كيلو (خلونا نقول اننا بنعبي تراب مش بنزين معتقدش يعني يتغير كل 10 آلاف كيلو)
البوجيهات تتنضف وتتصنفر وتظبط خلوصاتها كل 10 آلاف على ان يتم تغييرها بعد 20 ألف كيلو
تيل الفرامل طبعا حسب الاستخدام ولكن تيل الفبريكا مبيتغيرش مع الاستخدام الشاق على اقل من 25 ألف كيلو اطلاقا
في حاجات كده مبحبش امد ايدي فيها
الفبريكا فبريكا
فليه اغير حاجه مش في معادها عالفاضي؟؟؟
للمعلوميه
اول مجبت العربية قالولي فلتر البنزين غيره
وغيرته والعربية عامله 10 آلاف كيلو لاني كنت جاهل
وحاليا التغييره الجايه هرجع الفبريكا
ده كان نظيف
طبعا ممكن حد يشوفه من بره يقول ده معفن
مهو طبيعي يبان مطين من بره لانه اساسا موجود تحت جسم العربية
اغسله واتفرج عليه وشوف اللي في السوق وشوفه هتعرف الفرق بنفسك
ولذلك لا اقترح تغيير حاجات مش مفروض نغغيرها لان باختصار مفيش في السوق قطع غيار اصليه....
اما بالنسبه للزيت
انا جربت استخدمت زيت خواصه 10w 40 تخليقي وكان رائع
ونسبة البخر فيه قليله جدا دنا كملت بيه ال 10 آلاف كيلو وكنت مستحرم انزله من العربية حتى لانه كان كويس ونزلته من باب التغيير لاني كنت عايز اجرب الفيسكو
وقلت هنضف ب فيسكو 3000 والتغييره الجايه بإذن الله هحط فيسكو 5000 او هرجع للكالتكس اللي كنت بحطه لان تجربتي معاه رائعه
الفيسكو 3000 بعد ما حطيته صوت المكنه اعلى ومش ناعم زي مكان الكالتكس اللي بيعادل فيسكو 5000
وعليه
انصح اي حد هيغير من اي نوع انه يحط فيسكو 3000 وينزله على 5آلاف كيلو ويحط بعدها اما فيسكو 5000 او مايعادله
خصوصا في الشتا افضل حاجه للعربية هوا الفيسكو 5000
ده من واقع تجربه وللعلم بالشئ فقط
تحياتي للجميع وآسف لو كلامي تعارض مع كلام اي حد والله انا بتكلم عن تجربتي الخاصه واول عن آخر صلوا استخاره قبل عمل اي شئ لتجنب الندم فيما بعد,,,
اسمح لى اعلق على الكام جملة دول اذا اتسع صدرك لى
بالنسبة للحاجات اللى انا غيرتها فخيلنى اقول لك ان البوجيهات كانت طالعة محروقة بكل معنى الكلمة واصلا التوكيل بيغيرها على 20 ألف، والأبلاتين ملدع ولا زلت محتفظ به للذكرى برغم ان الكتالوج لا يذكر شئ عن موعد تغييره، وتيل الفرامل فاضل فيه 3 مم ومعتقدش انى محتاج استنى لما يجيب الحديد والزيت عمل ال 5 ألاف كيلومتر بتوعه والفلتر عمل ال 10 آلاف كيلومتر بتوعه، اما عن فلتر الهواء فكمية التراب اللى كانت فيه تردم مدينة مع العلم انى نضفته قيل كدة 30 مرات بالهواء المضغوط ومع كدة خلاص مسام الورق بتاعته اتسدت، وعموما فان تغيير هذه الأشياء قلل استهلاك البنزين فىالسيارة من 270 ك/ص الى 320 ك/ص يعنى ما مقداره وفر لى حوالى 6 جنيه فى كل تفويلة فاذا قلنا ان البوجيهات والأبلاتين والكوندنسر وفلتر الهواء ثمنهم72 جنيه فانا استعدت تمنهم بعد 12 تفويلة تقريبا وهستفيد بتوفيرهم باقى عمرهم مجانا، معتقدش ان المكسب دخ مالوش لازم، وللا ايه رأيك
