فعلا برنسات
عرض للطباعة
يا ناس حرام والله ! الواحد نفسه اتسدت بعد ما سمع الكلام ده ! يعني هوا الشغل في مطعم و انتا مهندس ولا سكيرتي ب اي تمن ( نظرية اشتغل عشان الخبره ) هوا ده لما اكتبه في السي في هيخلي شركة هندسة تقبلني بتخصصي يعني ؟ و قيس على كدة اي تخصص !
والله يا أستاذ أحمد اعرف ناس مرتبهم ال 600 ج دول وفاتحين بيوت ومخلفين عيال عايشين صحيح هما بيعافرو فى اى شغل تانى بعد الظهر بس دا الأساسى بتاعهم وعايشين اللى بيتبطر على النعمه بتزول منه وأحنا بنقول يبدأو زى ما كلنا بدأنا لكن للأسف قدامى نماذج كتير عايزين يبقو مديرين من أول ماأتخرجو ويقبضو بالألاف ويركبو عربيات بدون أى أدنى تعب او مجهود ربنا يصلح حالهم
لو قريت مشاركتى فى اول صفحه هتلاقينى اشتغلت الوظيفتين اللى انت بتتريق عليهم دول وهما اللى خلونى دلوقتى مدير حسابات فى شركه مقاولات واستثمار عقارى سياحى كبير عشان مرفضتش رزق ربنا بعتهولى واه هتفرق لما تحطها فى السى فى بتاعك عارف ليه
عشان هيتاخد عنك انك بتاع شغل والله احنا بننصحكم من واقع خبرتنا واللى مش متقبل النصيحه يبقى بعد كام سنه يقولى هو ايه وبقى فين وربنا ما بيضيعش حق مجتهد
يا جدعان أنا والله مش عارف الناس بتوع إشتغل علشان الخبرة دول بيفكرو ازاي ... يعني إيه لخص المكالمة و مش لازم كافيهات جامدة .... يعني مثلاً لو ٥ من صحابي في الشغل حابو يخرجو يروحو مكان معاياً حقولهم إيه سوري يا جدعان أصل الماهية هتخرم ؟؟؟ شكلي هيبقى زفت قدامهم ... بلاش سينما في سيتي ستارز ب ٣٠ جنيه طيب لو حابو يدخلو أم ٤٠ جنيه بردو حقولهم إيه سوري هي السينما أم ٣٠ جنيه لمش داخل ؟؟؟ و نفسي أعرف ازاي كارت ال ٥٠ بيفضل شغال الشهر كلو ازاي ؟؟؟ ده النبي عرفوه بالعقل يا جدعان
طب انا علي كده اروح انتحر
معلش يا جماعة اسمحولي ارغي شوية و معلش انا مش هذكر اسماء علشان انا بنسى و في نفس الوقت مش كل الصفحات قدامي
انا دفعة 2010 و بدأت شغل في فودافون call center بمرتب 750 جنيه زي ما قلت قبل كدة و كنت بصرف منهم على العربية و الاكل تقريبا 700 في الشهر كنت بنزل شيفت ليل في رمضان و ادور الصبح على شغل لأني مكنتش عاوز اهلي يتعبوا اكثر من كدة
اهلي اه بدأو من الصفر و اتمرمطوا بمعنى الكلمة علشان يعيشونا في المستوى ده بالنسبة لسؤال هو لازم احنا كمان نبدأ زيهم من الصفر الرد بكل بساطة حضرتك مش بادئ من الصفر لأن والد حضرتك معندوش 7 او 10 عيال يصرف عليهم و مبيصدق ان واحد فيهم يخلص علشان يشيل نفسو و ينزل من الريف للقاهرة علشان الشغل عليه اكل و شرب و سكن و مواصلات و لو اهله طلبوا مساعدة منو يوفرها كمان و يجهز نفسوا و يتجوز و يصرف على بيتو
حضرتك في بيت والدك واكل شارب نايم مش قلقان انا هدفع الايحار الشهر ده منين ولا هاكل اي حاجة لحد اخر الشهر علشان معيش فلوس حضرتك مرتبك ده مهما كان صغير ( و انا معاك ان ال600 جنيه قليلة و قليلة جدا كمان) بس متشال عنك هم مصاريف كثييييييييييييييييييير انت مش عامل حسابها و عاوزلها 600 فوق ال600 ان لم يكن اكثر علشان توفرها
