الحقوني يا رجالة انا اتجمد خلاص !

**amir** · 13-12-2010 05:15 PM

المشاركة الأصلية كتبت بواسطة computerking

فل يبقى كدة مشكلة السقف اتحلت بالبلاك و الاسمنت و ميل و مزاريب و الدنيا تبقى فله من فوق !

الارض 90 % منها متغطي بسجاد و هيا سراميك اصلاً

الستاير مش تقيلة اوي و اصلاً مكنش في ستيار ! ملاية و مسمارين ديه بقت الستارة :) بس هشتري ستاير ان شاء الله !

ايوة عليك نور بالنسبة لشرايط الاسفنج ديه قصدك بنزلقها على عتب الشباك عشان بيجيب من تحت الحلق الي تحت ميه ؟ و يعزل الهواء و كدة و ايه ؟

مهوا لو الواحد قعد يلزق لوح كروتن على الحيطة على اساس انها شكل اعتقد انها ممكن تعزل شوية حرارة ؟

في حل واحد لسه قايلهولي بالنص ! يا عم و انتا تاعب دماغك ليه ! هات تاكيف و ركبه و اديه يا معلم طول ما انتا نايم يظبط الحرارة على حرارة حلوة تكيفك و تبقى مبسوط اخر انبساط ! زي العربية يعني لما الواحد يقفل الشبابيك و يظبط التاكيف على 20 ولا 22 و تحس كانوا جو خريف حلو قوي :)

ايه الكلام ؟ انا شايف انوا ممكن موضوع العزل ده بتاع الرولات الي قلتوه ممكن يكون غالي ! اما السقف غالي مش غالي هيتعمل بس اعتقد دول شكرتين اسمنت و علبة بلك يعني مش غالين ولا انا متهيئلي ؟

انا مش هاتكلم عن سبب سقوعيه الشقه لأن في حاجات كتير ممكن تكون السبب و انت مش موضح او بالاصح بتقول في اجزاء معينه كلام كتير لكن في حاجات مقولتش عنها حاجه
مثلا موضوع عمارتك دي حواليها عمارات من كل ناحيه اعلي منها ولا لا
هل بتلاحظ مرور الهوا و الرياح بأسلوب معين بين العمارات المحيطه و عمارتك
هل شقتك قبلي ولا بحري

انا اللي عايز انبهك ليه مشكله بايخه شويه

السقف اللي شرب ميه و الحيطان كمان حاليا فيهم ميه
الميه دي علشان تتبخر هتسحب حراره بمعني ان الحيطان و السقف هيسحبو اي حراره ممكنه من جوه الشقه
و بسبب كده الشقه هتاخد فتره محترمه علي بال ما الميه اللي في الحيطه تنشف
بالنسبه للدهان الحديث اللي اتكلمت عليه فللاسف راحت عليه
انت مضطر لما الدنيا تبطل مطر تحرق السقف و يمكن تضطر تحرق الحيطان و الموضوع هيبوخ لأنه حتي بعد الحرق لازم الحيطان تتهوي في جو جاف لمده شهرين تلاته تقريبا

لو حطيت سجاد علي الحيطان هيشرب بخار الميه و هي خارجه و النتيجه ريحه في منتهي السوء

**amir** · 13-12-2010 06:12 PM

كده تبقي الحلول اللي ليك عندي محدوده قوي للاسف

شقتك بحري

نفس طول العماير و ان كان ارتفاع 7 ادوار يعتبر عالي و ملقف هوا زائد الشقه بحري

الله يعينك بس لو قدرت تأجر شقه تانيه مؤقتا لغايه ما تظبط الوضع في شقتك الحاليه هيكون احسن ليك خصوصا ان الدنيا داخله علي شتا و انتو اسكندريه عندكم متتوصاش في موضوع المطر

انا طبعا خبرتي علي قدي في المواضيع دي و يمكن حد تاني من الاعضاء يكون اكتر خبره مني و يفيدك اكتر

بس لو ده محصلش ممكن تشوف شركه مقاولات و تشطيبات و تسأل اكتر من شركه ييجو يعاينو و يقولك علي التفاصيل و التكاليف

