بصراحه يا جماعه مش قادر اهضم موضوع كده وقلت أشاركم الرأى معايا......

كان متوفر عندنا فرصه عمل فى الشركه وطبعا كان أول حاجه بيبلغونا لو نحب نجيب حد من معارفنا او حد موثوق فيه كأولويه عن الغريب نظرا لظروف سوق العمل دلوقتى وندره فرص العمل وخصوصا العمل الغير محتاج لخبره....يعنى كل الشروط العاديه ما عدا الخبره.....ولغايه هنا عادى....


الغريب بقى يا إخوانى لما بدأنا نكلم معارفنا.......اللى هما يطلق عليهم... حديثى التخرج......

الوظيفه يا إخوانى كانت براتب 600 جنيه ومواعيد العمل من 9 ل 5 فى المتوسط ويزيدوا حسب حاجه العمل مع احتساب بدل السهر طبعا...

نشوف بقى ردود الساده الأفاضل حديثى التخرج...

- واحد قللى اصل المشوار بعيد من شبرا الخيمه لمصر الجديده كل يوم..!!

-واحد مش عاجباه المواعيد..!!

- واحد مش عاجبه المرتب..!!

- واحد جرب يوم وقال الشغل كتير قوى..!!

- واحد راح يشترى كارت شحن ومجاش تانى...(فكرنى بأمينه وطابع البوسته..!!)

- واحد عايز 1000 جنيه مرتب..!!

- واحد موافق يشتغل معانا بس فى قسم تانى غير اللى طالب الموظف الجديد..!!

- واحد مصمم يعرف انا وزمايلى مرتباتنا كام ..!!

- و..وواحد..وواحد....وواحد.....!!!!! !!!!!


هو ايه اللى حصل يا جماعه؟؟!!


على أيامى من خماشر سنه كده...

كنا بنقدم على شغل والناس تقبلنا أو لأ ب 150 جنيه عشان نكتسب خبره نقدم فيها بعد كده فى اماكن احسن....

هو حديث التخرج بقى دلوقتى عاوز مرتب كبير وشغل سهل ومكان جنب البيت ومش متعب وباص يوديه ويجيبه؟

طب انت يا حديث التخرج هتقدمللى ايه كصاحب عمل غير استعدادك للشغل اللى مش باين فى كل الناس اللى جت؟

يعنى انت كحديث التخرج بتيجى تتعين عندى (كصاحب عمل)لأن خبرتك زيرو...بتتعلم وبعد كده انا اللى بتحمل الريسك انك هتدور على مكان جديد وادور على حد تانى اعلمه من أول وجديد....


أيه الإضافه الخطيره اللى هتضيفها اللى تخلى الواحد يتمسك بيك ..ويبوس ايدك عشان تقبل تشتغل؟


ليه الشباب بقوا بيستسهلوا ويرفضوا الشغل ويرجعوا يشتكوا انهم مش لاقيين شغل وانهم بقالهم سنين بيدوروا...؟!!!!!!


طب ليه متشغلش نفسك وبعد ما تثبت نفسك تبدأ تطالب بزياده او حتى تدور على مكان تانى بمرتب أحسن؟


انا اول مره اشتغلت كان الراتب 100 جنيه وصاحب الشغل يغمزنى ب 20 جنيه اول الشهر ...آل يعنى عشان عاجبه شغلى!!....

وكنت يادوب بجيب مواصلاتى ومصاريف اليوم...

لكن بعد سنه او اتنين بقى عندى خبره واقدر اطلب مرتب واقعى...

يا شباب....

خليكوا واقعيين ...مش معنى انك خريج جامعه او واخد كورسات او تعرف لغه او كمبيوتر تبقى لقطه......

فى عامل مهم جدا


الخبره اللى بتتكتب فى السى فى ...أهم من أخر مرتب...

يعنى انت وانت بتقدم السى فى بتاعك اللى بيستقبل ورقك بيبص انت كنت شغال فين وبقالك قد ايه وبتشتغل ايه قبل ما يبص على اخر مرتب ليك كان كام....

لازم نتعلم نسوق لنفسنا زى اى سلعه...بذكاااااااااااااء...

احسبها صح...تلعبها صح....!!

محدش يزعل من كلامى.....أنا مش قصدى أى إهانه لحديثى التخرج...الموضوع نصيحه للى يحب يسمعها....مش نقد....!!

واللى خلانى استفز واقرر انى اكتب الموضوع...واحده معرفه جت النهارده تسألنى على شغل لواحد قريبها...فقولتلها اشتغل فين؟

قالتلى لسه مخلص السنه اللى فاتت بكالريوس التجاره وخد اعفاء من الجيش...

بعد شويه رغى ملهومش لازمه...قالتلى ..هو معروض عليه يشتغل فى المنطقه الحره فى مدينه نصر ب 500 جنيه بس هو مش عاجبه....!!!!


طب واحد ميعرفش حاجه لسه وهياخد 500 جنيه وجنب البيت وباص هيوديه ويجيبه....عاوز ايه تانى؟!!!!!!