حكايتي مع مأساة اسمها اتصالات dsl

**أبو صلاح** · 14-12-2010 02:05 AM

من أطرف القصص الي حصلت معايا من شركة اتصالات

كان عندي مشكلة معاهم ان خطي كان ليمتد وكنت عايز احوله لانليمتد علشان كل شهر بدفعلي بتاع 3 جيجا استهلاك زيادة
ومن هنا بدأت الكوارث
اولا قالولي عليك شهر - اللي هو أصلا لسه مخلصش- لازم تدفعه قلت ماشي وبرضه الخط ما اشتغلش

دبسوني اني اشتري جيجا ب 10ج علشان الخط يشتغل من تاني ويقدروا يحولو علشان الباقة خلصت
قلت ماشي
شغالنا وقدمنا الطلب واترفض برضه من غير ما حد يعبر فينا اترفض ليه ؟؟؟؟؟؟؟؟؟
وبعد شوية حوارات وقصص قررت اني أقفل الخط وانهي التعاقد
لقيت واحد كلمني وراح مديني عروض كالآتي
قالي هنزلك الجيجا ببلاش
وهينزلي خصم 50% لمدة 6 شهور على أي باقة انا موجود عليها
وهيتم التحويل فورا
قلتله ماشي مشكور
قفلت معاه بعده بساعة بشغل النت لقيته واقف
اتصلت بخدمة العملاء قلتلهم انا لسيه نازلي جيجا من ساعة لحقت خلصت
ردوا علي اغرب رد
قالي اصل انت كان عندك استخدام زيادة فوق ال 2 جيجا الاساسيين ولما اشتريت جيجا كمان خدو الفرق منها علشان كده الخط وقف
يا ولاد التيت
قلتلهم انا خطي بقى انليمتد قالولي الطلب اترفض لحد أول الشهر
يا ولاد التييييييييييييييييت
قلتلهم انا لي تخفيض 50% لمدة 6 شهور
قالولي مفبش حاجة نازلة على السيستم
يا ولاد التيت

قلت لأ مبدهاش
بعت أخويا الفرع علشان يوقف الخط
طبعا هاتك يا عروض
واحنا رفضنا تماما - طبعا ما احنا اتلسعنا من عروضهم اللي لبستنا في الحيط

وفي الاخر دفعنا
اشراك الشهر الجديد جزئي علشان كان الشهر الجديد بدأ بس على النظام الجديد الانليمتد (فجأة واحدة الطلبات المرفوضة اتنفذت واحنا منعرفش والنت عندي مقطوع لنفاذ الباقة)
ودفعنا الجيجا الزيادة

عايز أقول ان القصة دي أنا عيشت معاها من يوم تقريبا 15 حتى يوم 6 تقريبا للشهر اللي بعديه

وبجد أنا بقول عن تجربتي أنا الشخصة أسوأ خدمة عملاء شفتها في حياتي
وأجمل كلمة بسمعها لما ميلاقوش معايا حل (معلش اصل السيستم دلوقتي واقع وهنكلمك كمان ساعتين او السيستم بيتعمله أبديت دلوقتي اتصل كمان شوية)
والله تقريبا بقيت كل لما اتصل بيهم اسأله أقوله أخبار السيستم عندك ايه الاول ؟
هههههههههههههههههههه

حاجة مسخرة والله

دلوقتي الحمد لله جيبت usb فودافوان ب 150 في الشهر وعايش حياتي والله بمعنى الكلمة
سرعة اقوى بأف مرة واستخدام غير محدود والدنيا فل
وبجد أقوى خدمة عملاء

**AhMeD EzZ** · 14-12-2010 02:30 AM

غريبة و الله يا ابو صلاح
مع انهم معايا غير كدة خالص و الله
قمة في الذوق
دة حتي لما في مرة النت فصل يومين
الفاتروة جت مخصوم منها يتاع 20 جنية او حاجة زي كدة
زي تعويض
و اتصلو بيا اكتر من مرة يعتذرو
بس تظل مشكلتهم سياسة الاستخدام العادل

**pro_samir** · 14-12-2010 02:48 AM

بصراحه خدمة العملاء في اتصالات فيها ناس يجيبو شلل ، انا مجربهم في الموبايل و النت .. النت كنسلته خالص والموبايل ماشيه كويس

لما بلاقي اللي بيكلمني بيفتي او مش فاهم اقوله خلاص شكرا واقفل واتصل تاني لحد ما يرد حد فاهم