اللي انا عاوز اققوله انا يا جماعة لسة متخرج زيي زيكم مش بقالي سنين بشتغل ولا "بتنطط" ولا اي حاجة انا حتى لسة تحت التدريب في شغلي الحالي بس الفكرة مش في ال300 ولا ال600 ولا ال10000 اللي باخدهم مرتب الفكرة و اللي بنتكلم فيه هو تحديد اولويات مع تغيير المقياس بمعنى ان انا عاوز ايه
تعالى نرتبهم (و بتكلم عن نفسي على فكرة):
-عاوز عربية ترحمني من ساعة و نص مواصلات رايح و زيهم جاي و تبقى بتاعتي مش شرك مع حد وقت ماحتاجها الاقيها معايا
-عاوز اوضب شقة و افرشها و الاقي بنت الحلال اللي تشيلني و اشيلها و نشارك حياتنا مع بعض
-عاوز اعيش حياتي بردو مع اصحابي مش اقفلها على نفسي علشان عاوز اتجوز
-مش عاوز احس اني عايش في مستوى اقل من اللي انا عايش فيه
طيب تعالو نفهم موضوع المقياس ده انا دلوقتي مرتبي 600 جنيه و عاوز اعمل ده كلو اولا هجنب لنفسي مصروف شخصي يغطي نفقاتي فمثلا هحسب مواصلاتي قد ايه و لو بستخدم مترو الاشتراك هيكلفني قد ايه و ايه اقل تكلفة للمواصلات اقدر اوصلها حتى لو متعبة نقول 100 جنيه باقي 500 اكل و شرب في وقت الشغل انهي ارخص اجيب ساندويتش فول بجنيه و نص ولا اجيبلي 1/8 رومي و 1/8 لنشن و علبة نستو و كل يوم بجنيه فينو ولا حتى بلدي و اخدهم معايا الشغل هيتكلف ده كلو مثلا قول 15 جنيه في الاسبوع * 4 = 60 جنيه غموص في الشهر بدلا من 4 جنيه كل يوم فول و طعمية و بيبسي * 5 ايام = 20 جنيه في 4 اسابيه = 80 جنيه فرق 20 جنيه و ضامن اكل نضيف و صحي سيبك من موضوع شغل مدارس و الكلام الحمصي ده محدش هيقلك ياللي جايب سندويتشات من البيت و لو حد اتكلم قلوا و انت مالك يتبقى كدة معاك 440 جنيه قول هتقعد على القهوة مع اصحابك كل اسبوع مرة لأ خليها مرتين في الشهر كل مرة 10 جنيه مثلا ادي 20 جنيه يتبقالك 420 جنيه 50 جنيه موبايل و ده انا شايفو بصراحة كثير انا بصرف في حدود 25 او 30 جنيه في الشهر و 40 لما ابقى رغيت او عيد او حاجة قول 40 جنيه متوسط يبقى انت كدة اكت و شربت و خرجت و ركبت و لسة باقي معاك 380 جنيه شوف اولوياتك ايه جواز ولا عربية و ظبط كل شهر مبلغ توديه البنك مهما كان صغير
اللي عاوز اقوله هتعيش بجنيه هتعيش ب 100 هتعيش ب1000 هتعيش مش هتموت - الا لو كان ليك عمر طبعا - بس الفكرة كلها في هتعب قد ايه علشان اعيش في المستوى ده تتعب و انت لوحدك دلوقتي عن انك تتعب و انت معاك اسرة و اولاد
و مش معنى الكلام اللي قلتو فوق ده انك ترضى بال600 جنيه و تقول نصيبي لأ انا بقلك دور و انت في ابو 600 مش اقعد في البيت و قول مستني ابو 2000 جنيه يا كدة يا مش شغال انت كدة بتغلط في حق نفسك مش في حق حد تاني و بكدة بتحصر اهلك عليك مش اهل حد تاني
اعرف ان رزقك بيسعالك زي مانت بتسعى ليه بالظبط و يمكن اكثر كمان فلو بتبذل مجهود كبير علشان تلاقي وظيفة كويسة و مناسبة ربنا مش هيضيع تعبك ده لأ هيكرمك و يرزقك و ممكن يأخر الرزق الواسع ده لحكمة عندو علشان يشوفك هترضى ولا لأ و لو رصيت يجازيك اكثر و بالرغم من تأخير الرزق يطرح في فلوسك البركة