بالنسبة للزيت انا استخدمت موبيل وان 10w-40 فى أول 10 آلاف كيومتر للسيارة، ومقدرش أقول كان رأئع لكن اقدر أقول كان مش بطال، نقص حوالى1/2 كيلو جرام فى ال 10 آلاف كيلومتر ونازل لزوجته اقل من المتوسطة، بعدها استخدمت شل الترا 5w-40 ، بكل المقاييس لا يصلح، مع ان مثلا كانت تجربتى معاه فى الصنى اكثر من ممتازة وافضل من موبيل وان، برضه اقول ان موبيل وان كان معظم استخدامة فى الشتاء مع ملاحظة ان المعامل الادنى له اعلى من شل اترا، اما شل الترا فقد خدم معى فى الربيع والصيف وشرب معايا سفريات اسكندرية وبورسعيد ومشاورير الصحراوى الساعة 3 العصر فى يوليو وأغسطس، مستحملش معايا 7 آلاف كيلومتر ، اسود وضاعت لزوجته تماااااااااااااااااما وبقى عامل زى المية وكان بيسخن بشدة، نزلته بعد 7 آلاف كيلومتر وكان ناقص ما يقرب من كيلوجرام لدرجة انى شكيت فى العربية ورحت كشفت على الكبس، لكن لقيت الكبس تمام ومن ساعتها غيرت لفيسكو 2000 ودة تانى غيار له وقربت على التالت ومبينقصسش ولا مللى متر واحد على المقياس فى عمر ال 5 آلاف كيلومتر
انا برضه بحكى تجر بتى كما هى وبالأرقام ، وفى الاول والأخر الحياه تجارب مختلفة ومش شرط ان النتائج تتفق لأن فيه عوامل كتييييييييييييير جدا بتحكم نتيجة التجربة، مثل درجات الحرارة، نوعية بيئة استخدام السيارة، السرعات، اسلوب القيادة ، ضبط كهرباء السيارة وضغط الاطارات، استخدام السيارة فىالسفر ام داخل البلد....الخ، وبرضه شكرا لسعة صدرك وتقبلك لردى
يابشمهندس انا طبعا صدري رحب ليك وعشان كده برضو قلت ياريت تتحملني
كلامك لا غبار عليه سواء بالارقام او من غيره
انا مش في مكان اني ارد او اعلق على كلام حضرتك اطلاقا
لاننا كلنا بنتعلم من حضرتك...
انا حبيت أأكد على حاجه فعلا
ان كل واحد له تجربته الخاصه
واللي بينفع معاك ممكن مينعش مع غيرك
وبالتالي انا معاك قلبا وقالبا
بالنسبه للتغييرات
شوف انتا مثلا غيرت نتيجة رؤيتك للموضوع وان مثلا البوجيهات كانت محروقه تماما
وهيا فعلا بتتغير كل 20 ألف وتتنضف كل 10
فلتر الهوا لو كان نظيف هل كنت هتغيره؟؟
اعتقد لأ
لكن رؤيتك انتا غيرت الموضوع
انا بالنسبه لاستخدامي فأنا قطعت 5000 كيلو بالعربية وطلعت فلتر الهوا مكنش متسخ بالقدر المهول يعني ونضفته ورجعته تاني كملت بيه ال 10 آلاف كيلو وكان نوعه بالاساس مصري (سئ الخامه)
وللعلم هوا لازال كويس محتاج تنظيف ويشتغل تاني لكن انا لعدم اقتناعي بخامته غيرته من كم يوم
الزيت فعلا هنا اختلاف غريب
لان كل مكنة تلاقيها ارتاحت مع نوع معين
ومشفتش ناس اجمعت ان نوع زيت لما اتحط في عربياتهم ارتاحوا معاه
يعني مش كل الماروتي ترتاح مع فيسكو 2000 ولا الكل بيرتاح مع موبيل وهكذا
كلامك فعلا يطابق كتالوج مواصفات العربية وان الفيسكو 2000 او فيسكو 3000 هما الافضل ليها على كلام الكتالوج
تجربتي العمليه غير كده وده طبيعي ومقبول والحاجات دي احسن حاجه فيها التجره والخطأ الى ان يستقر الواحد فينا على الاصلح له
تيل الفرامل برضو من الحاجات المختلفه تماما باختلاف الاستخدام والاعتماد على الفرامل ونوعية الطرق وطريقة القياده وبالتالي مش مقياس اطلاقا
لكن في التوكيل بيغيروه على 35ألف ومعانا احد الاعضاء هنا راحلهم في صيانة ال40 ألف وقالوله هنغيره كمان 5 آلاف
فما شاء الله يعني واضح تماما ان في تفاوت كبير جدا
وعن نفسي انا عامل 20 ألف واطلعت عليه وهغيره على 25 ألف وده حسب استخدامي انا
وبالتالي منظور كل واحد مختلف والحسابات تختلف
عشان كده في آخر كلامي قلت ان الواحد يصلي استخاره ويتوكل بعدها على الله وربنا مبيخترش لاحد اطلاقا حاجه سيئه
واللي خلاني اقول ان حضرتك غيرت حاجات كتير اني عايز اوصل للناس انه مش عشان فلان او علان غير حاجه انا اغيرها كمان
حتى لو كان بشمهندس سبعاوي
ههههههههههههههههههههههههه هههههههه
يعني كل واحد يغير الحاجه حسب منظوره هوا ومياخدش كلامنا هنا على انه لازم يتعمل
