الموضوع: تجربتي مع الصناعة المصرية

الحل بالأضافة لما قلته ياباشا
خطةوهدف واضح من الدولة...........10 سنين يكتب أسم مصر علي خريطة العالم دولة صناعية
وبعدين ماهم منعوا الأستيراد كام سنة بهدف حماية الصناعة الوطنية وأخرتها كانت أيه كنا بناخد سلعة بجودة أقل بسعر أغلي تقريبا من أي دولة في العالم يعني الحماية ماكنتش للصناعة ولا أيه
أنا شايف من أهم النقاط قبل مانقول ممكن نعمل أسم في عالم الصناعة
-نظام أداري واضح وصارم وأجرأته سريعة للعمل علي جذب الأستثمارات والحد من هروب الموجود بالفعل بالبلد
-تشريع بمعاير الجودة يلتزم به كل من يعمل في الصناعة بالبلد(مثال صغير لأحتياج جهة لمثل هذا التشريع حماية المستهلك)
-أشتراطات ومعاير للبيئة صارمة

انا سعيد اوى بيك
مش لانك متحمس ومستعد تساعد ناس فى مشاريعهم بلا مقابل
لكن لان من زمان اوى ملفتش حد بيتكلم على حاجة مصرية بحب ورغبة فى التطوير كده

المشاركة الأصلية كتبت بواسطة karim_monir

على سبيل المثال
بشتغل في شركة بتصنف الثانية على العالم في التصنيع الكهربائي
مصانعها موجودة في 122 دولة وانتاجها في 195 دولة
مصر بتصنع نصيب كبير منه جدا بداية من القواطع الكهربائية وحتى الاكشاك والمحولات الضخمة جدا
70% من الانتاج موجه للتصدير وال 30 % بيتلهف السوق المحلي عليه لانه رفيع المستوى ودايما بيتركب في المدن الجديدة كاكشاك كهرباء
وبقية الانتاج قرى سياحية ومدن ومجتماعات عمرانية رفيعة المستوى زي الرحاب ومدينتي وغيرها
والمصنع به اكثر من الفين عمل غير الصناعات المغذية والشركة كانت بتضم 14 شركة وحاليا بعد الانضمام والتحالف بقو 6 فقط
ده على سبيل المثال كصناعات كهربائية

حاجة تفرح حقيقي والله وأنا متأكد أن عندنا صناعات بجودة عالية وخصوصا للتصدير
وعلي سبيل المثال ماركس أند سبينسر(أنجليزي) بيصنع في مصر بدل وبأسعار قريبة من الأسعار بالمملكة المتحدة
وبيبيعها في دول الخليج
بس الجودة محفوظة وعليها كواليتي كنترول جامد
يبقي أنت حطيت أيدك علي نقطتين مهمين
-الجودة ومعايرها
-الدعاية والتسويق

فيه سؤال بيطرح نفسه ومثال حي علي واقع الصناعة عندنا!
ليه قفلنا مصنع السيارة الوطنية الوحيدة 128(أن جاز التعبير لأنها فيات ماركة أيطالية في الأخر برده)................في المقابل الصين بتصنع عدة ماركات!
الجواب علي السؤال هو مربط الفرس=كل ماذكره مزجانجي في أول الموضوع(عدم وجود خطة تنموية واضحة وملزمة للجميع)
ده غير لازم نفرق أحنا بنتكلم علي دولة صناعية(مصانع تقفيل وتوكيلات عالمية)!................موجودة
ولا صناعة وطنية تحمل الأسم المصري!..........سيارة مصرية تحمل maid in egypt

المشاركة الأصلية كتبت بواسطة mazagangee

طبعا كل الناس نازلة بالصناعة المصرية تحت الأرض , و احنا بلد لا تصلح للصنلعة و العامل المصري فرد متواكل و سنكوح و مش بتاع شغل و عديم الدقة و منعدم الذمة الضمير , .........

بالراحة كده و تعالى نتناقش بدون ما حد فينا يكون واخد موقف مسبق ...


