تعمل ايه لو كنت مسئول في مكان قيادي بالدوله (سؤال هيجيني في الامتحان ومحتاج اجابتكم)

دلوقت عليا ماده السنه دي اسمها تخطيط

وفي سؤل عباره عنsurvay الدكتور قايل عليه جاي في الامتحان ومحتاج من كل واحد يحضرله بطريقته

السؤال انك لو في منصب قيادي او مسئول عن قريه او محافظه او حتي دوله

تعمل ايه علشان تحسن منها

وفي طبعا main point نتكلم عليها


1- التعليم education

2- تشجيع الاستثمار investment

3- راس المال الاجتماعي social capital

4- البنيه التحتيه infrastructure

5- العشوئيات slum

6- راس المال capital

واخر حاجه

how to deal with difficulties in your strategy

__________________________________________________

انا بحاول اجمع افكار

لان الدكتور بيحب الابتكار وممكن جمله واحده تعجبه تغني عن 4 او 5 صفحات

منتظر تفاعلكم

A.Yakout

ياااااااااااااااااااااااا ااااااااه جيت لملعبي

التعليم قوله هزود رواتب اساتذه الجامعه و اعمل ميزانيه مفتوحه للجامعات و اشغل التعليم الموازي مره ثانيه و ازود ضرايب على التعليم الخاص علشان اصرف بيها على الجامعات و الاكثار من الاعتماد على الكويزات الاون لاين حته رواتب اساتذه الجامعه دي امتياز لوحدها :d
تشجيع الاستثمار الغاء الروتين و ................ معرفش النقطه دي بالذات الحكومه عامله فيها الواجب بزياده اوي بس ممكن تقول الحافاظ على الامان الاجتماعي و الاهتمام بالبنيه التحتيه

راس المال الاجتماعي انا مش عارف يعني ايه

البنيه التحتيه الرقابه الشديده على المحليات و الاعتماد على بيوت التصميم العالميه في الرقابه على تنفيذ مشاريع البنيه التحتيه و الاكثار من توفير المواصلات العامه و بناء خطوط مترو زياده

العشوائيات تزود الضرائب العقاريه لاي عقار يزيد عن مليون جنيه و تحسب بقى كل واحد عقاراته بتعمل حوالي كام يعني لو عماره تتحسب بالكامل و بالفلوس دي تتعمل مساكن بدل العشوائيات

راس المال معرفش قصدك بيها ايه بس لو قصدك موارد الدوله فمصر مش محتاجه مصر مشكلتها صرف الموارد دي بس ممكن تقول الحفاظ على الامان الاجتماعي و المناخ السياسي المعتدل لان ده بيشجع الناس انه تستثمر و تضخ عندك و تزود معدلات الانتاج و كلام الانشا ده

اخر حاجه بقى بالديمقراطيه الحره و بعمل استطلاعات للراي و الايمان بالقضيه و الاعتماد على القياده السياسيه و الامن المركزي في حاله اي فشل :d :d :d

قله مش هامسك المنصب ده اصلا لان الحكومه مش هاتدي فرصه لحد يعمل حاجه

ماتزعلش مني دا حال البلد

انا عندى اقتراح بالنسبه للعشوائيات مش عارف مدى صحيه على ارض الواقع ايه

الفكره بتدور حولين ان المناطق العشوائيه اغلبها بتقع فى مناطق كويسه ممكن استثماره كويس لو اتبنت صح مثلا زى العشوائيات اللى على الطريق الدائرى اللى قبل نزله المنصوريه دى فى منطقه كويسه جدا ممكن نعمل منها نسخه منها زى منطقه سما القاهره والقطاميه اللى على الدائرى بردوا وكده هتقول ازاى ؟هقولك هجيب مستثمر يشترى الارض دى بكذا مليون رقم كبير يعنى علشان الارض كبيره وموقعها متميز وهيستلمها كمان 5 سنين اكون انا بينت ليهم مساكن اداميه فى حته كويسه ممكن نقول اكتوبر العبور اى منطقه كويسه واكون انا كده استثمار الارض صح و حلت مشكله ادامى