يعني ان شاء الله متفقين في الكلام ولا يوجد خلاف وصدقني يا بشمهندس انا اكن لك كل معزة وتقدير وآسف على سوء الفهم لو وصلك كلامي بمعنى غير صائب
وفقك الله لكل خير في الدارين ومتحرمناش من وجودك لاننا بنحب خبراتك وبنستفيد منها فعلا والمره الجايه لو مجتش معانا مقابلتنا هنعتبرك خاين للماروتيين وهنعلن عليك الحرب
هههههههههههههههههه
تحياتي ليك ولكل الاعضاء
تعليق واحد بس
البطارية الفارتا الالمانى هى احسن بطارية فعلا . انا مركبها عند ممدوج عطعوط توكيلها
بنصح حضرتك قبل ما تطلعى على البيومى لو العربية دارت كويس اطلعى اركنى عند ممدوح هتلاقى لوحدة كده فرد فنى بيقولك افتحى الكابوت هيقسلك اداء البطارية والدينو وهيقولك لو تمام هيقول تمام لو فى حاجة هيقولك هتعملى اية
انا معايا ضمان سنة طبعا معاه وكل شهر لو معدى هناك ادخل اشيك على البطارية وبيكتبلى فى الضمان انها تمام
حاجة تانية..
بشكر بجد تواجد الاستاذ سبعاوى معانا كلنا بنكن له كل الاحترام والتقدير بصراحة
الاختلاف فى الرائ لا يفسد للود قضيه
ومنكم ومن الكل نستفيد ولا ايه
الحمد لله يا جماعة الماكنه طلعت قماش:biggrin2:
تشخيص الدكتور حازم طلع مظبوط :verygood:
المشكلة فى البوجيهات كانت مرطبة وعلشان كدة ماكنتش بتدور
من الواضح يا دكتور انك هتكون طبيب شاطر جدا :vctry: وكلنا هنكون زباينك بس اوعى تغلى علينا الكشف:dontudear:
بس رب ضارة نافعة العيب دة كشف عندى مشكلة تانية ماكنتش واخدة بالى منها
لما درات العربية بواسطة شحن البطارية بوصلة خدتها وروحت على اولاد بيومى علشان اشوف مشكلتها (ماكنتش قريت مشاركتك يا استاذ ايهاب والا كنت روحت الاول على ممدوح غطاطى بس هبقى اعمل كدة ان شاء الله)
المهم لما روحت قاس البطارية والدينمو وقال ان البطارية كويسة وانه احتمال يكون المشكلة فى الدينمو فى سير محتاج يتغير فخدتها وروحت على كهربائى يشوف فين المشكلة
الكهربائى وهو بيقسها لقاها دايما شغالة حتى و هى مش دايرة وعرفنا ان الكاست متركب انه يفضل دايما شغال حتى لو العربية مش دايرة
وهو فعلا انا كنت بلاقية لسة شغال حتى بعد ما اقفل و اشيل المفتاح خالص وكنت بقفلة بنفسى بس ماكنتش اعرف انه بيفضل يسحب منها كهرباء
وطبعا العربية لما فضلت كام يوم مش بتتحرك البطارية نامت
بس الحمد لله صلحنا العيب دة واخدناها امبارح مشوار طويل علشان تشحن وتنتعش
و روحنا غيرنا الزيت فى كار جاس بتاعة الدقى وغيرت لفيسكو 2000 و فعلا حاسة ان العربية نعمت وبقت احسن
وانهاردة خرجت بيها كتجربة ولقيتها الحمد لله تمام
اخيرا انا شاكرة جدا لكل من اهتم بمشكلتى بجد انتم اجدع شباب فى المنتدى http://www.nilemotors.net/Nile/image...um1%5B1%5D.gif
ربنا يبارك في حضرتك احنا كلنا بنحاول نساعد والاخ سبعاوي قام بالواجب وزياده وكل الاخوة ربنا يبارك فيهم
ربنا يسمع منك واخلص على خير وليكو عليا مفيش كشفية لو معاكو ستيكر نايل موتورز
ههههههههههههههههههههههههه ههههههههههه
وبالنسبة للتهريب في البطاريه متوقعتوش لانك اشتريتي العربية واكيد صاحبها الاولاني مكنش عنده المشكله دي فده اللي خلاني متوقعوش واعتقدت ان البطاريه نفسها فيها مشكله
عموما الحمد لله عالسلامه للعربية وان شاء الله يكون اخر حاجه تضايقك منها....
ولو في اي حاجه احنا كلنا تحت امرك هنا اخوان واحباب ان شاء الله
تحياتي