إلحق يا فاعل الخير اليومين التلج دول (صدقة جارية)

**smartchoice** · 12-12-2010 04:07 PM

السلام عليكم و رحمة الله و بركاته

الحمد لله فى السراء و الضراء و فى كل حال
أما بعد زى ما أنتم شايفين اليومين دول البرد شديد جدا و لا يطاق و كلنا بنام بليل متكلفتين و مقفلين كل الشبابيك و حالتنا حالة
علشان كده لازم نفكر فى الناس الغلابة اللى حوالينا اللى أعدين فى الشارع أو بيناموا على البلاط و دول كتير منهم البوابيين اللى فى العمارات
علشان كده كل فاعل خير عاوز يعمل صدقة جارية يحاولا يجيب بطاطين من الرخيصة أوى اللى ب 25 جنية أو أقل (هتلاقى عربيات نص نقل بتلف فى الشوارع توزع أو أى مكان تعرفه)و يوزعها على الناس الغلابة دى
تخيل كل لما يدفوا بيها و يدعولك و حتى لو مدعولكش تخيل لما يناموا مدفيين أنت جزاءك هيكون أية عند ربنا صدقة جارية كل ما الشتاء يجى و يتغطوا بيها
أنشرها بين أحبابك و أصحابك علشان تاخد ثواب أكتر (الدال على الخير كفاعله)
ملحوظة: الصدقة دى ممكن تديها لأى حد مسلم مسيحى بوزى حتى طالما هو مش بيحربك يبقى ممكن تتصدق ليه و لا تنتظر شكر من أى أحد خلى نيتك لله الواحد القهار
و جزانا الله و أياكم كل خير

**Moh.Abdelbaset** · 12-12-2010 05:08 PM

جزاك الله خيراً

**mada_76** · 12-12-2010 05:17 PM

والله العظيم امبارح وانا نايم بليل فكرت كده قد ايه انا جوه شقة ومتغطى بالبطاطين ومقفلين كل حاجة وكنت مشغل التكييف كمان قبل مانام شوية عشان يسخن الغرفة قبل ماندخل . ورغم كل ده وبرضه بردان انا ومراتي
قولتلها لما احنا كده وبردانين , اومال الناس اللى بتنام في الشارع وتحت الكباري وفي الجناين يعملوا ايه دلوقتي . وعيال صغيرة كتيرة اللى بيلفوا في الاشارات يبيعوا مناديل وفل كلهم بيناموا تحت اي كوبري او جنينة او اي رصيف . اللهم لك الحمد والشكر على النعم اللى احنا فيها ومش حاسين بيها . وربنا يرحم الناس دول ويهون عليهم البرد ده . وربنا يقدرنا على المساعدة

**Karim_Monir** · 12-12-2010 05:28 PM

اشاركك واحييك
واذكر الاعضاء بحملة العام الماضي لجمع الف بطانية
http://www.nilemotors.net/Nile/104634-2010.html

يا ريت كل واحد يشتري اللي يقدر عليه ويوزعه بنفسه على كل محتاج