متابع

انا مش فاهم السؤال قوى بس ممكن بعقليتى المحدودة اقول حاجة عامة زى
1- احدد هدفى
2-ا هحدد المشاكل مع اهميتها و ممكن فى ده استخدم توزيع باريتو
Pareto principle - Wikipedia, the free encyclopedia
و اختار المشاكل اللى هبدأ احلها حسب تاثيرها
3- هدرس قدراتى جيدا و كل الموارد اللى عندى
4- هفكر فى الحلول عن طريق اى وسيلة زى العصف الذنى
5- اختار الحل الامثل و اعمل خطة لتفيذه
6- انفذ الخطة و اشوف ايه النتيجة و ايه اللى عملته غلط و اتعلم منه

و اولا و اخيرا اتقى الله و اتقن عملى و اخلص النية

على الوضع الراهن .............
لو ما استقلتش حبقى مجنون زى السمكة إلى يتعوم ضد التيار

اقتباس:

---

المشاركة الأصلية كتبت بواسطة crazylambada

اخر حاجه بقى بالديمقراطيه الحره و بعمل استطلاعات للراي و الايمان بالقضيه و الاعتماد على القياده السياسيه و الامن المركزي في حاله اي فشل :d :d :d

---

علي فكره انتا برنس والله

هوا فعلا في كلامه عن الديموقراطيه بيقول لازم معاها قوه ومينفعش في مصر تبقي الديموقراطيه مطلقه

ودي نقطه لازم نتكلم عنها في الموضوع برضه

قصده براس المال الاجتماعي علاقة الناس ببعضها

وازاي تستغل ده لصالحك

اقتباس:

---

المشاركة الأصلية كتبت بواسطة mahamedaraby

انا عندى اقتراح بالنسبه للعشوائيات مش عارف مدى صحيه على ارض الواقع ايه

---

فكره ينفع نقولها اكنها مثال من ارض الواقع

اقتباس:

---

المشاركة الأصلية كتبت بواسطة ams

انا مش فاهم السؤال قوى بس ممكن بعقليتى المحدودة اقول حاجة عامة زى
1- احدد هدفى
2-ا هحدد المشاكل مع اهميتها و ممكن فى ده استخدم توزيع باريتو
Pareto principle - Wikipedia, the free encyclopedia
و اختار المشاكل اللى هبدأ احلها حسب تاثيرها
3- هدرس قدراتى جيدا و كل الموارد اللى عندى
4- هفكر فى الحلول عن طريق اى وسيلة زى العصف الذنى
5- اختار الحل الامثل و اعمل خطة لتفيذه
6- انفذ الخطة و اشوف ايه النتيجة و ايه اللى عملته غلط و اتعلم منه

و اولا و اخيرا اتقى الله و اتقن عملى و اخلص النية

---

دي تنفع كمقدمه ظريفه عن الخطوات المبدئيه لتجهيز الدراسه

ولفت نظري لتوزيع باريتو ونظرية العصف الذهني برافو عليك

هوا مقالهمش في اي محاضره بس بيحب الي يدور ويبتكر حلول

A.Yakout

هعمل زي ما المسؤلين دلوقتي بيعملوا !!!!!!

:khd::khd::khd::khd::khd::khd::khd::khd:



والله يا باشا السؤال ده صعب اجابته على حسب العقليه اللي هتقرا بس مش اكتر:dzey::dzey::dzey:

ممكن فى التعليم تقتبس فكره أحمد زويل الى بتعتمد على مراكز الاشعاع او النور ودي فكرتها عباره عن انشاء جامعات متميزه تضم جميع المتفوقين فى كل الجامعات (زى فصول المتفوقين كده) والى هيتخرجو منها هيكون هما النواه للنهضه بالتعليم والصناعه
والفكره ده فى كتير من الدول بدأت تطبقها أقربهم لينا تركيا وبدأت تحقق نجاح ملحوظ وحقيقي

انا عاجبني جدا كلام كريزي بس بلاش (الاعتماد على بيوت التصميم العالميه في الرقابه على تنفيذ مشاريع البنيه التحتيه)
ممكن تقول الاعتماد على اساتذه وخريجي الجامعات المتميزه و المراكز البحثيه المتخصصه في الرقابه على تنفيذ مشاريع البنيه التحتيه

هو أنا مفهمش قوي في معظم المشاكل المطروحة, و أعتقد ان اي شخص اي كانت مجالات خبرته أكيد مش حيفهم في كل حاجة, فلازم أول خطوة تبقى تشكيل لجنة من الخبراء لكل مجال من المطروحين على حدة تبقى مهمتها انها تدرس المشكلة أو الوضع المطروح و تقدم حلول عملية في أطار اللوايح الموجودة عشان متصطدمش بيها عند التنفيذ.

