سؤال عاجل الى الأخ ahmed.tv

**adelahmed5** · 13-12-2010 03:29 PM

معلش انا مقدر انفعالك وعندك حق فيه

انت روحت كمان فى يوم سبت وبيكون فى ضغط دايما على كل مراكز الخدمة عشان يوم اجازة لاغلب الناس اللى بتروح تعمل صيانتها فيه,
فيمكن يكونوا خمنوا غلط تشخيص المشكلة لما سمعوها من وصفك , لان التزيق احيانا ممكن يكون من كذا سبب , وطبعا اكيد محدش جرب العربية بعد ما عملوها

وموضوع التزيق عند حضرتك .. ممكن تكون كاوتشة التراب عاوزة تتغير وفيها مشكلة
حصلت مع ناس وغيروها وهى لسه فى الضمان وكان التزيق بسببها

ياريت حضرتك توصفلنا الصوت والتزيق ده ,وبتسمعه امتى عشان نقدر نقولك ممكن يكون من ايه
من كاوتشة التراب او من حاجة اخرى

نصيحة:
بلاش حد يروح اى مركز خدمة يكون يوم سبت عشان بيكون فى زحمة جامدة
اللى عاوز يروح يكون بيعمل صيانة عادية ومش بيشتكى من حاجة
اما اللى عنده مشكلة فى سيارته يكون يوم غير سبت افضله

اولاً أنا متشكر جداً لأهتمام حضرتك اما عن صوت التزيق زى ما قلت لحضرتك من تحت عند الدواسه كل ما ادوس بنزين او فرامل بأسمع صوت قريب لأحتكاك بلاستيك بيزيق ياريت تكون الافاده عند حضرتك و انا ا أسف لعدم الرد لأنى كنت مشغول شويه فى معرض اليكتريكس و جزاكم الله خيراً

**Ahmed.TV** · 13-12-2010 04:46 PM

اعتقد ان حضرتك لسه كنت عامل صيانة ال1000 تقريبا قريب , استنى لما تروح صيانة ال5000 وتخليهم يشوفوا الموضوع ده

صوت التزيق البلاستيك ده وانت بتدوس دى حاجة بسيطة الدواسات عاوزة تربيط بس

انا عندى بردوا فى صوت تزيق جى من دواسة الفرامل بيظهر كل ما بدوس عليها ومش معطيه اى اهمية

ولما سالت قبل كدا قالولى بتكون عاوزة تتربط وبينظفوا الدواسات دى عشان يروح منها التزيق ده

**Ahmed.TV** · 13-12-2010 09:53 PM

شوفت اللى قولتلك عليه قالك عليه المهندس وانا مكنتش واخد بالى

هو فعلا محتاج تنظيف وتربيط وظبط

وهما قالولك نفس الكلام ده , بس هما تلاقيهم نسيوا يعملوا كدا اصلا

لان الحاجات اللى زى دى بالنسبة ليهم مش مهمة فمحدش ركز عليها وافتكروها

وعشان كدا خالى الملاحظة دى المرة الجاية فى الصيانة بتعتك يكتبها المهندس فى امر التشغيل اللى بيكتبه , وهو بيكتب فيه حيتعمل كذ وكذا فى الصيانة , قوله ياريت تضيف كمان التزيق اللى جى من الدواسة عشان ينظفوه واكتبه , ومتقوليش حاضر حقولهم

انا اوقات لما بقولهم على حاجات زى دى كتير وربط كراسى كمان محدش بيفتكر عادى , ومع انى بكون كاتب ورقة صغيرة والزقها على الزجاج , وبردوا احيانا بيطنشوا

فالافضل زى ما قولتلك , بلغ المهندس يكتبها فى امر التشغيل عشان هما بيبصوا على امر التشغيل ده وبيعملوا اللى مكتوب فيه

ونصيحة :

اى ملاحظة على العربية لاى حد يبلغ بيها المهندس ويكتبها فى امر التشغيل , وده افضل حل لعدم نيسانهم لاى طلب بنطلبه وشكوى فى السيارة

وان شاء الله خير