شاليه نزلت علي الزجاج السياره واتكسر وكمان فيه شويه شغل في الصاج المهم المتسبب عنده استعداد يتحمل المسؤاليه فا دا يبقي عوض ولا لا يعني حلال ولا حرام وشكرا
عرض للطباعة
شاليه نزلت علي الزجاج السياره واتكسر وكمان فيه شويه شغل في الصاج المهم المتسبب عنده استعداد يتحمل المسؤاليه فا دا يبقي عوض ولا لا يعني حلال ولا حرام وشكرا
لا مش حرام طبعا
من افسد شئا فعليه اصلاحه
تقبل مروري
شكرا يا باشا علي سرعه الرد انا عارف ان من اتلف شيء فعليه اصلاحه بس انا قولت اتاكد علشان الواحد مش يقبل علي نفسه فلوس حرام وشكرا ليك مره اخري
لا خالص مفهاش حاجة باذن الله
الدونيا ماشية بكده حتى ف السعودية بيعملو كده
ربنا يوفقك ف تصليح العربية
لا ده سيد مش عوض :)))
أصلا العوض مش حرام وفي الدين من أفسد شيء فعليه إصلاحة
يعني ايه عوض !! مش فاهم ايه اللي هيحرمه اصلاً؟
متفهمونا يا جدعان علشان كل ما حد يخبطي بيقولي هتقبل العوض ويبصلي باحتقار كأني واخد رشوه!!
ربنا ياخد اللي طلع الفكره دي في دماغ الشعب المصري
no problem
لا مش حرام طبعا
من افسد شئا فعليه اصلاحه
تقبل مروري
مش عوض وده حقك لكن طبعا لو تقدر تسامح او عندك المقدره علي العفو وانك تشيلها علي حسابك برده شيء يرجعلك
وانت برده تقدر تشوف ظروف الراجل اللي عمل كده ايه
السلام عليكم و رحمة الله و بركاته
أولا , الحمد لله على كل حاجة و ان ماحدش كان قاعد فى العربية و لا واقف جمبها و اتعور .
أصلا , اللى أنا أعرفه, أن العوض مش حرام و بالتالى التصرف فى المسائل اللى زى دى بيرجع لسيادتك , لو سيادتك بفضل الله , ربنا موسع عليك و معاك المقدرة المالية أنك تعمل الاصلاحات دى و ماتاخدش من الراجل عوض , خلاص, اعملها على حسابك , لو التكلفة بتاع التصليح تلزمك , خلاص , خد التكلفة من اللى اتسبب فى التلفيات .
أنا لو مكانك و كانت التلفيات بسيطة و اللى عملها زى ما أنت بتقول راجل محترم و عنده استعداد أنه يدفع بالكامل , خلاص , مفيش مشكلة , مابرضاش آخد حاجة و بقوله , حصل خير , أما لو كان مش محترم ولا بيتناصح و لا بيقاوح و لا بينكر و لا متعمد الاهمال اللى أدى الى التلفيات , هاخدهم من عينه, حتو لو كان شلن ( 5 قروش ).
أما لو كانت التلفيات كبيرة , فأنا أعتقد أنى هاخدهم , أو على الأقل هاخد جزء منهم , يعنى هقسم بالنص بينى و بينه , بس أنا بصراحة ماتعرضتش للموقف ده قبل كده و الحمد لله و أتمنى أنى ماتعرضلهوش :10D5C8w1107:, لا أنا و لا أى من أعضاء المنتدى الكرام .
ربنا يسترها معاك و معانا أجمعين .
