الموضوع: السفر للخارج او البقاء في مصر..... دعوه للنقاش الموضوعي الجاد

المشاركة الأصلية كتبت بواسطة amir

السلام عليكم و رحمه الله

اعضاء نايل موتورز الكرام

حبيت افتح موضوع للنقاش الجاد و الموضوعي عن موضوع السفر للعمل او الهجره سواء لبلاد عربيه او اجنبيه

و اتمني ان النقاش يكون هاديء و موضوعي و علي مستوي راق

و الغرض ان تعدد الاراء و النقاش هيرسم صوره حقيقه امام كل من يفكر في الموضوع

و احب في البدايه اطرح بعض النقاط للنقاش و طبعا النقاش مفتوح و اهلا و سهلا بكل رأي

1- الانفصال الاجتماعي عن الاهل و الاصدقاء و ما يتبعه من عزله

انا حسيت بيه جدا لما سافرت مع ان الموضوع ماكنش عمره في دماغي ولا حسيت بيه

2- صعوبه ايجاد شريكه حياه نظرا لظروف الغربه

بصراحة دي انا عديت منها لان معايا مراتي بس الي عايز يرتاح في الغربة احسنله يتجوز واحدة بنت البلد او معاها علي الاقل جنسية وهتفرق معاه في حاجات كتير جدا

3- ضيق المساحه الاجتماعيه بالنسبه للعزاب و المتزوجين سواء, اللهم سوي من دائره محدده من الاصدقاء و المقربين

بالرغم من اني معايا مراتي وبنتي بس حاسس بالموضوع ده جدا لدرجة انا في اسرة مصرية في الشقة اللي جمبي بس مابيقولش حتي سلامو عليكم ولا حتي قالولي مبروك لما مراتي ولدت

4- الاولاد و تعليمهم و اكتسابهم خبرات مختلفه (بالذات في الدول الاجنبيه), و بعدهم عن الاب (غالبا) و ما يستتبع ذلك من مشاكل

متهيالي لو الاب بره و ولاده في مصر فا ده بيخصر اكتر ما بيكسب ولو ولاده معاه بره في دولة اوربية فالموضوع صعب جدا عشان التربية والاباحية اللي في الدول الاوربية بس علي النقيض الطفل بيكون في اهتمام جامد بيه صحيا و دراسيا بس اكيد الموضوع ده بيعمل مشاكل لان ازاي الطفل يعيش بشخصيتين ولو هو بيبقي عارف هو مصري ولا اجنبي ولا ابن البلد بيعمل حاجات غير اللي صحابه كلهم بيعملوها اعيادهم غير اعياده انا متهيالي الموضوع ده ممكن يتعب الطفل نفسيا جدا خصوصا لو بنت

5- مشكله التعود علي نمط معين من الحياه (غالبا ارقي سواء ماديا او اجتماعيا او ثقافيا)

6- صعوبه و تدهور الاحوال في مصر

7- الغلاء الفاحش و عدم القدره علي توفير حياه كريمه
ال 3 نقط اللي فاتو دول طبعا بره مصر تكسب بكتير وعلي فكرة الحياة بره مش غالية زي ما الناس متصورة وهبقي اتكلم شوية عن المعيشة والاسعار

اتمني ان النقط دي تكون مرجع بسيط لتسلسل الافكار و الخبرات

المشاركة الأصلية كتبت بواسطة ain2006

نظرا للحالة الفظيعة اللى وصلت لها الحياة في مصر

والتدهور المستمر وبتسارع غريب

اعتقد ان السفر يعتبر الاختيار الافضل

لاكن بلاش انانيه

انت تقدر تسافر غيرك شباب كتير معندهمش القدرة حتى لو كانوا احسن منك علما وخبرة

فمش كل واحد يسافر عشان يعيش هو مرتاح
ياكل ويشرب وينام ويستمتع بالحياه وبعد مدة تنتهي حياته وهكذا

