أهلا بيك يا هندسة , يلا بينا نشجع الناس على الصناعة و نكسر الخوف و الفكرة الغلط ان الصناعة المصرية الجيدة من رابع المستحيلات
اه يا رجالة ده احنا هندخل في الجد اهه
رحتوا فين !!!!
عرض للطباعة
طيب انا هطرح بعض تامشروعات اللى لقيتها على موقع الهيئة العامة للتنمية الصناعية
مشروعات غذائية
إنتاج صلصة الطماطمعصائر فاكهة طبيعية
إنتاج الأحذية الجلدية المخصصة للتصدير
اوانى منزلية من الألومنيوم
طحن كربونات الكالسيوم
كشافات فلورسنت منازل 1، 2، 3 لمبة
إنتاج قطع غيار للسيارات
إنتاج أدوات كهربائية عاديةممكن نختار موضوع من دول نتكلم فيه وربنا يسهل ونقدر نستفيد كلنا
ياااااه اخيرا حد رد عليا ......
تعالى نناقش كل فكرة من دول و نشوف ممكن تكون مناسبة لمين و ازاي ::
طبعا لو انت فاكر احنا كنا حاطين شروط ان انا راجل موظف و مش هينفع أسيب شغلي حاليا و ممكن اكون ساكن في المدينة أو الريف ......
إنتاج صلصة الطماطم , عصائر فاكهة طبيعية
فكرة كويسة لو أنا ساكن في الريف أو قريب منه أو عندي أرض زراعية و ده يعتبر تطوير ليها أو عارف ناس ممكن يساعدوني في توريد أو شراء المحاصيل المناسبة ....
باقي الأفكار كلها مناسبة للشرط بتاعنا ,
طبعا كربونات الكالسيوم ده في رأيي الشخصي و مش بس الكربونات لأ كمان كل الخامات اللي ممكن استخراجها من المحاجر زي الطفلة و الفوسفات و الرخام و الزلط و الرمل و رمل الزجاج و الجبس و الأسمنت و الحديد و كل الصناعات التعدينية كلها تحت عنوان كبير اسمه مشروعات عالية الربحية .....
و ده يعتبر تخصصي الأساسي و اكتر نوع من أنواع المشروعات أقدر اساعد فيه , و لكن النوعية دي من المشروعات تحتاج لرأس مال لاي قل عن 500 ألف جنيه عشان تحقق الغرض من انشائها ,
طبعا المشروعات الصناعية تنقسم أساسا الى نوعين :
1- صناعات معداتها رخيصة و خاماتها غالية ( زي الأواني المنزلية من الألمونيوم )
2- صناعات معداتها غالية و خاماتها رخيصة جدا ( زي كربونات الكالسيوم )
تعالى بقى للأفكار بتاعة قطع الغيار دي ممكن تحتاج الى موافقة الشركة اللي بتصنع السيارة لو انت عايز تورد مكونات لمصنع السيارات و مش هتحتاجها لو هتبيع في السوق من غير ما تحط علامة السيارة التجارية على قطع الغيار اللي هتصنعها .... بس انت مقلتش عايز تصنع ايه في السيارات و خلي بالك ان السيارة بيكون متوسط القطع فيها من 4000 الى 9000 قطعة .....
صناعة اللمبات و الأدوات الكهربائية ممتازة طبعا و ده منتج استهلاكه عالي و مستمر و مفيش فيه موضة تتغير كل 3 أو 4 شهور ....
صناعة الأحذية الجلدية و الشنط و المحافظ فكرة جميلة جدا و معداتها قليلة و رخيصة لكن محتاجة يد عاملة خبيرة ....
يلا يا أستاذ حسين ادينا شوية تفاصيل عن واحد من الصناعات اللي انت بتفكر فيهم و سيب الكربونات أو الطوب الطفلي عليا انا هظبطك فيهم ( كاري بقى )
بص ياباشا انا معنديش معلومات عنهم خالص لكن انا بفكر فى المنتجات دى ازاى
بس انا بفضل المنتجات قليلة التكلفة فى المعدات علشان لا قدر الله ربنا مكتبش توفيق للمشروع الواحد مايخسرش كتير زى
1- الجلود علشان احنا بنستخدم لحوم كتير اوى و ماعتقدش الجلود بتستغل كويس فممكن نستخدم الجلود دى استخدام كويس خاصة لو فى منتجات جديدة او مبتكره زى شنط فرعونية تتصدر بره (فكره مش جديده بردو بس مش كتير)
2- بالنسبة للاوانى الالومنيوم : انا مش بفضلها اوى علشان سمعت ان الالومنيوم مضر بالصحة لو طبخت فيه فهيكون صعب اعمل حاجة حاسس انها بتضر الناس
4- بالنسبة للمبات فكره كويسة بس بردو معرفش محتاجة ايه بس اكيد هيكون راس مالها كتير
افتح انت اى موضوع فيهم وانا هاحول اتناقش معاك فيهم
على فكره الموضوع لما اتثبت الناس مبقتش تشوف
انا والدي كان شغال زمان في ورشه الومنيوم في اليمن ( ومان قوي في الماضي السحيق )
ولما جه مصر كان نفسه يعمل ورشه بس معرفش ايه اللي حصل
لو حد عايز يسال حاجه في الصناعه دي انا ممكن اسالهولو وافيده انشاء الله
السلام عليكم
طيب انا عندي أفكار مشروعات كتيير منها انتم كتبتوها ومنها لم تكتب ولكن هنتكلم في المشروعات اللي طرحتوها ولا اشوف جديد
منتظر رأيك يا مهندس عمر ويا أستاذ حسين عشان نكمل بعض
وربنا يوفقنا جميعا لما يحبه ويرضاه
انا متابع باهتمام
بس فى رايك هل يتفع تبقى شغال موظف فى شركة من 9 - 5 وتقدر تتابع المصنع برده
يعنى هل شايف انه حينجح من البداية
ده مش احباط خالص بالعكس انا متحمس جدا لكن بسالك علشان افهم ازاى ممكن الواحد يحقق المعادلة دى
يا جماعة الخير
اللي عنده فكرة يقولها و نناقشها كلنا
و كل من عنده خبرة في مجاله يفتينا
احنا لسه مبدئناش نتكلم في أي مشروع , احنا بنجمع كل الأفكار و بعدين نرتبها و بعد كده هنعمل موضوع لكل فكرة خترناها نناقش كل تفاصيلها فيه و لا ايه رأيكم ؟
شوف ... معاك حق و ده هيكون صعب جدا في المرحلة الأولى لكن ممكن ربنا يوفقك لواحد ابن حلال و أمين يقف جنبك و يساعدك لحد ما المصنع يمسك نفسه و تتفرغ ليه أو تكون عندك القدرة المادية انك تستقيل و تتفرغ من الأول ... بس فعلا دي نقطة خطيرة و بتفرق من صناعة لصناعة و على حسب امكانيات كل واحد و ظروفه ...
ابدأ انت يا باشا و جهز لسته ....
مشروعات أقدر أفيد فيها :
1- طحن و معالجة كربونات الكالسيوم
2- صناعة الطوب الطفلي ( الطوب الأحمر )
3- صناعة الأدوات المنزلية من الالمونيوم
4- محاجر الرملة و الزلط
5- الصابون السائل
6- الصابون الصلب
و ممكن أساعد بدراسة أي مشروع أو فكرة أخرى