مازيراتى كواتروبورتيه
مش عوض ودا حق ليك بس لو الراجل مش قاصد يبقي ممكن تشيل جزء معاه
ايوه حقبل العوض طبعا
الطبيعي إنك تاخد تمن التصليح .. وده الأساس
لكن ممكن انت تسامح الي خبطك وتعذره على أساس إن كلنا ممكن نغلط في أي وقت ، وتكون النية خالصة لله إنه يفاديك بالفلوس دي من حاجة أكبر
مفيش حاجة اسمها عوض... هو انت راكنها عشان تتخبط؟ خد حقك منه.. كفاية انه العربية بقى فيها شغل.. انا شايف انك اتحملت ضرر بما فيه الكفاية خلاص
فى الحادث الاخير لى فى السيارة السابقة ... الشخص اللى كان السبب فى الحادثة أقر بخطئه وتكفل بأصلاح السيارة واخذت منه جزء من مبلغ التصليح وكان 2000 جنيه والباقى كتب بهم 3 ايصالات امانة .... وحين قررت البيع وعدم التصليح لعدم جدواه ... سامحت هذا الشخص فى جزء من المبلغ الذى تم الاتفاق عليه مع العلم اننى كنت كما قلت سابقاً كاتب ايصالات بالتصليح ...وكانت خسارتى كبيرة عند البيع ... ولاكن الحمد لله على كل شئ .
من اتلف شيئا فعليه اصلاحه
قال الله تعالى (وداود وسليمان اذ يحكمان فى الحرث اذ نفشت فيه غنم القوم وكنا لحكمهم شاهدين)
يعنى سيدنا داود وسيدنا سليمان حكموا فى قضيه عوض والاتلاف كان بسبب غنم اكلت محصول ناس يعنى مارست فطرتها التى لا تلام عليها ومع ذلك حكم سيدنا سليمان لصاحب الحرث انه ياخد الغنم يستفيد بها لحد ما صاحب الغنم يصلح ما افسدته غنمه يعنى من افسد شيئا فعليه اصلاحه والامثله فى السنه كثيره
بس كلمه هتقيل العوض ده نوع من التهرب من المسؤليه
ولو الغلطان متعقبش هيتجرا ويبوظ حاجات ناس تانيه
يا راجل ده ربنا شرع الديه فى القتل الخطا اللى منقصش من عمره ثانيه
دة حقك انه يصلح اللى كسره
1- هو ايه بالضبط اللى وقع على العربية؟! يعنى ايه شاليه؟!
2- فى الشرع:- من افسد شىء فعليه اصلاحه.
3- فى القانون:- المادة 163 مدنى "كل خطأ سبب ضررا للغير يلزم من ارتكبه بالتعويض".
شكرا اوي يا شباب وكده الفكره وضح بس والدتي مصممه انا دا يفدي شيء اخر ورفضت التوضيع انا عن نفسي مش مقتنع بس حعمل ايه الحمد لله قدر الله ما شاء فعل
سلام عليكم
اولا العوض مش حرام (من اتلف شيئا فعليه اصلاحه)
ثانيا انا نفسي ومنى عيني اغير الثقافه الي عند المصريين الي بتقول انا مش بقبل العوض
لأن انا لو لا قدر الله وعملت حادثه بسبب تهوري واتلسعت في التصليح بتاع عربيه مش بتاعتي هخلي بالي بعد كده انما لما الواحد يقولي روح يا عم الله يسهلك يبقى مش هيبقى في دروس مستفاده وهفضل على نفس المبدأ لأن زي ما ده قال كده غيره هيقول كده
معظم العربيات النقل والاتوبيسات لما بيخبطو واحد والراجل ده يشوف انهم بيجرو على اكل عيشهم فا يقولهم روحو الله يسهلكم الي بيحصل في الاخر انهم بيخبطو واحد غيره لحد ما الموضوع بقى دراع
انما لو كل واحد عمل مشكله وعرف انه زي ما عملها هيصلحها هيخلي باله طبعا
طبعا الفئات دي بتتلخص في
الاتوبيسات ، التاكس ، الميكروباص (ولو انهم بياخدوها دراع) ، والعربيات النص نقل
اما بالنسبه لموضوعك حلال يا معلم ، انما لو الموضوع ده حصل بسبب حاجه خارجه عن ارادة الراجل 100% (مش خطأ ادمي زي ما بيقولو) يبقى دي ممكن يكون فيها كلام تاني
والله يا جماعه علشان الموضوع كبر وفيه رش بويا وسمكره كمان اتفقت مع المتسبب علي انه يدفع جزيء وانا جزيء والحمد لله علي كل شيء