احنا خلقنا عشان نعمر الارض مش عشان نشبع غرائزنا ونستمتع وخلاص

وبالتالى المطلوب من كل شاب مسلم مستطيع

انه يسافر لتحسين الامة وليس نفسه

يسافر يتعلم علم نافع وبعدين يرجع بلده يعلم العلم ده للشباب اللى معندهمش نفس الفرصة

ولامانع انه يعيش حياته رايح جي بين مصر والغربه

لاكن ميروحش يعيش برة ويتحول لمجرد قالب طوب لبناء دولة اوربية قوية (زي الحال مع ناس كتيير)

ولو انت هتسافر عشان تتاجر او تلم فلوس

مفيش اي مشاكل اطلاقا

بس برده ارجع بلدك واستثمر جزء ولو صغير فيها عشان تساعد الشباب وتساهم في نهوض البلد وتحسين احوال الشباب المسلم الغير قادر

لو كلنا تعاونا بجد نقدر نغير حاجة

جزء كبير من ازمة السكن في مصر سببه المصريين المهاجرين لانهم بينزلو يشترو شقق باي سعر ويقفلوها ويمشو ويقولك استثمار وطبعا بالنسبة له بتكون برخص التراب عشان فرق العملة

السلام عليكم و رحمة الله و بركاته

الموضوع ده بالفعل من المواضيع الهامة جدا للمجتمع المصرى و بالدات لفئة الشباب .


1- الانفصال الاجتماعي عن الاهل و الاصدقاء و ما يتبعه من عزله
بالنسبة للانفصال عن الأهل , فلو المقصود بالأهل , الأسرة الصغيرة بتاعتك كزوجة و أولاد , فدول مفيش فيهم مشكلة لأنك ممكن تاخدهم معاك و أنا مانصحش حد أنه يسافر أى مكان مش هيقدر ياخد فيه أسرته معاه و لو قصدك بالأهل , اللى هما الأسرة الكبيرة يعنى عيلتك, فده ضريبة النجاح و الهدف اللى أنت هتحققه فى الغربة و كمان أكيد هتقدر تنزل أجازات ليهم كل فترة و بعدين أهم اتنين فى الناس كلهم هما الوالدين , غير دول, كل الناس دلوقتى مشغولة بنفسها و بهمها و محدش فاضى لحد, أما لو تقصد الأصدقاء , فطبعا الواحد بيحب يفضل مع أصدقاؤه طول العمر , بس دى سنة الحياة و كمان لا ظروف البلد و لا ظروف الناس دلوقتى بتخلى فيه روقان بال زى زمان بين الأصدقاء و دول كمان ممكن تتواصل معاهم بالنت و ممكن تشوفهم فى الأجازات و أكيد المكان اللى أنت هتروحه ممكن تكون فيه صداقات جديدة و الحياة مش هتقف يعنى .

2- صعوبه ايجاد شريكه حياه نظرا لظروف الغربه
بالنسبة لشريكة الحياة , دى ممكن تتجوز قبل ماتسافر و فى الحالة دى سهل أنك تلاقى شريكة حياة و حتى لو سافرت من غير ماتتجوز , ممكن ترجع فى أى أجازة و تتجوز, حتى لو أنت مسافر بره دولة أجنبية , ممكن تتجوز واحدة مصرية و مسلمة و محترمة و من بيت محترم , لأن حسب ماشوفت أن اللى أنت هتتجوزها بتبقى بنت ناس كانوا من الأصل مهاجرين زيك و دول بيبقوا منهم اللى عرف يربى بنته كويس و يحفظ فيها الأخلاق الحميدة و دى اللى أنت هتدور عليها و هتلاقيها بسهولة ان شاء الله لأن أهلها دول بيبقوا يتنشأوا على واحد محترم يتجوز بنتهم, و منهم اللى مقدرش يمنع بنته أنها تنخرط فى المجتمع الأجنبى و دول بيبقوا باينين أوى و دى اللى أنت هتبعد عنها .

