هيونداى غبور ووجهة نظر مختلفة

**ضيفو** · 25-03-2008 09:01 AM

انا بكتب الموضوع ده مش عشان امدح ولكن عشان ااقول كلمة حق

انا لقيت ان غبور سمعته سيئة فى المواعيد وفى الصيانة وده صحيح لكن المشكلة دى مش عامة فيهم ع ما اعتقد هى مجرد خبرة شخص او عدة اشخاص معاهم بالشكل السئء ده وتتنشر وللاسف الاخبارالوحشة سريعة الانتشار

هى مجموعة لو التزموا بكلمتهم ودققوا شوية فى شغلهم هتبقى سمعة الشركة احسن.. خصوصا ان كل اللى رايح مجهز نفسيته انهم مش تمام فلوا شربت شاى فى البوفيه هناك ناقص سكر هتقول اه عشان هما غبور وما داراك ما غبور

لكن احنا حصلت معانا مشكلة فى الفيرنا يوم ما استلمناها وكتبت على المشكلة دى فى موضوع( الفيرنا ولعت يوم الاستلام)
مع كل اللى اتعاملنا معاهم من غبور كانو متعاونين.. صحيح فى مشاكل الدنيا مش وردى هناك.. لكن برضة مشاكل فردية يعنى اما تبقى مزروع فى الشارع والعربية واقفه وتكلم الونش عشان يرفعها وتتلطع فى الشمس لحد ما الونش يجى دى مشكلة مين ؟؟ مشكلة قلة عدد الاوناش مثلا ؟؟ مش عارفة .. ولكن اللى بيرد علينا من بعد عدة اتصالات عشان يجيب ونش من غبور ومكانش فيه جاب ونش من خارج غبور من نفسه مش من طلبنا

يعنى كان متعاون واتصرف..
المهم ان مشكلة الفيرنا اللى لسه مترخصتش بعد ما طلبوا اننا نديهم اخر فرصة فى اصلاحها بعد 3 محاولات فاشلة لنفس المشكلة والجميع داخل المنتدى باستثناء القليل ..وخارج المنتدى من العيلة والجيران نبهونا اننا نخلى بالنا ونتخذ احتياطاتنا عشان اى رزالة منهم او مماطله
لكن فى الحقيقه هما من نفسهم قالوا ان الفيرنا بقت تمام لكن لو مش متقبلينها نفسيا خدوا غيرها وهى جاهزة وموجودة واستلم بكرة ولكن بقت مش موجودة وكلمونا ع واحده تانيه المفروض نستلمها الخميس 27 مارس وهى دى المشكلة انه كان المفروض يتأكد العربية موجودة ولا لأ قبل ما يقولنا وبعدين يعتذر ويقول الخميس
واعتقد ان ده اللى مبوظ سمعتهم انه ممكن يقول كلمة ويرجع فيها عادى عشان مكلفش خاطره يتأكد ان الكلمة دى هتتنفذ ولا لأ ودى مشكلة فى اغلب المصريين

لكن كل الرغى الكتير ده عايزة اقول يكفى اثبات حسن النوايا ولانهم مش بيهرجوا انهم يعرضوا تغييرالعربية من غير ما يوجعوا قلبنا زى ما توقعنا وتوقع الجميع
ولكن لسه هما تحت الاختبار لحين استلام الفيرنا فى الميعاد وتكون غير اختها المرحومة :)

**HESHAM AMIN** · 25-03-2008 09:09 AM

هما عرضوا يغيروها علشان لسة مرخصتش لكن لو مرخصة حيبقى فية كلام تانى
واهو حد غسرك يلبسها مايكونش عارف حاجة
وعلى العموم هى خطوة ممتازة من غبور

**Noha.M** · 25-03-2008 09:13 AM

والله موضوعك كان مضايقنى جداااااااااا يا ضيفو بجد كأنك اختى والله و كنت مقهورالك

جدا و كل شوية ادخل موضوعك اطمن و اخرج بس مكانش فى حاجة بطمني للاسف و

كان نفسي اقولك ارميها فى وشهم من الاول لان اللى بيجيب عربية زيرو دة و دافع فيها

بيبقي فرحاااااان جدا بالعربية لانها بتبقي لسة مشدودة كدة و بالسلفانة زى ما بيقولو

فكنت بجد بتنرفز من الناس دى عشان فعلا مش مهنينك بعربيتك :(

بصى انا مقدرش احكم عل غبور لانى متعاملتش معاه بس لما واحدة صاحبتى فالتلى

عيزة تجيب نيو اكسنت اوتوماتيك اول حاجة حكيتلها حكايتك من غير كلام لانه فعلا انا

ملاحظة ان حتى لو حسن النية متوافر عندهم بس فعلا معنهومش كلمة و بصراحة عييييييييييييييييييييب يدوكي عربية كدة !!!!!!!!!!