اللجان دي لازم تشتغل تحت اشراف مباشر مني و يبقى فيه مهلة زمنية محددة للأنتهاء من الخطط وهما كمان لازم أفكارهم تبقى قابلة للتنفيذ في أطار زمني محدد.

مفيش مانع اني أطرح تصور عن الحلول و اتناقش مع الخبرا بتوعي فيه:

يعني موضوع التعليم ده مثلا أنا متصورة انه أكبر من مسئول اقليمي ايا كان, لأن لازم من أوائل الحلول انه الأجور الخاصة بالمعلمين تزيد و ان المناهج تتحسن, و ده شغل وزارة التعليم. اللي ممكن المحافظ يساعد فيه انه يفرض رقابة مستمرة على المدارس, انه يقيم مسابقات بين المدارس في محافظته بحيث يبقى فيه تنافس بينهم, انه يدعم مجموعات التقوية في المدارس العامة من ميزانية الوزارة عشان تكون في متناول الطالب البسيط و يهتم بالاشراف عليها.

موضوع تشجيع الاستثمار ده برضه محتاج تشريعات و قوانين تخرج من سلطة المسئول المحلي, لكن مهم جدا لأي مسئول انه يحرص انه يزيل التعقيدات البيروقراطية اللي بتواجه المستثمرين و اللي كتير منها بيبقى من الأفراد نفسهم و تعنتهم في تنفيذ القوانين. كمان مهم قوي ان المسئول ده يكون عنده تصور لنوع الاستثمار اللي يفيد المنطقة بتاعته. يعني كمثال, لما تكون محافظة مثلا فيها اراضي كتير مش مستغلة و ممكن تستصلح و عنده نسبة كبيرة من السكان فلاحين و مشتغلين بالزراعة, يبقى هو المفروض يهتم باجتذاب رأس المال الي يستثمر في الزراعة, بحيث انه يستفيد من موارد المحافظة و يشغل الأيدي العاملة المتوفرة. لو المحافظة ساحلية مثلا ممكن يشجع المشاريع الخاصة بالثروة السمكية سواء أساطيل الصيد أو المصانع الخاصة بالتعبئة و التصدير و غيره. لو محافظة تصلح للصناعة بحيث انه متوفر فيها العمالة و قريبة من مناطق استقدام الخامات و كدة يبقى يشجع اقامة مصانع. المهم ايا كان نوع الأستثمار انه يدرس كويس مدى أستفادة المحافظة بتاعته من المشروع المطروح. يعني مثلا كلنا سامعين المسئولين المصريين طول النهار بيتكلموا عن تشجيع الأستثمار و رغم كدة لو بصينا على الأستفادة الفعلية حنلاقيها صفر. أولا لأن أغلب المستثمرين اللي بيقولوا عليهم دول بتلاقيهم بيتجهوا للاستثمار العقاري, و ده في حد ذاته مش وحش, انما المشكلة اننا بنلاقي ان المستثمر هو الوحيد اللي بياخد كل الاستفادة و مفيش اي استفادة حقيقية للبلد. يعني تلاقي الشركة واخدة الأرض برخص التراب و واخدة اعفاءات ضريبية و بنية تحتية ببلاش و و و, و في الأخر بتعمل مساكن بملايين و تكسب مليارات من الهوا, خصوصا ان أغلب الشركات دي بتاخد قروض من البنوك بضمان مشروعاتها, يعنى حتى السيولة المستخدمة مش بتضخها من جيبها. انما الصح انك حتى لو حتدى الشركات الأرض بأسعار رمزية لتشجيعها لازم ده يقابله استفادة للبلد نفسها. يعني ممكن تلزم الشركة ان نسبة معينة من المساحة دي تتبني للدولة ببلاش و تتعمل مساكن متوسطة, بحيث ان ممكن الدولة تقدر تستغلها في حل مشكلة تانية زي موضوع العشوائيات, بأنها تعمل اعادة تسكين للناس اللي في العشوائيات في الأماكن دي و ويتعمل أعادة تخطيط للعشوائيات.