3- ضيق المساحه الاجتماعيه بالنسبه للعزاب و المتزوجين سواء, اللهم سوي من دائره محدده من الاصدقاء و المقربين
الدول العربية فيها موضوع الاجتماعيات ده عادى جدا و أنا كنت بشكل شبه يومى بنتجمع أنا و أصحابى و بنخرج و كنا بنشيش كمان لما كننا فى السعودية,أما الدول الأجنبية, فالحياة تتميز فيها بالجدية مع توفير مساحة جيدة للاجتماعيات اللى سيادتك بتتكلم عنها , لكن مش مطلوب أن الحياة و الوقت كله يبقى عبارة عن اجتماعيات و ضحك و فرفشة , لأن ماحنا هنا فى مصر واخدين الحياة ببساطة و الحياة عندنا حاجة هلهلى خالص و الشغل اللى ماتعمش االنهارة , يتعمل بكرة, مفيش مشكلة, هى الدنيا طارت؟؟؟؟ , و النتيجة , وصلنا لحد فين , أصبحنا و بلا منازع أمة تستهزأ بها الأمم و أمة مالهاش لا وزن و لا سعر للأسف, زى النهاردة و أنا بتفرج على قناة الحياة لما كانت عاملة لقاء مع الصيادين بتوع كفر الشيخ اللى كانوا اتحبسوا فى ليبيا و كان الصياد بيحكى كمية الدل و المهانة اللى بيتعاملها هناك , لما كان بيقول أن العسكرى الليبى بتاع السجن بيقوله هو الصيادين التانيين , اطلعوا يا مصريين نظفوا السجن و لما رفضوا , حبسوهم فى دورات المياه!!!!!! .

4- الاولاد و تعليمهم و اكتسابهم خبرات مختلفه (بالذات في الدول الاجنبيه), و بعدهم عن الأب (غالبا) و ما يستتبع ذلك من مشاكل
اللى أنا شوفته كان الاتنين , فيه أسر قدرت تاخد بالها من المشاكل دى و قدروا يحافظوا على أولادهم و فى نفس الوقت أولادهم طلعوا ناجحين جدا فى المجتمعات الغربية اللى هما فيها و فى نفس الوقت ملتزمين أخلاقيا جدا و فى أسر ماهتموش بالموضوع ده و أولادهم ضاعوا و ده بيبقى دور ألم أولا و أخيرا و الأمر هيكون أسهل لو الأم قاعدة فى البيت مابتشتغلش زى الأب, بس اللى أنا أؤكده أنك لو شغال فى احدى الدول الغربية , أكيد هيكون عندك وقت أنك تقضى مع أولادك وقت و لو يوم فى الأسبوع لأن هناك فيه نظام لكل شئ لكن لو شغال فى الخليج أو فى مصر , ممكن ماتلحقش أنك تشوفهم و تقضى معاهم وقت كفاية .

5- مشكله التعود علي نمط معين من الحياه (غالبا ارقي سواء ماديا او اجتماعيا او ثقافيا)
الرقى فى مستوى الحياة مش شئ سئ , بالعكس ده شئ كويس , الشطارة أنك لما تسافر بره , و تتعود على مستوى معين من الحياة الكريمة و المرفهة , انك ماترجعش مصر تانى -ده لو كنت هترجع- الا و أنت ضامن مليون فى الميه أنك هتقدر تعيش أنت و أولادك فى مصر فى نفس المستوى, غير كده خليك هناك .

6- صعوبه و تدهور الأحوال في مصر
دى حاجة ماعاليهاش اختلاف اطلاقا و فى المستقبل أكيد هتتدهور أكتر لأن سبب التدهور لا زال موجود و لم يتم ازالته .

7- الغلاء الفاحش و عدم القدره علي توفير حياه كريمه
ده موجود بالفعل فى مصر .