عيب تبقي دافعة زيرو و يقولك غيرنا كذا و كذا و كذا !!!ليه ان شاء الله بتعملى صيانة

الخمس تلاف !!!!!! دة ولا حتي خمس تلاف اللى يدوبك بيغيرو فيها فلتر و زيت !!!

يااااااااااااا رب مشكلتك تتحل على خير و بجد يكونو صادقين و اد كلامهم و فعلا

متقبليش العربية المرحومة على رأيك حتى لو ببلاش و لازم تعويض كامل على ضياع

الوقت و حرقة الدم و اقل حاجة فعلا يدوكي عربية تانية خااااااااالص غير المحروسة

اللى قبلها:D:D:D

**ضيفو** · 25-03-2008 09:42 AM

خليك متفائل يا هشام والحمد لله اننا وصلنا لنقطه التغيير من غير وجع قلب وبلاش نبص للنص الفاضى من الكوباية لازم نقول كده لحد ما يثبت العكس
ولو غيرى شربها.. اكيد( لو متصلحتش زى قالو) هيعرف وهيعمل زى ما عملنا المهم رد فعلهم اللى كنا كلنا شاكين فيه

كان ايجابى

onnaربنا يخليكى ع احساسك بيا وفرحتنا بالعربية اللى ضاعت لفترة محدودة لانى مؤمنة ان ربنا اكيد فدانا من حاجة اكبر والحمد لله

صحيح حاجات كتير ضاعت ومواعيد اتفركشت ومصالح اتعطلت عشان الموضوع ده لكن لو حسبناها بالراحة هنلاقى ان مجموعة الخساير دى لاتسوى اى شيء جنب مشكلة تانية من نو ع تانى فى العربية( حادثة مثلا ربنا يستر )

تخيلى اما حصل كده فى اول يوم استلام بقينا.. نضحك.. ونستغرب ..و صليت ركعتين شكر لربنا
والحمد لله ع كل حال :)

**ضيفو** · 25-03-2008 09:44 AM

ع فكرة يا اونا الهوندا احلى بكتير من الماتيرا اللى بتفكرى تجيبها

وشايفة انك حبيتيها اهو :d

**HESHAM AMIN** · 25-03-2008 09:51 AM

يا باشا انا مش بشوف نص الكباية الفاضى
بس الى ماترضاهوش ليك ماترضاهوش لغيرك
وللاسف الى حاياخد العربية مش عارف حاجة
وحتتباعلة على انها زى الفل وكلة مية مية
لو اتباعتلك تانى ترضى بيها

**Noha.M** · 25-03-2008 10:28 AM

المشاركة الأصلية كتبت بواسطة ضيفو

ع فكرة يا اونا الهوندا احلى بكتير من الماتيرا اللى بتفكرى تجيبها

وشايفة انك حبيتيها اهو :d

العشرة مبتهونش برضه يا ضيفو :o:o

برضه بقالها معايا 4 شهور و الست بصراحة مطلعش منها اى غلط فى حقى :D بس اما فكرت فى

الماتيريا ورتنى الوش تانى و قامت مخبوطالى و كسرت فانوسهاا:D:D زي البلطجية لما يخبطوا

دماغهم فى الحيطة عشان يلبسو قضية لاى حد هههههههههه:D:D

ربنا يكتبلك الخير دايما و ويوفقك للحاجة الكويسة ان شاء الله فعلا "و عسى ان تكرهوا شيئا ":)

**أبو عبدالله** · 25-03-2008 12:58 PM

اسمحيلي اقولك على نظرتي انا ايضا المغايرة
ان عربيتك اللي هما هيصلحوها دي هيلبسها واحد تاني ميعرفشي اي حاجه عنها

لأنها مش مرخصة من قل ومفيش مشكلة انه يدخلها تتصلح ويتربها تاني
وتبقى زيروا طالعه من المصنع