انا مش عاوز حد يزعل مني او يضايق انا والله كنت مريت بالحالة دي و عارف قرفها و عارف احساسك انك عايش في مستوى اقل من اللي اتعودت عليه و انت في حما ابوك و في عزو لكن سعيك ورا رزقك و رضا ابوك و امك و دعوتهم ليك دي بالدنيا كلها و ربنا هو ادرى واحد بنوايا الناس نية اللي عاوز يشتغل و بيدور و مش لاقي و ربنا بيكرموا و نية اللي بيقول انو بيدور و مش لاقي و البلد مفيهاش شغل الخ... ده مش عاوز اقول ربنا مبيكرموش بس اكيد مش هيبقى زي الاولاني
مش عاوز حد يايق ولا حد يزعل انا اخوكم الصغير و بتكلم معاكم و انا و الله ما بوجه كلامي لحد
على فكرة_انا إشتغلت فى اماكن كتير جدا جدا_وفى انضف أماكن _راية_بنك باركليز_وكان عندى محل موبايلات_وفى النهاية بشتغل فى فودافون أوت سورس_بمرتب تعبان_بيكفينى أكل وبيبسى وبنزين 80 لفيروز حبيبتى_حد عندة كومينت.أو حد عندة شغلانة جديدة ليا ؟
تمن إيه يا عم الحاج و أنا هفضل اشتري تمن جبنة كل يوم ولا إيه ونبي نوزن كلامنا
نفسي أعرف ازاي ٥٠ جنيه كتيرة على كارت شحن ازاي ؟؟؟
و إيه كل مرة في القهوة ب ١٠ جنيه على أساس إيه
الأسعار ديه في أنهي منطقة في مصر أصل الساكن في شبرا مثلاً غير الساكن في المهندسين أو الزمالك أو أو أو
بص يا باشا خلينا بس نتفق على كام حاجة الاول
اولا مش معنى ان كلامي مش عاجب حضرتك ان الكلام مش موزون و مش معناه بردو انو موزون بس في لباقة في الحديث
ثانيا بالنسبة لموضوع الثمن و الربع و الكيلو و الكلام ده انا بدي مثال مش اكثر اللي عاوز اوصلوا الفكرة
ثالثا اه 50 جنيه ممكن نعتبرهم كثير على كارت شحن عارف ليه لأن الدقيقة ب.19 قرش يعني ال50 جنيه دي تعملك 263 دقيقة يعني 4 ساعات و نص يعني حضرتك بتتكلم في الموبايل كل يوم في حدود ال10 دقائق + او -
ثالثان الاسعار دي في مدينة نصر بدون شيشة لأن الحمد لله ربنا راحمني من سجاير او شيشة
طب انا بقي احكي حكايتي
انا متخرج من 2004 من معهد فوق متوسط
خلصت روحت الغردقه مرتب كان كام 250 جنية اعقد هناك اربع شهور حسيت اني بلعب بصراحة
رجعت هنا اعقد شهرين في البيت ربنا رازقني بمكتب محاسبة اعقد في سنتين وست شهور اخر مرتب ليا في 400
بعد كده اشتغلت في شركة استيراد وتصدير اعقد فيها 3 سنين اخر مرتب فيها 2000 جنية
اعقد في البيت من اخر يوليو 2010 الي اول اكتوبر 2010 نزلت شركة مقولات اشتغلت فيها ايه مندوب مشتريات مع ان الشغل الكنت بعمله شغل ايدارى مش ليه دعوه بمشتريات كان المرتب كام 700 شوفتو النزله جايه ازاى عشان كده كتب في المشاركة رقم 86 ( اروح انتحر انا )
يا شباب كله شغل وشغل بيجيب شغل مش تفضل اعقد في البيت وتقول فلان حيجيب وفلان حعيد انا كنت اعرف ناس وكنت فاكر انهم حيخدمو اول ما المصلحه بتاعتهم خلصت معايا كله اداني قفاه
و الحمد الله رجعت للحسابات تاني من النهارده في شركة تانيه برضه المرتب صغير بس رجعت للطريق بتاعي تاني