موضوع ال social capital انا مش فاهمة يعني ايه.

موضوع البنية التحتية ده بقى من اهم المواضيع اللي لازم استعين فيه بخبراء في الهندسة ده اولا. ثانيا لازم يبقى فيه تنسيق بين الهيئات المختلفة اللي بتعمل الشغل. يعني ممكمن تتعمل خطة خمسية او عشرية مثلا لتطوير البنية التحتية للمحافظة, و تتنفذ على مراحل ممكن عن طريق تقسيم المحافظة لأحياء يبدأ الشغل بها على التوالى أو عن طريق تقسيم الشغل الي مراحل يعني مثلا شبكات الصرف الاول, بعدبن المية, بعدين الكهربا بعدين الغاز, بعدين الطرق........الخ. طبعا المهندسيين الأستشاريين هما اللي بيحددوا المراحل دي لأنهم ادرى ايه المفروض يتعمل الأول بحيث انه كل هيئة بتستلم المنطقة من الهيئة اللي قبلها و تكمل الشغل من غير ما تبوظ حاجة زي ما بنشوف دلوقتي. يعني بنلاقي مثلا ان المحافظة رصفت شارع معين و بعد كام شهر يجي بتوع الغاز يكسروا اللي اتعمل عشان يركبوا المواسير, و ده تهريج طبعا و سببه الرئيسي عدم التنسيق. طبعا كمان لازم الرسومات بتاعة الشغل ده يبقى معمول فيها حساب اي تعديلات أو صيانات محتاجة تتعمل في المستقبل, و دي حاجة أساسية بتتعمل في الدنيا كلها و ليها تصميماتها هندسيا.

موضوع العشوائيات ده انا رديت عليه في نقطة الاستثمار, باختصار اقدر اشوف مستثمر يعمل مساكن اقتصادية للناس اللي في العشوائيات دي مقابل انه ينتفع بالأرض بتاعت العشوائيات في مشروع استثماري.

نقطة رأس المال دي برضه مش واضحة قوي, بس بيتهيألي قصدك حيوفر رأس المال أزاي؟؟
الموضوع طبعا معقد بس هو مرتبط بشكل أساسي بموضوع الاستثمار. زي ما قولت لازم يكون فيه تشجيع للأستثمار بحيث انه المستثمر يكون بيضخ راس مال في مشاريع تفيد المكان مش بس تفيده هو. يعني لو خدنا مثال للمشاريع الزراعية مثلا, لازم يكون فيه مقابل مجدي للمحافظة من انها تدى للمستثمر حق انتفاع بقطع أرض معينة, يعني ممكن مثلا لو الأرض دي في الصحرا على حدود قرى معينة, يلتزم المستثمر انه يساهم في البنية التحتية للقرى دي. نفس الكلام قولناه في الاستثمار العقاري. طبعا ده غير ان الاستثمارات دي بتدخل دخل تاني عن طريق الضرايب.

النقطة الأخيرة How to deal with difficulties حلها هو للي قلته في بداية كلامي. لازم استعين بأهل الخبرة في المجال اللي بتواجهني فيه المشكلة, لأن من أهم اسباب تأخر بلدنا للأسف هو الأعتماد على من يظن انهم أهل ثقة بدلا من الأعتماد على أهل العلم و الخبرة القادرين فعلا على ايجاد الحلول. و ياريتهم حتى أهل ثقة, نقدر نقول أهل الولاء لأشخاص بعينهم!!

