افضل شركات التأمين على السيارات

**Elsayed** · 13-12-2010 08:53 AM

أعضاء المنتدى الكرام والاخوة الاعزاء ارجو ان يكون الجميع بخير ان شاء الله.
فى البدايه احب ان اوجه الشكر لكل اعضاء المنتدى الذين لا يتأخرون عن اعطاء النصيحه ونقل خبرتهم لباقى الاعضاء فى هذا المنتدى الجميل حيث يمكنك ان تجد كل المعلومات التى تريد ويمكنك ان تأخذ قرار فى بيع او شراء سياره.
واحب اخص بالشكر للاستاذ احمد Ahmed.TV حيث اتصلت به ليساعدتى فى تركيب دى فى دى فى سارتى نيسان تيدا وبصراحه اتصل بالتوكيل وذهب معى الى هناك واخذت خصم خاص للتركيب من اجله عندما ركبت فوج لايت حيث كان مفروض ادفع 250ج ولكن دفعت 120ج فقط وهذا هو المعتاد منه الى كل الاعضاء.

اريد الان ان اعمل وثيقة تأمين شامل على عربيتى ولا اعرف اى شركة هى الافضل فارجو من الاخوه الافاضل اعطائى النصيحه اى شركة اختار وما هى النسبه والامتيازات.

انا اتصلت بشركة رويال ووجدت النسبه 3.5% ولكن هادفع 150ج من اى مطالبه بالاضافه الى 10%من قيمة الفاتورة لو تم الاصلاح فى التوكيل.
منتظر مداخلتكم ان شاء الله

**ygamgoum** · 13-12-2010 12:49 PM

مبروك يا باشا وبالنسبة للتامين انا سمعت ان شركة اليانس كويسة وكونتاكت كار بس انا معملتش تأمين وربنا يحفظلي العربية لأن كدة افضل مادام التأمين مش اجباري

**SonaSteel** · 13-12-2010 02:05 PM

السلام عليكم
بسم الله والصلاة والسلام علي رسول الله
ا/السيد كيف حالك ..... زي ما ذكر اخي ygamgoum لو التأمين مش اجباري فالافضل والاحسن انك متعملهوش (انا مش عارف حكمه ايه بالظبط)
لكن لو اجباري وطبعا ده في العربيات التقسيط ........ انا طبعا دورت علي شركات كتييير
اغلاهم اليانز .......... واقلهم لقيته قناه السويس
لكن بالنسبة للعقد بتاع كل واحده فيهم مش عارف والله .......... انا عن نفسي هاأمن مع قناه السويس ان شاء الله .... يعني سمعت عنها كلام خير وشركة محترمة وطبعا المعدل بتاعها قليل وده اللي عايزه دلوقتي ........ :)) (القسط بقي)
ولو عايز تسأل علي حاجة معينة فيها ممكن ادي لحضرتك رقم موظف هناك ان شاء الله
وفي برده شركة الدلتا للتأمين معايه نمرة موظف هناك
بس لو ربنا ييسرلك الحال والعربية معاك كاش .... متفكرش في التأمين وتوكل علي الله .......

على العموم انا هابعت لحضرتك نمرتي علي الخاص ومفيش مشكلة لو احتجت اى خدمة....... وربنا ييسرل الحال

**Ahmed.TV** · 13-12-2010 04:27 PM

مبروك تركيب الكاسيت والفوجات يا فندم
انا معملتش الا الواجب يا استاذ السيد

واتشرفت بمعرفتش بيك وبمقابلة حضرتك طبعا
نتمنى نشوفك قريب تانى لما ترجع من السفر بالف سلامة

ومستنين تسالنا بقا على اكسسورات التيدا بره مصر زى الاسبويلر بالذات
باذن الله خصوصا الاصلى منه

بخصوص شركات التامين زى ما قالك العضو المحترم حسين باشا افضلهم قناة السويس

وياريت حسين يقولنا تفاصلها كام بالظبط

وياريت يا حسين باشا تسالنا ايه نظام الشركة بتاخد نسبة كام على العربيات المستعملة اللى موديل 2009 و2010 تيدا

وكمان كان فى شركة اليانز فى عضو حبيبى اسمه على معانا حكلمه يسالنا بردوا قد ايه نسبة اللى بتاخدها سواء على العربيات موديل السنة او المستعملة

**Ali_Abo_Amr** · 14-12-2010 01:17 PM

السلام عليكم ....
اهلا بيك يا استاذ السيد ومبروك عليك التيدا
بالنسبة لحكم الشرع فى التأمين فأنا أفضل انك تسأل اهل العلم ... زى دار الافتاء أو شيخ ذو علم تعرفه ...
أنا كنت عامل تامين مع اليانز اول سنة بس لكن دلوقتى انا عامل تأمين مع ربنا ....
وهى كانت النسبة 3% وبادفع نسبة تحمل فى اى مطالبة 150جنيه+10%
كان عندى الفانوس الخلفى اتكسر وكانت المطالبة بـ 700 جنيه ودفعت 150+70=220 جنيه
وبعد كده اتصلوا بيا علشان التجديد بس انا كنت قررت انى مش هاجدد واعمل تأمين مع ربنا (ممكن ابقى احكيلك على نظامه بعدين)
ولو فيه اى سؤال تانى انا تحت امرك ....

وربنا يسترها معانا جميعا ...
اللهم قنا واصرف عنا شر ما قضيت ...

**Elsayed** · 15-12-2010 09:03 AM

شكرا ليك يا استاذ ali_abo_amr هو فعلا انا اتصلت بيهم وقالو ليه نفس الكلام ده والشروط.
طبعا الله خير حافظا واحنا بناخد بالاسباب فقط وانا بعمل زيك كده مأمن مع ربنا وانا فاهم قصدك ايه طبعا
انا شكلى كده هاكمل زى ماانا وهاسيبها على الله وربنا الستار.
وشكر لكل من شارك برأيه وابدى النصيحه