ناصيحتي لاى شاب انزل اشتغل مش تقول مرتب صغير ده يدوبك الموصلات طب ظروف الشغل كده في بلدك حتفضل اعقد في البيت بابا ولا ماما بتصرف عليك يبقي شكلك وحش
صاحب العمل مش مشكلته سينما حضرتك و لا كارت شحن حضرتك
صاحب العمل عايز خبرة + كفاءة في الشغل ..... عشان هو يكسب من وراك ..... يقوم يديك جزء من المكسب
الكارت اللي ب 50 بيكفي ناس كتير .... لو حسبتها هتلاقي 50 جنيه يعني 263 دقيقة يعني حوالي 8 دقايق يوميا...... طبعا بالنسبة للناس اللي بتحب في التليفون دول و لا حاجة
اللي بيقولوا اشتغل عشان الخبرة دول بيقولوا كده عشان - لو ما لقيتش فرصة احسن لاي سبب من الاسباب - اما تشتغل ب 600 ..... هو ده اللي هيأهلك بعد كام سنة تشتغل ب 6000 و تقعد و تحط رجل على رجل و انت بتطلبهم ..... انما طول ما انت قاعد في البيت ما حدش هيفكر يديك لا 600 و لا 6000 ......
طيب و لو الخريج ما اشتغلش اصلا ..... هيروح الكافيه و لا القهوة و يشتري كروت الشحن منين اصلا؟
من بابا و ماما؟ ...... خلاص .... ينزل يشتغل و ياخد من بابا و ماما برضه ..... عالاقل يبقى بيحاول يقلل من الاعتماد عليهم و يشق طريقه ..... و الشغل هيجيب شغل احسن و هيزيد و هيترقى و هيروح اماكن احسن الخ الخ الخ ......
اكيد يا باشا ساب القديمة علشان المرتب و بكدة هو عامل اللي عليه و بيدور على فرص احسن و هو في شغل مش قاعد في بيتهم و بيقول عاوز شغل
يا ريت يا جماعة اللي في ايدو حاجة يعملها لحد بس يكون فعلا جد و عاوز يشتغل مش عاوز يتشرط على مرتب و خلافه يقدمها و يا باشا عرفني بس ايه الدنيا عندك و اشتغلت فين و لو فيه حاجة في ايدي اعملهالك في الشركة اللي انا فيها ابعتلي الcv بتاعك و انا ابعتها للhr و ربنا يكرم
عارف يا بشمهندس
كلامك عن الجيل و انه مهبب و كدا
فكرني كلامي عن الجيل اللي بعدي
مهبب برضه
اه و الله حاجة غريبة جداً...
كل جيل فعلاً بيكون مهبب عن اللي قبله (و السبب دلع الأهالي)
انا ايام ما كنت في الكلية
كنت بحضر المحاضرات و كدا و المادة اللي مش ماشي فيها كنت باخد فيها درس
انا فاكر على ايامي... كنا لما نعوز نعمل مجموعة درس محاسبة مثلاً... نجيب 8 مثلاً و نعمل مجموعة عند اي حد من صحابنا
تعالى شوف الجيل الروش بتاع دلوقتي
دروس في كل المواد بدون مبالغة
سنتر دروس... زي بتوع ثانوية عامة
المادة العلمية بالقطّارة ... (المذكرة) و كمان تقديرات زي الزفت
و كمية الطلبة في المجموعة... تحسسك انهم في ثانوي بجد مش تعليم عالي!! (بتتكلم في 40 و اكتر)
بس برضه بقول
ان الأهالي هي السبب
بسبب الدلع ده
و هو ده سبب الموضوع اللي استاذ اشرف بيتكلم عليه برضه
الله يخليك استاذ محمد
اصل انا كل اصحابي كانو بيقوللي انت كنت بتاخد كذا مش ترضي باقل من كذا طب مافيش شغل باخر مرتب وكان كل مقابله صاحب الشغل ولا مدير مالي ولا موارد بشريه يسمع اخر مرتب ولا يشوفة يقولك حنبقي نتصل بيك
