النهاردة حصللي موقف ربنا مايوريه لحد, حبيت أشاركو مع حضراتكو لتعم الفائدة باذن الله,
ماشي في أمان الله في أحد شوارع مدينة نصر(الشارع بتاع فندق الماسة اللي فيه مطبين عاليين أوي.) في الحارة الشمال و على يميني عربية تويوتا, المهم و أنا بعدي منه الاقي علي الأرض بقعة سائل أفتكرته ميه طلع زيت, أنا عديت من على الشمال من هنا وأحاول أعدل العربية مافيش, العربية عومت يمين وشمال و لاقيت أني رايح في الرصيف, المشكلة الأكبر ان التويوتا كان بقى ورايا و جاي طاير, أنا قولت يا هلبس في الرصيف يا هقف والتويوتا هاييجي يشيلني. وقد كان التاني فعلا أداني شوطة صغيرة كده في جنب العربية بس الحمد لله بسيطة. طبعا الراجل مالوش ذنب ولا أنا. الذنب على عديم الأدمية اللي رامي زيت على الأرض ومش عامل أي أعتبار لأرواح البشر. حسبي الله و نعم الوكيل.