اما بخصوص موضوع حرق السقف فده مش من خيالي ده حل من الحلول اللي بتتعمل فعلا لأن مهما ان معجنت و بيضت الحيطه هتفضل تنشع لغايه ما تخلص الميه اللي فيها
ده يبقي الحمد لله لو محتاجتش اكتر من كده لأني اعرف ان ممكن الحيطان تتكسر و تنزل و تتعمل طوب من الاول و جديد, بس بالنسبه للسقف في النقطه دي معرفش

---------
اضافه:
حرق السقف بيكون باستخدام حاجه زي انبوبه غاز و حاجه كده زي المدفع بتاع السمكري و اكيد مش انت اللي بتعمله (لا تفتكر انك تولع انت شخصيا فيها )

**amir** · 13-12-2010 06:21 PM

عارف كمان لو طلبت من المشرفين (عن طريق تقرير مشاركه سيئه تحت مشاركتك انت) لو طلبت منهم نعديل اسم الموضوع و ليكن شقتي غرقت ميه و السقف و محتاج مساعده, هيكون العنوان دال اكتر علي المحتوي و هتلاقي اللي عنده خبره او تجربه بيشارك فيه عكس اسم الموضوع الحالي و اللي ممكن يتفسر اكتر من تفسير

**mahmoud_magdy** · 13-12-2010 09:51 PM

حضرتك مضطر تستنى للصيف علشان تاخد اي خطوه عشان تتم عملية العزل
اعتقد ان لازم يكون السطح الجانبي او السقف يكون ناشف
والعمليه مش هتبقى مكلفه
فوق السطوح طبعه عازله (بلاك اسود) وطبقة رمل وفوقيها بلاط (وده هيحد من الحراره والبروده والرطوبه
وطبقة بلاك على الحيطان من بره وفي ناس بيسيبوها او ممكن تدهن بويه بعدها

**sara2001** · 13-12-2010 10:13 PM

حضرتك ممكن تستخدم دفايه قويه مؤقتاً

المشاركة الأصلية كتبت بواسطة amir

انت مضطر لما الدنيا تبطل مطر تحرق السقف و يمكن تضطر تحرق الحيطان و الموضوع هيبوخ لأنه حتي بعد الحرق لازم الحيطان تتهوي في جو جاف لمده شهرين تلاته تقريبا

الكلام ده ضروري جداً
لو فضلت الرطوبه في السقف والحوائط كل ما تدهن
طبقة المعجون والدهان وطبقة المحاره هتشقق تاني
لازم يجف تماماً وده بيتم بالحرق او بتكسير طبقة المحاره
وصولاً للطوب

**amir** · 14-12-2010 01:56 AM

المشاركة الأصلية كتبت بواسطة egyzizo

أنا عندى كام شباك كده بينفسوا هوا وعايز أحل الموضوع ده مؤقتاً بحل غير مكلف ، فيا ريت الإفادة عن موضوع شرايط السفنج دى ببتباع فين وفكرتها ايه لعل وعسى ..

عند محلات الادوات المنزليه عموما و السوبر ماركت الكبيره في اقسام الادوات المنزليه
دي بتكون شريط لزق من جهه و من الناحيه التانيه عباره عن سفنج
نفس فكره اللزق الدبل فيس بس دي وش لصق و وش سفنج
بتنضف مجري الزجاج الالوميتال و بتلزق اللزقه دي طوالي مع الشباك
بحيث ان السفنج هيكون مواجه للجزء المتحرك من الضرفه الزجاج
و الفكره انه يسد الفتحه شويه اللي بتكون بين الضرفه و الحلق في الالوميتال المسمي سعد

و مش غالي ده العلبه ب 4 جنيه تقريبا

و في حل اكتر رخصا و مش مكلف اطلاقا
بل ورق جرايد بميه و اعمله عجينه و احشر منه و لما الميه تنشف الورق هيكون زي الجبس بس الكلام ده لو الشباك عندك ينفع فيه الكلام ده اصلا