العربية اتخبطت وماعرفتش اتصرف اذاى

**meero_boy2000** · 15-12-2010 09:31 AM

اولا الف سلامه عليكم وعلي ابنك الحمد لله انها جت علي قد كده اعتقد من وجهه نظري المحدوده انك اتصرفت صح لاني كنت مكانك وحصل نفس الموضوع وخليت الراجل يمشي وحمد ربنا واعلم دائما انها حاجه فدت حاجه وكويس انها جت في صاج واعلم ايضا انك لو وقعت في اي مأزق زي كده لقد الله ربنا هيوقفلك ولاد الحلال اللي زيك صدقني حصل معايا عن تجربه

**م. عصام مهنى** · 15-12-2010 09:47 AM

قدر الله ما شاء فعل
الواحد بيزعل شوية وبعدين يقول الحمد لله اللى جت على قد كدة
ودائما الواحد يتذكر الاية الكريمة :

{وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ
وَاللَّهُ غَفُورٌ رَّحِيمٌ } النور 22

**shaddadfalcon1** · 15-12-2010 10:12 AM

الحمد لله وفدا ابنك

انا اتخبطت كذا مره وكل مره كانت بتبقي كسر اكصدام مثلا وكنت بمشي وببقي مضايق بس بقول الحمد لله

لحد مامره الطريق واقف وكان طريق رايج جاي ولقين نص نقل جاي من الشمال وفي واحد اصلا جاي في وشه وده قام رامي عليا كسر لي المرايا
مسيبتوش غير لما اخدت منه 100 جنيه تمن المرايا ولحد دلوقتي والله ماجبتها بس ده ادبا ليه لانه غشيم وغبي مع انه اعتذر كتيير بس لانه كان لئيم وكان بيحاول يكلفتني بكلمتين

لكن لو حد محترم يبقي خلاص والحمد لله

**mailo** · 15-12-2010 10:54 AM

أنا لو مكانك كنت هاعمل كده ولو كنت اخدت منه فلوس برده ماكانش حد هيلومك وكان هيبقى صح برده

أنا ياما اتظبط من ناس غشيمة في الطريق بس المرة الوحيدة اللي خدت منها فلوس من الراجل كنت راكب مع مراتي فعارابيتها وكنا ساعتها لسة زمايل فالشغل وواحد افل عليها افله غبية فملف فالتحرير وهياكانت لسة مظبطة العربية وكانت أول خروجه بيها نزلت لقيت الراجل مش عاجبه إني نازل متضايق وبقوله اركن على جنب والعظمى خدته قوي ويقولي هصلحهالك قلتله طب تعالى بقى وخدته لحد دارالسلام اللي هي كانت أبعد مكان أعرفه ممكن يصلح الخبطة وخالتو يدفع تمنها للصنايعي بس صعب عليَّ فيالاخر برده وكنت عايز ارجعله الفلوس بس للأسف ده ماكانش بايدي عشان مش عربيتي ولا فلوسي .. :(

**nonetta** · 15-12-2010 11:47 AM

قدر الله وما شاء فعل
دة قضاء وقدر من ربنا
ويمكن ربنا اللي عمل كدة علشان يشغلك شوية من زعلك على ابنك ربنا يشفيهولك يا رب
وتقول الحمدلله قضا اخف من قضا
ربنا بيفدي حاجة بحاجة
لو حطيت في قلبك يقين بكدة ربنا ان شاء الله هينزل السكينة في قلبك وتنسى اللي حصل
اما تصرفك الراقي محدش يلوم عليك فيه وما تندمش على حاجة كويسة عملتها وفعلا هوة ممكن يكون معذور خاصة انه اعتذر لك

**hosar** · 15-12-2010 01:18 PM

طالما الراجل غصب عنة و مش مستهتر يبقى انت صح طبعا
و حتلف الأيام و تعمل انت زية بالظبط و حيتعمل فيك إلى انت عملتة

**Ahmed Mubarak** · 15-12-2010 02:04 PM

شكرا لردوداكم جميعا

**M.Osman** · 15-12-2010 03:18 PM

هي فعلاً بتكون على حسب الموقف و طالما الراجل اعتذر و كدا يبقى ممكن تعديها عادي و حمد لله على السلامة

**alaa99991111** · 15-12-2010 03:53 PM

اولا الف سلامه لابن حضرتك

انا كنت اتعرضت لموقف كنت راكن عربيتي بشارع جانبي وكنت واقف قريب منها لا قيت واحد داخل فيها من الجنب في الباب خلف السائق لانها كنت واقف بعد ملف بحوالي 4 امتار ومعرفش يلم نفسه للطريق وكل ما يرجع ورا ويجيب المارشدير يتوتر ويجيب الاول ودش في العربية 3 مرات لغاية ما نص الباب خلف السائق بالعتب اتعجن انا خرجت عن شعوري وبعد كده هديت وكان راجل كبيير و اول مرة يسوق عربية مستعملة لسه شاريها بس رحنا علي سمكري قدرها ب 150 جنيه وقلت رش كمان 150 بس معملتهاش عنده واخدت من الراجل 300 جنيه ورحت سمكرتها في مكان تاني ب 300 جنيه وبدون الرش

انا وعت لما ثرت علي راجل كبيير بس كا ن شكل العربية وحش و هو تقبل كل شئ بصدر رحب وطالما بسيطة عندك يبقي ربنا يباركلك ويرزقك ان شاء الله

**al_manara** · 15-12-2010 06:05 PM

الحمد لله علي سلامتكم والحمد لله انها بسيطة
الحاجة الجميلة والنادرة دلوقتي ان حد يغلط ويعتذر .
مرة كنت واقف وواحد بعربية نقل دخل فيا من الجانب ورا . كسر لي الفانوس الخلفي وكان لسة جديد . الجميل ان نزلة بيزعق ويقولي انت غلطان الناس الي في الشارع كلها اتلمت وقالتة ياراجل حرام عليك اذاي هو غلطان . وبصراحة بعد ما لقيتة ماعندوش دم ماسيبتوش الي لما دفعتة تمن الفانوس .
واحد تاني عمل عاملة شبها بس كان راجل زوق جدا . قعد يعتزر وقالي الي باظ هاصلحهولك . قولتة الحمد لله حصل خير وكلها حاجات بسيطة وسيبتة ومشيت .

ومرة واحدة ست وانا راكن جنب الرصيف مش صف تاني كانت لسة بتسوق جديد دخلت لي في الباب بتاعي والي وراة والرفرف الخلفي المهم جنب العربية كلة واتحك بطول العربية مع تطبيقة بسيطة . انا لقيتها نازلة من العربية بتعتذر ووشها احمر وهاتعيط . قولتلها حصل خير المهم ماتمشيش في الشارع بالعربية وانتي لسة بتتعلمي حرام عليكي لاحاجة تانية تحصل . وخدت العربية وركنتها في شارع تاني خالص بدل ما تيجي تاني من الشارع دة

ومرة كمان انا غلطت وريحت علي واحد عربيتة كانت زيرو . الاكصدام اتخربش وسينسور من علي الاكصدام اتني . نزلتلة وقلتلة حقك عليا والي انت عاوزة هاعملهولك لاني غلطان . قالي تتصلح في التوكيل . قولتة حاضر الي انت عاوزة وقعدت اعتزر لة لاني زعلت اوي علي الخربشة عندة . الراجل اما لقاني كدة . قالي شكرا . والسلام عليكم