بس انت غلطان علشان مكلمتش كبير اتصالات في المنتدي يظبطك

**medomaster** · 14-12-2010 03:18 AM

انا بردو مفقوع منهم جدا ...شركة سيئة بكل المقاييس
انا اصلا كنت مشترك انترنت مش انترنت ايجيبت وكانو ماشاء الله زي الفل والسرعة ممتازة والدعم ممتاز وكل حاجة ..المهم جه موضوع تطبيق سياسة الإستخدام العادل وقالو على الناس القدام لأ على الجداد بس ..المهم انا قلت كويس ..بعد الموضوع دا ب 3 اشهر لقيت ان الشركة اتحولت اتصالات (اتباعت ) وان انا بقيت تبع اتصالات قلت ادام هو هو نفس الخط ونفس كل حاجة مفيش مشكلة ...انا اصلا شغلي محتاج داونلود كتير وابلود كتير انا مشترك 4 ميجا ...المهم بعد اول 20 يوم كدة لقيت السرعة 128 ؟؟؟؟؟ نعم ازاي يعني اكلمهم يقولولي حضرتك عديت الليمت ؟؟؟ليميت ايه يا ولاد الحلال انا مشترك 4 ميجا ان ليميتد وبدفع قد كدة كل شهر ..قالولي ماهو الأن ليميتد ليميتد بردو ..قولتلهم امال ليه مسمينو كدة قالي عشان الليميت بتاعه كبير .....قولتلو اااااه وقمت قافل ومتصل بجهاز تنظيم الغتصلات على اساس ان انا من العملاء القدام قالي لا حضرتك اتنقلت عميل جديد لإتصالات وهيطبق عليك كل انظمة الشركة ..طبعا قفلت وانا بغلي من الغيظ وقلت مبدهاش انا هوقف الخط وعندي خط تاني في البيت هقدم على اي سركة تانية (لينك مفيهاش السياسة دس ) المهم قدمت على لينك 512 الأول عشان بعد ما يركب افصل اتصالات واشتغل عليه وقعدو 5 أيام ودخل النت ...هيييييييييييييييييييييه :):)
المهم رحت اتصالات بقى أقولوهم وقفولي الخدمة .....اتصدمت ....قالي الخط بإسم والدك وهو لازم يجي يوقفو بنفسه ...قولتلهم ازاي انا طول عمري بدفع واعمل كا حاجة قالولي سيستم جديد ...قولتلهم طب انا والدي بره مصر ومش هيجي الا بعد سنة قالولي مالناش دعوة .....يا جدعان ازاي كدة ..المهم طلعت من عندهو وانا اغلى وقمت طالع على لينك رفعت السرعة 4 ميجا وقلت والله مانا دافع مليم في اتصالات ..وبقالي اهو 4 شهور شغال على لينك وزي الفل ولسة امبارح واحد من اتصالات اتصل بيا بيقولي عليك 1400 جنيه استخدام 4 شهور ....قعدت اضحك ضحك وقولتلهم ابقو خدووهم من الحاج مش الخط بغسمه ومتتكلمش هنا تاني انا معرفش حد بالإسم دا :)

**تامر.محمد** · 14-12-2010 10:53 AM

المشاركة الأصلية كتبت بواسطة medomaster

انا بردو مفقوع منهم جدا ...شركة سيئة بكل المقاييس
................................... ....قعدت اضحك ضحك وقولتلهم ابقو خدووهم من الحاج مش الخط بغسمه ومتتكلمش هنا تاني انا معرفش حد بالإسم دا :)

قول لهم شيلوا العدة

على فكرة .... اظن كان ممكن تخلي والدك يعمل لك توكيل و يبعته و الدنيا تمشي

**medomaster** · 14-12-2010 12:21 PM

المشاركة الأصلية كتبت بواسطة tlrsiap

قول لهم شيلوا العدة

على فكرة .... اظن كان ممكن تخلي والدك يعمل لك توكيل و يبعته و الدنيا تمشي

انا قولتلهم كدة ...بس قالولي لازم تكون معدي ال21 يا جدعان انا معايا بطاقة وعندي 20 سنة مش عيل صغير يعني قالولي مينفعش ....عشان كدة اتصرفت كدة وكمان عشان انا عرفت ان الخط لما اتنقل من ايجي لإتصالات اتنقل بالإسم بس يعني لا رقم بطاقة ولا اي حاجة فقولت هما اللي جنو على نفسهم

-

-

الموضوع: حكايتي مع مأساة اسمها اتصالات dsl

LinkBack

أدوات الموضوع

عرض

-

-

-

-

-

المواضيع المتشابهه

للبيع usb 2 اتصالات جداد بضمان من اتصالات +خطوط الانترنت

قنبلة اتصالات الجديدة - اتصالات Yes من اتصالات أهلا !

مأساة اسرة (بالصور)

مأساة مع اول يوم

الكلمات الدلالية لهذا الموضوع

المفضلات

المفضلات

ضوابط المشاركة