ده انا في مقابله عرفت انوهم بيوزعوني بيني وبينكو اتخنقت روحت قايلهم هو الشغل في اجازة جمعه وسبت قالو لا جمعه بس قولتلهم اسف اصل انا لازم اعمل ويك اند وسيبتهم ومشيت ( انا عارف اني كنت غلط بس كنت خلاص جبت اخرى )
والله يا محمد موضوع الدروس دة الطرفين سواء الدكاترة و المعيدين او الطلبة غلطانين فيه
الطلبة دلوقتي بتستهل و تكسل تروح المحاضرات و يقولك الجو حر و مش عارف ايه
و ساعات بقي تبقي دكتورة ما يعلم بيها ربنا تقعد ترغي
ول المحاضرة مش عارف جابت ايه امباريح بكام و معرفش ايه لدرجة انت تبقي عايز تقوم مولع فيها و تبقي مجبر انك تاخد درس فيها
أرجو الناس متزهقش من الكلام اللي حقوله،
سنة 1995 والدي نزلنا من الامارات عشان ادخل أولى ثانوي في مصر عشان اتعود على الدراسة في مصر لأنهم كانوا بينزلوا مجموع اللي جايين من الخليج كتير. وانا في أجازة الصيف بين اولى وتانية ثانوي رحت مع ابن خالي (كان في كلية تجارة خارجية) نشتغل بالانتاج في مصنع للشكاير والاكياس البلاستك من 5 المغرب لحد 8:30 الصبح، كنت باعمل تقريبا 20-25 جنيه في اليوم.(على فكرة ابن خالي ده شغال حاليا ملحق تجاري في سفارة مصر في دولة اوروبية)
في الامارات طبعا عمري ما اخدت دروس، وبالتالي لما نزلت مصر مخدتش دروس وكان والدي بيقوللي الطالب الفاشل بس هو اللي بياخد دروس وعاوز يتعلم بالمعلقة.
الحمد لله جبت 94% ودخلت هندسة اتصالات، وانا في أولى اشتغلت مع واحد كان لسه مخلص و فاتح محل بيع موبايلات (سنة 98)
في تانية اشتغلت لحسابي في تجارة الادوية، كنت بالف على الصيدليات اعمل اوردرات وأجيبها من مخازن الادوية
أول ما خلصت الكلية اشتغلت في سايبر كافيه وكان المرتب نسبة من الدخل( مكانش بيعدي ال 250 جنيه) بالاضافة اني كنت متفق مع كذا سايبر اعملهم صيانة الاجهزة بتاعتهم
شغلي في الادوية خلاني حوشت قرشين ، والدي ساعدني وكملت عليهم وفتحت انترنت كافيه وعملت عقد ريسلر مع ايجي نت للمنطقة اللي انا فيها.
ربنا موفقنيش في المشروع ده واضطريت بعد سنه ونصف اني اصفيه وخسرت الفلوس اللي كنت محوشها.
عملت شبكة انترنت لاسلكية في الشرقية وصممت انتينات خلتني اقدر اوزع النت وايرلس في نصف قطر 18 كيلو. وبعت الاجهزة دي لناس كتير في المنوفية والمنصورة وبورسعيد والفيوم وغيرها أحلى فلوس عملتها في حياتي كانت في الفترة دي،جهزت شقتي وظبطت نفسي وجبت عربيتي الخاصة. حاولت ارخص الشبكة دي في جهاز تنظيم الاتصالات ولكن للاسف فشلت.
في نفس الوقت اشتغلت مهندس شبكات في مصنع للأجهزة الكهربائية ، قعدت فيه 3 سنين لحد ما وصلت IT Manager
سافرت السعودية بقالي سنتين
الحمد لله والدي كان معيشنا في مستوى لا باس به، وكان عندنا عربية، ووالدي علمني السواقة وانا عندي 9 سنين، وكان سايبلي نسخة من مفتاح العربية معايا في الميدالية بتاعتي( لأنه عارف اني عمري ما حاخدها من وراه) يعني كنت قادر اقضيها كافيهات وسينيمات خصوصا اني قعدت فترة والدي مسافر برة والرقابة عليا ضعيفة، ولكن الحمد لله ربنا عصمني وده بفضل حسن تربية والدي لينا.