وهيا دي بقه النظرة المغايرة بتاعت غبور
ودي اسمها خيانة الامانة

وانا بأكدلك ان ده اللي هيحصل
وربنا يحفظنا جميعا

**Ahmed Anwer** · 25-03-2008 01:51 PM

دي مشكلة الشركات الكبيرة عامة في مصر

لأن احنا اكبر مشاكلنا سوء الإدارة و النظام

و مع كبر الحجم و ارتفاع المبيعات بتكتر المشاكل و تزيد السلبيات و تتلخبط المواعيد

حاجة كده زي فودافون

و علي فكرة مثلا اللي بنقوله علي غبور في مصر

الأخوة في الخليج بيقولوا اضعاف اضعافه علي عبد اللطيف الجميل

من لعب في العربيات و تبديل اكسسوارتها باجزاء تجارية لسوء الصيانة لسوء المواعيد

و مع ذلك بيشتروا منه

لأن دايما الإختيار ما بين شركة كبيرة تضمن توافر قطع الغيار و مراكز صيانة منتشرة

و انتشار سيارات مريح لإعادة البيع و ضمان مضمون و حقيقي

مع خدمة غير متميزة او راقية

او شركة صغيرة هتبعت تجيبلك قطعة الغيار بالدي اتش ال و مركز صيانة وحيد او اتنين

و بدون انتشار لسياراتها يخليك تحت رحمة الوكيل و ضمان علي ما تفرج عشان انتا وحيد مع كام زبون

و في المقابل فضي و روقان و خدمة متميزة

بالإضافة إن مع كتر عدد العملاء ،، الفضايح و الكلام بيكتر ،،

شوفي في عيلتك او شارعك فيه كام عربية هيونداي ،، و في المقابل كام عربية من اي ماركة تانية

و الصراحة هما غبور بيحاولوا يتحسنوا و بيحاولوا مايمشوش الزبون زعلان و ضمانهم حقيقي

ينقصهم تماما مراجعة الجودة و المفروض تكون خبرتهم بعربياتهم اكبر مع كل هذا العدد

و طبعا الزحمة

عموما ربنا يباركلك في عربيتك و يجعلها اخر الأحزان

و علي فكرة متخفيش خالص انك تظلميهم و قولي رأيك بكل صراحة

اصل هما مش مظلومين خالص ،،، هما هيبيعوا اكتر من كده ايه ؟؟؟؟

**Ahmed Anwer** · 25-03-2008 02:03 PM

المشاركة الأصلية كتبت بواسطة أبو عبدالله

اسمحيلي اقولك على نظرتي انا ايضا المغايرة
ان عربيتك اللي هما هيصلحوها دي هيلبسها واحد تاني ميعرفشي اي حاجه عنها

لأنها مش مرخصة من قل ومفيش مشكلة انه يدخلها تتصلح ويتربها تاني
وتبقى زيروا طالعه من المصنع

وهيا دي بقه النظرة المغايرة بتاعت غبور
ودي اسمها خيانة الامانة

وانا بأكدلك ان ده اللي هيحصل
وربنا يحفظنا جميعا

و رأي أبو عبد الله من موضوع اخر

المشاركة الأصلية كتبت بواسطة أبو عبدالله

اما عن التوكيل والصيانه فتوكيل دايهاتسو جيد ومعاملته حسنه في اكتر من انهم يغيروا العربيه لواحده كانت بتقول ان العربيه بتحدف منها وكانت شاريد يعني مش مستاهله ....... غيروا العربيه كلها ليها بعد ما ركبتها ومشت بيها ... مافيش أحسن من كده

يعني علي اساس ايه حكمت ،، ان لما عبد اللطيف الجميل هيغير العربية يبقي راجل محترم ،،

و لما غبور يغير العربية يبقي نصاب ،،،

مع عدم احترامي للإتنين لأن الإتنين مجرد تجار سيارات لا يهمهم غير مكاسبهم علي المدي البعيد و القصير

الموضوع: هيونداى غبور ووجهة نظر مختلفة

LinkBack

أدوات الموضوع

عرض

هيونداى غبور ووجهة نظر مختلفة - انشر الموضوع فى :

-

ابتسموا للحياة -

-

-

-

المواضيع المتشابهه

كرهت هيونداى و غبور السبب

شبكة هيونداى اكسيل من غبور للي عاوز

تقييم توكيــل هيونداى - غبور

هيونداى فرينا الى بتنزل برا مصر غير بتعت غبور

أرجوك قول رأيك فى غبور وكيل هيونداى

الكلمات الدلالية لهذا الموضوع

المفضلات

المفضلات

ضوابط المشاركة