أنا رغيت كتير قوي مش كدة؟؟؟ يا ريت تقول لنا بقى انت مجال دراستك ايه؟

الاستثمار

1- الاعفاءات الضريبيه
2- تبسيط إجراءات التسجيل والترخيص للمشاريع الاستثمارية ومتابعة المشاريع وعمل اسواق
3- عمل برامج لجذب المستثمرين وتوفير المعلومات لهم
4- عمل قروض بفائده بسيطه
5- عدم عمل مشاريع استثماريه لغير المصرى بس ممكن تكون مشاركه بحيث انه ميكونش بيمتلك المشروع

ياقوت
لك رسالة على الخاص

sha2e - hh - ganash

بصراحه افكار محترمه واستفدت بيها واقتبست اجزاء منها

شكرا ليكم جدا

dr-mohamed

الدراسه بصراحه محترمه

بس دي دراسه خاصه بمشكلات التعليم بس

والمطلوب مني دراسة كيفية حل عدة مشاكل

يعني يكفي عنوان المشكله

وبعدين احكي براحتي في طريقة حلها

وربنا يخليك لينا يا رايس :)
______________________________________________

انا بدرس تجاره انجليش

وطبعا الدراسه دي كلها المفروض تبقي انجليش :(

A.Yakout

اقتباس:

---

المشاركة الأصلية كتبت بواسطة nabaster

السؤال انك لو في منصب قيادي او مسئول عن قريه او محافظه او حتي دوله

---

أأجرها مفروش واقضيها في مارينا

اقتباس:

---

المشاركة الأصلية كتبت بواسطة nabaster

دلوقت عليا ماده السنه دي اسمها تخطيط

وفي سؤل عباره عنsurvay الدكتور قايل عليه جاي في الامتحان ومحتاج من كل واحد يحضرله بطريقته

السؤال انك لو في منصب قيادي او مسئول عن قريه او محافظه او حتي دوله

تعمل ايه علشان تحسن منها

وفي طبعا main point نتكلم عليها


1- التعليم education

2- تشجيع الاستثمار investment

3- راس المال الاجتماعي social capital

4- البنيه التحتيه infrastructure

5- العشوئيات slum

6- راس المال capital

واخر حاجه

how to deal with difficulties in your strategy

__________________________________________________

انا بحاول اجمع افكار

لان الدكتور بيحب الابتكار وممكن جمله واحده تعجبه تغني عن 4 او 5 صفحات

منتظر تفاعلكم

a.yakout

---

بخبرتى فى التخطيط العمرانى لمدة عامين كاملين ... ( بكره المادة دى جدا عشان شغلها تقيل .. فقولك الكلام إللى ممكن يفيدك فى الإمتحان إن شاء الله)

بالنسبة لتشجيع الإستثمار .. و البنية التحتية

ممكن نعمل مشروعات كبرى بنظام الbot .. و إللى هى عبارة عن مشروعات قومية ملك الدولة و لكن المستثمر له حق الإنتفاع بها لحد ما يحقق الربح بتاعه .. زى محطات الكهرباء و المياه و تليفونات و ممكن نواه المدن الجديدة و المشاريع إللى يجب ان تكون عليها رقابة حكومية .

و تعمل فحص للموارد إللى موجودة .. على سبيل المثال منطقة سيوة .. و الواحات .. المنطقة دى سياحية جدا جدا .. ممكن تنميها سياحيا بحيث كبري الفنادق تفتح و إنشائات كبيرة فى الصحراء تعمل دخل عالى طول السنة ..

و ممكن الإستثمار الزراعى و الصناعى على مساحة كبيرة فى سيناء ... الجزء ده من البلد فاضى نسبيا ... و يكون بحق الإنتفاع بردوا .. .. فى حاجات كتير ... بس حاليا أغلبها سياحى إللى ينفع بتنفذ .. الباقى محتاج خطة 20 سنة

بالنسبة للعشوائيات :

ده واقع ... ماينعش تشيله .. ممكن تتعامل معاه بصورة تانية .. و تحسين سلوك المواطنين ..

على سبيل المثال تجميل العشوائيات .. دهان العمارات .. تجديد المرافق .. إضافة حليات على الوجهات و زراعة الاسطح و زراعة حول المبانى نفسها ... بحيث تعمل متنفس لأهل العشوائيات ... تبليط الأراضى عندهم ببلاط للمشاه خصوصا نص المناطق دى ماينفعش تمر عربيات ...