ربنا يقدرني واعرف اربي ولادي حتى ربع التربية اللي اتربيناها، وربنا يبعدهم عن البرنسات اللي مقضينها سينمات وكافيهات وحوارات.
واسف مرة اخرى على الاطاله
جميل
انا من 7 سنين لما اتخرجت , اشتغلت بألف و مية جنيه , يعتبر شغل في تخصصي بس خبرته قليلة و تعبه كتير , كنت شغال support في شركة خدمات انترنت صغيرة , كول سنتر بقى و دماغ مصدعة على اخر اليوم , ده غير التركيبات و الزيارات في بيوت و مصانع و كل حتة في القاهرة الكبرى و لف طول النهار ....
كانت شغلانة كنت محتقرها , لكنها اللي لقيته حوالين تخصصي و اشتغلتها , و ما كنتش لوحدي , كان معايا مثلا 5 مهندسين دفعتي (اتصالات و كمبيوتر ) , حتى انا كان عندي بعض الظروف استقطعت من مرتبي 400 جنيه شهريا , كان بيفضل لي 700 جنيه اكل في الشغل و مواصلات و موبايل و هدوم و كل ما تتخيله في الحياة , اللهم الا الاكل و الشرب اللي كان بيبقى في بيت اهلي ...
ده غير طبعا امتحانات cisco اللي كان الواحد فيهم بألف جنيه , ايامها امتحنت امتحانين ورا بعض بحوالي 2200 جنيه , يعني كانوا اللي حوشته في حوالي 4 شهور مثلا او 5 شهور ... و كنت عايش على قد اللي معايا , و باشتغل و بادور على شغل تاني , بعدها بسنة مرتبي زاد بقى 1400 جنيه (يعني بقى صافي اللي باتحصل عليه ألف جنيه ), بعدها بكام شهر كمان ربنا اكرمني بعد محاولات كتير جدا بشغل احسن في شركة اكبر و بمرتب اكبر (مش اكبر الوهم اللي هو الضعف مثلا حتى ) , طلعت من سنة الشغل اللي فات محوش 3000 جنيه , و ما كنتش مبذر خالص , بالعكس كنت باصرف على القد جدا , و حتى ال3000 جنيه دول كانوا مرتبات متأخرة (شهرين و شوية) , ما انا نسيت اقول ان المرتب كان بيتأخر بالشهر و الشهرين
و الحمد لله الحياة اختلفت شوية و ربنا اكرم و حجزت الشقة (و كنت مديون في المقدم , و الديون و الاقساط استنزفوا مرتبي كذا سنة بعدها) , بعد كده الحمد لله اشتريت عربيتي وزة , و بعد كده الحمد لله برده اتجوزت
ده بفضل الله كان من غير مساعدة من اهلي ( لأنهم ما كانوش يملكوا) اللهم الا الاستدانة زي ما حصل مع مقدم الشقة كده...
الخلاصة ... عندك استعداد تتعب , هاتلاقي , لكل مجتهد نصيب
يعني لخص المكالمة و مش لازم كافيهات جامدة ....
اختياراتك حاجة من اتنين ,,, يا تشتغل اللي موجود ( و يا سلام لو قريب من تخصصك ) و تعيش على قد مرتبك لحد ما ربنا يكرمك بالأكتر
يا هاتقعد في البيت , و في الحالة دي مش هايبقى فيه فلوس تروح اي حتة ولا تعمل حاجة اصلا ...
لو هاتروح و تعمل بمصروفك , روح و اعمل بمصروفك و انت شغال ...
على فكرة
ما بيعتبرش جملة سوري اصل الماهية هاتخرم عيب الا اتنين , واحد كبير اوي (اربعينات بقى و بتاع ) , او واحد ما بيصرفش على نفسه و واخد على الصرف يمين و شمال في فلوس مش تعبان فيها
اي حد مش كده مش بيعتبرها عيب بالمرة , الواحد فينا مش قاعد على بنك
كأن الناس بتنصح الشباب ان لو فى شغل ب 3 الاف وشغل ب 600 متاحين ليك اقبل بال600 احسن!!!
