تقرير صيانة 30000 للاوبترا الاوتوماتيك فى مركز التجمع الخامس

**Hosam_Optrawy** · 15-12-2010 04:38 AM

بسم الله الرحمن الرحيم

تم بحمد الله عمل صيانة ال 30 الف لعربيتى الاوبترا فى مركز التجمع الخامس

حجزت الصيانه بالتليفون ولقيت ميعاد بدرى بعدها بيوم واخترت الساعه 1

الطريق سهل ميتوهش وشكرا لاستاذ ايمن اللى وصفلى الطريق :)

وصلت بدرى شويه الساعه 12:30 قابلت المهندس محمود طبعا ماكنش فاكرنى فكرته بيا وبالمقابله

المهم قولتله صيانة 30 الف شوف اللى محتاج يتغير وكدا كدا غير زيت الفتيس

قاللى لأ زيت الفتيس على 60 مش 30

قولتله انا اعرف انه المفروض على 30 قاللى الزيت اللى موجود فيها يمشى لحد 60 بعد كدا ابقى غيره على 30

وكدا كدا مفيش فى المركز خدمة فتيس :(

المهم قولتله على بعض الملاحظات

باسمع صوت من العفشه وانا ماشى فى حته مكسره

التكييف مكنش بيبرد

الكارتيره الشمال مكسوره عايزه تتغير وانا كنت شاريها من منصور وجايبها معايا

قاللى اوك

استلم منى العربيه ودخلها والفنى اللى اشتغل فيها اسمه نادر

قاللى هانغير فلتر هوا وفلتر بنزين وبوجيهات وتيل امامى

قولتله توكل على الله

راح جاب قطع الغيار وبدأ الشغل , غير فلتر البنزين ونضف الطنابير بالهوا وغير التيل وربط العفشه وشحمها

بعدها غير فلتر الهوا والبوجيهات ونضف البوابات

وربطلى فرامل اليد وملى مية المساحات بمياه Acdelco مش مياه عاديه

وفى فنى تانى كشفلى على التكييف ولقيته اشتغل بعدها معرفش كان ماله

وركبلى الكارتيره

وكله بقى تمام الحمد لله

نيجى للفاتوره وتفاصيلها كالتالى

195.5 صيانة كل 15 الف

51 تنظيف مجمع حقن الوقود

9.66 منظف كربراتير ووحدة خنق

33.64 فلتر بنزين

48.68 فلتر هواء

110.25 بوجيهات

203.64 تيل فرامل امامى

10 % ضريبه على الكل

الاجمالى 717.61 جنيه

متفاجأتش من المبلغ لانى تقريبا عملت كل حاجه ماعدا تغيير الزيت والفلتر

طبعا كل قطع الغيار gm اصلى واخدت قطع الغيار القديمه

تقييمى للمركز والصيانه بشكل عام ممتاز الممتاز وخمس نجوم :)

كفايه ان العربيه بتتعمل قدام عينيك والحاجه بتتعمل بضمير

وبصراحه ارتحت جدا للمكان والخدمه وان شاء الله هاكمل كل صياناتى هناك حتى بعد انتهاء الضمان

رغم انه بعيد عليا بس مش مشكله ال 40 50 كم المهم العربيه تتعمل كويس وقدام عينيا

وطبعا زى كل اللى راحوا هناك بانصح الجميع بالمركز دا

والسلام عليكم

**aymanmaly** · 15-12-2010 07:13 AM

مبروك يا حسام و عقبال صيانة ال 200000
و يبقى كفاية كدة و نغير الى ما تتمناة :-)
و شكرا للموضوع
و الحمد لله ان الفرع يستحق المشوار
بس انت اخذت وقت اد اية
و انت كنت بتعمل فى فرع الهرم هل فية فرق غير انك بتكون جنب العربية و هى بيتعملها صيانة
و خلى بالك من موضوع زيت الفتيس هما فى المركز بيتكلموا على اساس الكاتلوج لكن التجربة بتقول 30000 و فى ال 60000 هاتكون برة الضمان
و بالتوفيق

**M.Yahia** · 15-12-2010 12:24 PM

الف مبروك يا حسام باشا و عقبال المليون يا رب بس احنا عايزين معلومات دقيقة فى موضوع الزيت بتاع الفتيس هل هوا 30 و لا 60

**Bassem Raafat** · 15-12-2010 04:50 PM

مبروك يا فنان على الصيانه وعقبال كل الصيانات اللى جايه إن شاء الله .

المشاركة الأصلية كتبت بواسطة king2000

بس احنا عايزين معلومات دقيقة فى موضوع الزيت بتاع الفتيس هل هوا 30 و لا 60

الموضوع ده بإختصار يا محمود باشا إتكلمنا فيه كتير قبل كده ... وفعلاً وصلنا لمعلومة تغيير زيت الفتيس كل 30 الف مش كل 60 ألف ، وحأحاول أدورلك على موضوع كنت قريته قبل كده بيأكد المعلومه دى .

**dark_smoky** · 15-12-2010 05:16 PM

الف مبروك يا باشا ..

**sh3sh3** · 16-12-2010 01:52 AM

الف الف مبروووووووووووك ياباااااااااااااااااااااا ااااشا

**M.Yahia** · 16-12-2010 12:21 PM

المشاركة الأصلية كتبت بواسطة bassem raafat

الموضوع ده بإختصار يا محمود باشا إتكلمنا فيه كتير قبل كده ... وفعلاً وصلنا لمعلومة تغيير زيت الفتيس كل 30 الف مش كل 60 ألف ، وحأحاول أدورلك على موضوع كنت قريته قبل كده بيأكد المعلومه دى .

انا عارف يا باسم باشا ان الزيت مفروض يتغير كل 30 مش 60 انما الطبيعى ان الاستاذ حسام يكون غيره و المفروض ان اللى شغالين اصلا فى التوكيل يكونوا عارفين بموضوع ال30 الف دا و لا ايه ؟