أولا مشاكل الصناعة المصرية ::::: ( من وجهة نظر المستثمر )

أكبر و أهم مشكلة هتقابل سيادتك لما تيجي تعمل مصنع هيه التراخيص و انهاء الأوراق ...... طبعا حضرتك لازم تعمل دراسة جدوى تقدمها للمنطقة الصناعية اللي انت عايز تعمل مصنعك فيها ... طبعا سيادتك قدامك حل من اتنين يا تعمل الدراسة بنفسك , يا تخلي مكتب متخصص يعملهالك ... لو انت فاهم الصناعة ممكن تعملها بنفسك و ده هيوفر عليك تكاليف كتيرة لو مصنعك كبير , لو مكتب متخصص هياخد منك رقم محترم عشان هيعملك دراسة للسوق .

بعد كده هتروح يئة الاستثمار و تعمل سجل تجاري و بطاقة ضريبية و دي أوراق سهل استخراجها حكاية أسبوع و لا اتنين و مش متعبة ممكن المحامي بتاعك يخلص الموضوع بسهولة و هتتكلف في حدود 3000 جنيه ...
بعد كده سيادتك هتروح المنطقة الصناية و تقدم دراسة الجدوى بتاعتك و تطلب تخصيص مساحة أرض مناسبة للمصنع بتاعك , طبعا هتقعد مع لجنة من مهندسين المنطقة الصناعية اللي هيناقشوك في كل التفاصيل و التكاليف و الانتاجيات عشان يتأكدوا انك فعلا فاهم انت هتعمل ايه و ليه و انك بتطلب مساحة أرض معقولة مش مبالغ فيها .

طبعا هبلغوك بقرار اللجنة بعد شهرين و تعمل محضر استلام للأرض و تقدم الرسومات الهندسية للمشروع ,,
لو انت مقدم في المنيا أو بني سويف الأرض ببلاش بس بتدفع تأمين 50 جنيه عن كل متر و تسترد الفلوس بعد ما تخلص الانشاءات بس بيتخصم منها 10 جنيه لكل متر رسوم مش عارف ايه اي كلام .... بس الأرض فعلا ببلاش .

الرسوم الهندسية هتصرف تقريبا من 1500 الى 2500 على حسب المباني و المساحات و التنظيم اللي انت عايزه .
طبعا هتبدأ بالسور و تخش على المباني و الجمالونات ,,,,....

في نفس الوقت انت هتشتري المعدات من الصين و لا من أوروبا و لا معداتك تصنيع محلي :
1- المعدات الصينية : كويسة و أسعارها معقولة و كفاءة متوسطة لكنها تعتمد بالكامل على التشغيل البشري و لا يوجد فيها خطوط اوتوماتيكية ( الا لو انت طلبت و دي بتكون غالية جدا ) . طبعا لازم يكون عندك مهندس فاهم و شاطر عشان يعرف يطلع انتاج من المعدة دي .
2- المعدات الأوروبية و الروسية و الأمريكية كلهم فئة واحدة و دول اساسا مناسبين للانتاجيات الضخمة و أهم ميزة انها أوتوماتيكية و تعتمد على الكمبيوتر في التشغيل و ادارة خطوط الانتاج و العامل البشري اقل ما يمكن .. لكن يا باشا ادفع كهربا و قطع غيار ...
3- المعدات المصنعة محليا : لو انت هتعمل المونيوم أو محتاج معدات محلية هتلاقي ناس جامدة جدا و يتركزوا في العاشر و المنصورة والجمالية و الشرقية و حتت تانية على حسب نوعية الصناعة بتاعتك . و المعدات دي بتكون في الغالب تقليد أو تعديل لمعدات غربية أو تقدر تقول تمصير ... و دي بتكون معمولة لو حظك كويس بحرفية عالية و كفاءة ممتازة . و هتخليك تكره نفسك لو وقعت في ايد واحد نصاب أو سمسار ...

في الغالب انت هتستورد المعدات : لو المصنع منطقة حرة خاصة ( هنا بيكون فيه شرط تصدير 60% من الانتاج على الأقل ) يبقى عندك اعفاءات جمركية و ضريبية على المعدات المسوردة .

أول ما المعدات توصل هتحتاج مهنسين كهربا و ميكانيكا للتركيب و التشغيل أو لو عندك خبرة كفاية تقدر تعمل كده لوحدك بس هتجيب حدادين و كهربائية عشان يركبولك المعدات و أفضل حاجة ليك تديهم الشغل مقاولة و ده هيكون أرخص ليك عشان لو يوميات ممكن يكلفوك زيادة عن اللزوم .