شكرا يا سيف لفت نظري لنقطه فعلا مهمه

شكر يا جماعه لكل الي شارك

انا الحمد لله كده ظبطت شوية افكار حلوين ورتبتهم تمام

فاضل بس اجمعهم واكتب بيهم موضوع حلو

تاني مره بشكر كل الي تعب معايا

A.Yakout

العفو يا كبير المهم تطمنا بس عملت ايه :)

الاستراتيجيه هتختلف من حاكم لقريه من حاكم محافظه الي حاكم دوله , لان كل حاله ليها ظروفها و مؤثراتها الخارجيه و الدااخليه .

فلو فرضنا اني محافظ جديد , يبقي اول حاجه اركز عليها اذا خلصت النوايا للاصلاح هو اني اعمل في صمت و اكمل علي شغل من سبقني من الزملاء , و ابتدي اشوف المشاكل و المعوقات في محافظتي .

فمثلا ابتدي اضع هدف عام وهو اني اصل بمحافظتي لدرجه الرخاء الاقتصادي و ارتفاع مستوي المعيشه مع الحفاظ علي الهيكل الأخلاقي و المباديء للناس وللوسطيه الدينيه , و عشان اعمل كده يبقي اول حاجه اني ما اعتمدش علي ميزانيه الدوله و اعمل تمويل داخلي مع اشراف الوزارات المختلفه بالطبع و تعزيز العلاقات مع الوزراء و كسب ثقتهم , وبناءا علي ذلك اعمل جاهدا علي جذب الاستثمار و تسويق جيد نابع من دراسه جيده لامكانيات محافظتي للترغيب فيها , و عشان الاستثمار يأتي يبقي لازم يلاقي اولا بنيه تحتيه جيده( طرق و كهرباء و صرف صحي و مياه و اتصالات جيده ) بالاضافه لكوادر بشريه مؤهله ( تعليم جيد ) , لذلك اعمل اول ما اتولي المسؤوليه علي رفع كفاءه المرافق و التعليم , فلو كانوا بحاله جيده يبقي خير و بركه و قصرنا المشوار , و لو طلعوا بحاله سيئه ( غالبا ) يبقي ابتدي اعمل خطه تطهير مدروسه لعصابات الفساد المنظم ( مافيا المحليات ) عن طريق تقريب اهل الخبره المحترمين
الشرفاء و بتر رأس ثعابين الفساد الكبار و احلال الشرفاء مكانهم و بالتالي ذيول الفساد قدامها حل اما انها تمشي جنب الحيط او تستقيل , و بكده يبقي ضمنت ان مشاريع البنيه التحتيه سواء صيانه السيء منها او عمل مشروع جديد هيتم تحت اشراف ناس محترمه عندها ضمير , طبعا بالتوازي يتم اصلاح التعليم بنفس الكيفيه مع تشجيع التعليم الفني سواء زراعي او صناعي و الاهتمام به . طبعا الخطه دي ممكن تتم في حوالي 5 سنين و بكده استطيع عمل ترويج لمحافظتي بثقه , فالاستثمار يجي لما يجد مناخ جاد يحافظ علي استثماراته , وبكده عجله التنميه تدور و يزيد رأس مال المحافظه الذي سيعود بالرخاء علي ابناءها سواء في خدمات او تشغيل ابناءها .

بالنسبه لظاهره العشوائيات فخطرها يأتي من الناحيه الأمنيه لانها مرتع خصب للمجرمين و خطر علي التنميه اللي انا بعملها و يتم التعامل معاها بطريقين اولا طريق اني اوفر فرص عمل لساكنيها و اشركهم في التنميه بعد دراسه مستفيضه لهذا المجتمع و كيفيه التعامل معه و تضييق الخناق علي المهن التي يعملون بها مثل تجاره الخرده بطريقه عشوائيه و جعلهم يندمجوا مع المجتمع , بالتوازي نقوم بالضرب بايدي من حديد علي عتاه المجرمين الميؤس من اصلاحهم و ايضا عمل حملات توعيه لربات البيوت , يبقي بالتالي يبقي سهل جدا نزعهم من مكانهم و توفير سكن بديل لهم محترم .