والغريب ان الناس تقريبا بتناقض نفسها بشكل غريب وتقول مقبلش بشغل 600 لانى حضطر اخد من اهلى زيادة على مرتبى وده مقبلوش
طيب ولو مرضيتش تشتغل وتاخد ال 600 جنيه ياترى ده معناه انك مش حتاخد حاجة من أهلك؟
هههه
يا استاذ محمد انا كلامى موجه للشباب اللى بيقول ازاى نقبل ب 600 فبقول هما بيجادلوا كانهم عندهم فرصة ب 3 الاف جنيه واحنا بنقولهم متقبلوهاش واقبلوا بال600 جنيه بس (هو انت اصلا عندك اختيار حاليا غير ال600 جنيه)
والحاجة التانية كنت برد على الناس اللى يقولك ازاى المرتب مش حيكفى تليفوناتى وسجاير وخروجاتى وانا مقبلش اخد من اهلى.........زطيب مانت حتاخد المبلغ كله من اهلك لو مشتغلتش يبقى بيجادلوا فى ايه
بصراحة شديدة برضه
مرتب 600 جنيه ده صعب قوي ,انا كنت باخده مصروف من 7 سنين في الكلية و أول شغل ليا كان ب 1200 جنيه و كان بالنسبة لي يادوبك برضه و تنقلت في 3 شغلانات آخرها "الحالية" ب 5500 جنيه بعد 7 سنين خبرة و بعض المهارات الفردية المكتسبة
المشكلة في الحد الأدنى في الرواتب اللي بيخلّي العيشة ممكن تكون مستحيلة بالنسبة للكثيرين حتى اذا كانت مصاريف شخصية و بتخلّي ناس كتير يكون اوفرلها القعدة في البيت بدل المرمطة على بضعة مئات من الجنيهات قد لا تكفي حتى متطلبات الحياه اليومية
الحالة العامة قد تثير الإحباط لدى الكثيرين و لكن ايضا ثقافة التنبلة و الإعتماد على الأهل اصبحت شائعة لدى الكثيرين
على كل المستويات فالعمل افضل مليون مرة من مجرد القعدة بدون اي وظيفة تذكر و أي مشوار بتعمله في حياتك حتى لو كنت هتجيب علبة سجاير من على الكشك اللي في اول الشارع اكيد هتكتسب خبرة فيه ايا كان نوعها
أعرف ناس كتير بتبتدي بمرتبات أضعف من كده و بعد خمس و ست سنين لسة معملوش حاجة برضه او انهم اتنقلوا نقلة نوعية و عندهم إحباط كبير قوي و قيه ناس على العكس البلية لعبت معاها و زي الفل
600 جنيه ده بيعتبر معدوم الدخل مش محدود كمان ... حد جرّب يعني ايه 20 جنيه هوّة حد الصرف اليومي؟؟؟؟ صعبة قوي اكيد
الواضح ان كثير منا معندوهوش صبر او ميعرفش يعني ايه صبر ..انا بدأت شغل في العقارات وانا بدرس وانا مش محتاج للشغل وفي فترة ركود ومافيش خيرة الا اقل القليل يعني معطيات تنذر بالفشل ووالدي كان معترض وبيقوللي خلص انت دراستك وانا هشغلك في شركة محترمة....قعدت فترة طويلة كنت بصرف فيها علي الشغل من جيبي ومن مصروفي وكنت خلاص قربت اوصل لمرحلة اعلان الفشل بس كنت علي يقين ان الأرزاق بيد الله وحده وكله بأجل مكتوب وكنت كل ما اقرب من تحقيق هدفي بتحصل الصدمة والموضوع مش جايب همه...مكنتش بعترف بحاجة اسمها الفشل لكن كنت بسمي الحالة اللى انا فيها دي عدم توفيق وسبحات الله بعد صبر طويل الشغل فتح بطريقة غير متوقعة وطبعا بتوفيق من عند ربنا الفترة اللى لم اوفق فيها اكتسبت منها خبرة كبيييييرة جدا كانت سبب في اني اكون سبب لأنهاء صفقات كثيرة لشركات كبيرة تعمل في المجال العقاري منذ اكثر من 10 سنوات...وبقيت اصرف من جيبي علي حاجات كتيرة في البيت وعلي العربية ...اهم حاجة يكون فيه صبر ويقين وبعد عن الذنوب...وفيه مثل بيقول الرزق بينادي علي صاحبه.