تعالى بقى للمقلب الحكومي الخطير ::::
رسوم ادخال الكهربا و دي أعلى تكلفة هتدفعها و تنقسم الى :
1- تأمين و ده بيكون 30 جنيه لكل كيلو وات لو منطقة صناعية جديدة أو 50 جنيه لو منطقة قديمة . و ده تأمين غير مسترد أو بمعنى آخر فلوس ميتة .
2- لو انت محتاج كهربا أكتر من 500 كيلو وات هتدفع فردة اسمها القسط الثابت و فردة تانية اسمها الحد الأقصى و دول بيكونوا مبالغ محترمة .
3- شركة الكهربا هتشترط انك يكون عندك لوحة باور فاكتور عشان الموجات الارتدادية على الشبكة لو انت فوق ال 500 كيلو وات .
4- ممكن يدبسوك في محول أو لوحة توزيع و دول غاليين و مفيش حل ليهم لازم تجيبهم و مفيش غير شركتين في مصر بيعملوهم .
5- تكاليف الكابلات و دي بتكون متغيرة على حسب الكهربا اللي انت طالبها .

رسوم ادخال المياه و الصرف الصحي و الصرف الصناعي ::: في حدود 15 ألف لكل واحدة .

رسوم التلفونات ::: كلام فاضي تقريبا 450 جنيه لكل خط تلفون .

رسوم النظافة :::: مبلغ كده فردة بتاخدها الحكومة و تقريبا بتكون في حدود من 200 ل 4000 جنيه شهريا على حسب مساحة المصنع مش على حسب كمية الزبالة و طبعا مفيش حد بيشيل حاجة انت اللي هترمي زبالت بنفسك .

رسوم الدفاع المدني ::: انت و حظك معاهم

البيئة :::: برضه انت و حظك و تظبيطك معاهم

بعد كل الدوشة دي سيادتك هتكون وصلت لبدء الانتاج طبعا هترح تعمل ترخيص تشغيل و سجل صناعي و لو هتصدر بتشترك في غرفة المصدرين المصريين .

كده بقى سيادتك هتكون وصلت انك عينت مجموعة العمالة المطلوبة ( أغلب المصانع الصغيرة بتكون كاجوال مش تعيين ) ....

طبعا كصاحب مصنع انت هتدفع مرتبات قليلة لأنك هتدفع زي السوق و ده بيكون على حساب الجودة ... و دي أكبر مشكلة في الصناعة المصرية ان الشركات بتدفع لعدد قليل يمكن 2 أو 3 و بالكتير 5 مبالغ كويسة و يخليهم يثبتوا العمال و الفنيين و باقي المهندسين الصغيرين بكلمتين حلوين و بجزاءات عشان ياخدوا منهم اعلى انتاجية ممكنة .... لكن ده خطأ كبير جدا جدا ...

التسويق :::::::::::::: أكبر مشكلة تواجه الصناعة المصرية , السوق المحلي و العالمي مش مستني سيادتك عشان يشتروا منتجك لأ طبعا فيه مليون مصنع زيك و يمكن أحسن منك كمان عندهم نفس المنتج يبقى الناس دي هتشتري منك انت ليه ؟!!!!
لازم يكون عندك خطة تسويق يخطط لها و ينفذها واحد محترف مش عيل صغير و ده خطأ كبير جدا يتقع فيه أغلب المصانع الصغيرة اللي بتهتم بالحرفية العالية و تستسهل التسويق و بعد ما يصرف دم قلبه يلاقي نفسه قاعد بيهوي .... و طبعا عشان معندكش طولة بال و لا خطة تسويق ولا عامل حسابك على مصاريف لمدة لا تقل عن 6 شهور لسنة على حسب نوع الصناعة ... تروح منزل باب المصنع و تستعوض ربنا في الخسارة .


