الموضوع: أرجو التثبيت : اقتراح لحل أزمة المقطورات

فى ظل أزمة المقطورات اللى ماحدش عارف هاتنتهى امتى انا عندى اقتراح بسيط لحل الأزمة دى واتمنى صوتى يوصل لحد لأن ساعات بيكون الحل قدام عينينا واحنا مش شايفينه
والاقتراح كالأتى :
المشكلة : ان شداد المقطورة اللى فى أخر العربية النقل شداد واحد بس وهو ده السبب الرئيسى فى ان المقطورة بتتمرجح يمين وشمال
الحل : طيب ليه مايتعدلش الجزء ده فى العربية وبدل ما يبقى شداد واحد يبقوا شدادين ؟ واحد يركب فى اقصى اليمين والتانى يركب فى اقصى الشمال وبالتالى المشكلة هاتختفى والمقطورة اللى ورا عمرها ما هاتتمرجح ولا تعمل زى التعبان أو على الاقل نبقى ساهمنا فى تخفيض المشكله بنسبة 90 % على الاقل

والموضوع ده مش مكلف ابدا وحتى لو مكلف كتير يعنى مش هايساوى حاجه جنب تمن مقطورة جديدة أو شاحنة زى ما الحكومة بتقول !!!!!!!!

واقترح مثلا ان يتم انشاء ورش خاصة بالادارة العامه للمرور تقوم بإجراء هذا التعديل على المقطورات وبالتالى خلق فرص عمل جديدة للشباب العاطل احسن ما يبقوا بلطجيه ولا تجار مخدرات

ياريت بس لو حد عجبه الكلام ده يقولى رأيه ونفتح المجال للمناقشة

المشاركة الأصلية كتبت بواسطة maserati

السلام عليكم و رحمة الله و بركاته

الاقتراح بتاع سيادتك ده ممتاز فعلا و عملى جدا و أنا بأؤيدها فعلا لأنى كنت شوفت حاجة كده, بس أنا مش عارف هى بتتعمل ازاى, هى أن فى كندا , كانت من المنتشر هناك , العربيات البيت دى اللى هى بتبقى عربية و ملحق بيه بيت كامل و متكامل , أكيد سيادتك عارفها و كان اللى بيبقى سايق البيت دة على الطرق السريعة بسرعة حوالى 120كم/س , كان بيبقى شادد العربية الملاكى بتاعته و موصلها بشدادتين على الجنبين اليمين و الشمال , مش شدادة واحدة فى النص و كانت بتبقى بتجرى على ال4 عجلات بتوعها عادى جدا و بييقى متوصل بيها كابل فعلا , عشان تنور فى الstop لما العربية اللى قدام توقف , بصراحة كان تكنيك جديد أنا عمرى ماشوفته و فعلا , تعديل المقطورات فى مصر بالشكل ده هيحل المشكلة بشكل كامل , بس الكلام ده امتى؟؟؟؟

لو كان تعديل العربيات النقل و المقاطير, الغرض منه الأمن و المتانة و الحد من الحوداث , لكن الغرض مش مده خااااااااااااالص , لأن الحداية مابتحدفش كتاكيت , الغرض عبارة عن فرصة ممتازة للاثراء للجماعة بتوع المقاطير زى أباظة و الشركة العالمية و الناس التقيلة دى , لكن مش خوف من الحكومة على الشعب المصرى , زى ماحصل فى حزام الأمان و زى مابيحصل فى طفاية الحريق اللى لازم تكون بافاريا , أكيد لو الحكومة خايفة على الشعب من الحرايق , كانت تسيبه يجيب أى طفاية و غيره من الفرص الاحتكارية للاثراء .

فالغرض مش الحد من الحوادث لكن الغرض منه السبوبة اللى هتيجى للعتاولة الكبار بتوع تصنيع المقاطير .

و لله الأمر من قبل و من بعد

المشاركة الأصلية كتبت بواسطة sharaf2009

اسمها السى دولى وهى فعلا منتشرة فى كند وعموما اقتصاد كندا بيقوم على الاخشاب وبيعتمد على النقل الثقيل لنقل الاخشاب علشان كدة هم متقديمين فى موضو النقل لتقيل

بالظبط هو ده اللى انا اقصده فعلا وفكرت فيه من غير ما اعرف انه معمول فعلا بره بس لحد إمتى هنرضى باللى يحصلنا من غير مانفكر فى حلول أو نستعين بتجارب الدول المتقدمه لأن ممكن الحل ده يقنع ألاف من اصحاب المقطورات لأنه هايبقى أرخص كتيييييييييييييير قوى من انهم يدخلوا فى أقساط عربية جديدة ويوفرلهم جامد قوى
وأشكر كل الاعضاء اللى ساهموا بالرد على الموضوع سواء بالكلام أو بوضع الصور وده طبعا إذا كان فيه مصلحة لكل الناس ف ده طبعا ليعم الخير على الجميع بإذن الله