بصراحه يا شباب ...
زى ما قريت ردود تسد النفس...ومجادله على الفاضى...
على قد ما قريت مشاركات عجبتنى جدا ..وإتأكدت إن فعلا فى شباب مستعد يتعب ويعرق عشان يبقى حاجه...ناس بتشتغل علشان تشتغل مش عشان تقبض وتصرف مرتبها على كلام بعتبره رفاهيه مش لواحد فى بدايه حياته....
تعرفوا ان صاحب الشركه عندى وأهو راجل مليونير ما شاء الله بيمشى من الشركه أخر واحد ....وساعات يقعد ل 11 و 12 باليل..
واهو يقدر يجيب مدير ويعيش حياته بملايينه...
المكسب من غير تعب مالوش طعم وبيروح على كلام فارغ...easy come ..easy go...
أرجع وأقول ..
لو قدامك شغل ب 10000 جنيه اشتغله وهننبسطلك كلنا لكن لو نزلت على الأرض هتلاقيك بتدور على ال 600 جنيه دول لو معندكش خبره..وتحمد ربنا وتشكر فضله...
النهارده وقع تحت إيدى اوراق مندوب تسليم عندى فى الشركه ...يعنى بيطلع يستلم البضاعه ويعدها ويسلمها للعميل ويركب مع العربيه يوصلها لصاحبها..
الشاب ده فوجئت إنه ليسانس حقوق..مع ان الوظيفه دى مش مطلوب لها مؤهل أكتر من القراءه والكتابه....مرتبه كام؟..600 جنيه...واخدين بالكو 600 جنيه.!!..ومش هحكى تفاصيل ظروفه وقد أيه هو إبن ناس برضو...
تصدق يا استاذ اشرف ان فيه واحد ابويا بيحيكلي عليه من شوية شغال في شركة مالتي ناشيونال بالعبور في منصب قيادي كبير مرتبه 30 الف دولار ولسة شاب وليه عربية تويوتا برادو وشقة بشارع الثورة........كل ده وطلع بيختلس.....وبسببه قرار بمنع تولي المسلمين هذه المناصب داخل الشركة وهو دلوقتي قاعد في البيت تحت الطلب لغاية ما يجيبوا واحد جديد بداله.....الشاهد ان المكان اللى فيه الشاب ده اي واحد يتمناه فعلا بس سبحان الملك وظيفته كانت سبب انه يقع في المعصية ويصد عن سبيل الله بتشويهه صورة المسلمين فأي واحد بيتمني فرص زي كده ويلاقيها بتتمنع عنه لأي سبب كان يقول لعله خير.
3000 جنيه مش بيكفوااا !! مش غريبه دى ( اسئل والدك مرتبه الاساسى كام كدة دلوقتى بعد سنين الخبرة دى كلها ) ممكن تلاقيه نفس الرقم دة + او -
-----------------
ادينى سبب واحد يخلى صاحب الشغل يديلك 2000 او اكتر الا لو انت فيك حاجة مميزة عن غيرك الى معاه خبرة( ودى صعبة شويه )
----------------------
احسبها كدة لما تاخد 600 جنيه وتخش على الحج او الحاجة وانت جايبلهم تورتايه او حتى ربع كيلو جبنه ياعم ,, رد فعل الحج ايه اكيد هايفرح بيك
---------------------
العبد لله ساكن فى القناطر الخيريه وبشتغل فى شركة فى الحى العاشر مدينة نصر ومرتبى 600 حنيه ( مش بيكفوا على فكرة) ويوم ما بصرفش مواصلات بصرف 5 حنية ولسه لا اكل ولاشرب وبدرس كمان على فكرة
----------------
احسبها كدة لما تحط فى (السى فى) سنه اثتين عشرة خبرة فى المكان الفلانى هاتفرق ولا لاء
-------------
الكلام برضو على فكرة مش هايجيب فايدة جرب وانزل اشتغل وانت تعرف الصح فين والعكس فين