أولا مشاكل الصناعة المصرية ::::: ( من وجهة نظر العامل )
تعالى نشوف الموضوع من وجهة النظر التانية و هيه العامل اللي بيشتغل وردية في المصنع :::
طبعا الادارة ( في الغالب مش الكل ) لا تهتم برأي العامل اللي بيشغل الماكينة مع انه ممكن يكون عنده ملاحظات انت مش واخد بالك منها لكن عشان هوه واقف قدام الماكينة 8 ساعات يوميا هوه أحسن واحد ممكن يديلك بيانات عن مشاكل المعدة ...
المرتب للعامل بيكون قليل جدا و غالبا بيكون 500 الى 1200 للعامل اللي معاه دبلوم و ده مبلغ صغير جدا ميكفيش أسرة من 3 أفراد و دول ناس بتكون أسرهم كبيرة العدد ... يقابل ذلك معدل أرباح عالي لا يقل عن 25% من تكاليف الانتاج ... يعني العامل بياخد ملاليم لا تستر بيته و صاحب المصنع بياخد أرباح عالية و غالبا لا يوجد حوافز انتاج و لو موجودة بتكون مبالغ قليلة الى متوسطة و بتكون كل 3 أو 6 شهور ...
طبعا كده العامل ده هيوفر صحته عشان بيطلع من عندك و يروح مكان تاني يشتغل فيه عشان يكفي بيته ...
بس لو انت بتدفع مرتبات كويسة هتلاقي العامل بيموت نفسه على الماكينة ( أيا كان نوعها ) عشان يطلع انتاج و أحيانا تلاقيه يصلحها بنفسه أو يجري و يقف على دماغ الصيانة عشان يصلحوله ( واخد بالك من يصلحوله دي ) الماكينة بتاعته في أسرع وقت ممكن .



للأسف أغلب المصانع لا تهتم برفع المستوى الفني للعاملين , تهتم فقط بعدد صغير و الباقي اللي مش عاجبه يمشي و ده خطأ كبير جدا و طبعا صاحب العمل معذور لأن تكاليف التدريب غالية لكن ممكن تلاقي صيغة مناسبة

طبعا أغلب المصانع لا تهتم بالتعاون مع الجامعات و مراكز الأبحاث و النقابات مع ان دول هيكونوا متحمسين جدا و هتلاقي عندهم أفكار و ابتكارات ممتازة لكنها دابت في الأدراج لأن أصحاب العمل لا يهتمون بالتطوير قد اهتمامهم بالمبيعات .... المبيعات مهمة جدا لاستمرار العمل لكن التطوير مهم جدا لرفع الجودة و استحداث منتجات جديدة و دراسات أسواق جديدة و كل ده هيكون تقريبا بدون تكاليف بالعكس ممكن الشركة تاخد دعم من الهيئات و الجمعيات المهتمة بالبيئة أو التطوير ( طبعا دي بتكون هيئات أجنبية مش مصرية )





الصناعة المصرية ليها مستوى عالي جدا من الحرفية و الكفاءة لكن لو تم التعامل معاها بالاهتمام و التقدير الكافي , لكن لو انت مش مهتم بالعامل بتاعك ازاي عايز منه جودة العامل الأوروبي اللي شركته بتديله و توفره كل الظروف اللي تخليه يقدر يبدع في عمله !!!!!!
الهجوم على الصناعة ده لالازم يتحلل و نشوف أسبابه و نعالج مشاكله حتى على المستوى الفردي لأن الحكومة مش هتعمل حاجة .... انت لو عندك مصنع , محل , أيا كان نشاطك راقب و ادرس و حلل كيفية رفع المبيعات مش تقليل التكاليف
كل ما ارتفعت المبيعات كل ما قلت التكاليف
التسويق هوه أهم عامل في استمرار العمل ( حسن السوق و لا حسن البضاعة )
عشان تعمل تسويق ادرس السوق اللي بتبيع ليه و شوف طلبات زبنك ايه و كام زبون شاف البضاعة و اهتم بيها لكن مطلعش فلوس .... ده أهم من الزبون اللي طلع فلوس و دفع ( ده محتاج خدمة ما بعد البيع و دي مهمة جدا عشان دي طريقة تسويق غير مكلفة ) ده لازم تفهم ليه قلب في البضاعة و مطلعش فلوس ؟ ايه اللي مش عاجبه ... ايه اللي محتاجه .....

و أخيرا لو حد مهتم بالصناعة و بيفكر يعمل مصنع صغير أو متوسط أنا مستعد أسعاده و أدرس معاه المشروع بدون أي مقابل ...

احنا اللي هنعمل للصناعة بتاعتنا قيمة

جزاك الله خيرا
و الى الامام دائما يا مصر

موضوع رائع و حسيت فعلا انى عملت اجراءات المصنع من اسلوبك الشيق