الى أنا قصدى أقوله, أن الواحد يدور على مصلحته فين و اجرى عليها و أضع الأمور المعنوية و النفسية زى الأهل و الأحباب و احساس الغربة و تراب مصر و اللمة ساعة الفطار فى رمضان و لا فى العيد جانبا, لأن الأمور المعنوية النفسية دى مابتجيبش فلوس, يافرحتك و انت ملموم مع أهلك و أصحابك ساعة الفطار فى رمضان و لما ابنك و لا بنتك -لا قدر الله - لما يتعب مايكونش معاك فلوس تجيبله أحسن دكتور , ساعتها اللمة دى هتيجى و تقف معاك , بس ماحدش يحط ايده فى جيبه و يديك , لكن كلهم هايخدوك بالحضن و يطبطبوا عليك و يقولولك شد حيلك .

شكرا و آسف جدا للاطالة و آسف جدا لو رأيى أكيد هيختلف مع آراء ناس كتير هنا فى المنتدى , بس ده رأيى و أنا حر فيه طالما أنه لا يتعدى و لا يحقر من آراء الآخرين اللى ليهم كل احترام و تقدير و اجلال .

[QUOTE=amir;3873149565]السلام عليكم و رحمه الله

اعضاء نايل موتورز الكرام

حبيت افتح موضوع للنقاش الجاد و الموضوعي عن موضوع السفر للعمل او الهجره سواء لبلاد عربيه او اجنبيه

و اتمني ان النقاش يكون هاديء و موضوعي و علي مستوي راق

و الغرض ان تعدد الاراء و النقاش هيرسم صوره حقيقه امام كل من يفكر في الموضوع

و احب في البدايه اطرح بعض النقاط للنقاش و طبعا النقاش مفتوح و اهلا و سهلا بكل رأي

1- الانفصال الاجتماعي عن الاهل و الاصدقاء و ما يتبعه من عزله

الانسان بينفصل اجتماعيا لما يكون مالوش اي علاقات اجتماعيه بأي حد و ده مستحيل لان في اي مكان هتروحه هتقابل ناس جديده و مش بس مصريين هتقابل ناس من جنسيات تانيه و ده هيفتحلك آفاق جديده في الحياه و هيغير افكار كتير جواك.
بالنسبه للاهل و الاصدقاء انا لما بنزل اجازه و الله اخواتي بيبقوا راجعين من اشغالهم هلكانين و بيعدوا يقعدوا معايا شويه و لو انا عايش في مصر هنتقابل يمكن مره كل اسبوع غير كده تليفونات لان ضغوط الحياه بقت رهيبه وعموما انت الوحيد اللي ممكن تقدر تحدد انك تتغرب ولا لا.
2- صعوبه ايجاد شريكه حياه نظرا لظروف الغربه
زي ما كتير اعضاء قالوا ده نصيبك و ربنا كاتبهولك و هييجيلك في وقته و مكانه

3- ضيق المساحه الاجتماعيه بالنسبه للعزاب و المتزوجين سواء, اللهم سوي من دائره محدده من الاصدقاء و المقربين
المصريين ماليين الدنيا في اي حته هتقابل مصريين و كتير اوي طبعا في الحلو و الوحش و انت اللي تقدر تختار تصاحب مين و مين يبقي مجرد معرفه و بس و مين تهرب لما تشوفه و كده يعني.


4- الاولاد و تعليمهم و اكتسابهم خبرات مختلفه (بالذات في الدول الاجنبيه), و بعدهم عن الاب (غالبا) و ما يستتبع ذلك من مشاكل
والله شوف في ناس بتربي عيالها علي تقاليدنا و عاداتنا و في ناس بيبقي عنده الصدمه الحضاريه فبيربي عياله زي الاوروبيين و ده بيكون هو اصلا معندوش لا خلفيه دينيه و لا ثقافيه و لا اخلاقيه فاول ما بيشوف الحياه في اوربا بينبهر و بيضيع مع الوقت و لا بيفضل مصري ولا بيبقي اوربي.
كمان انا عاوز اقولك ان مش شرط ان اللي اتربي بره يبقي اخلاقه مش حلوه بالعكس يعني هنا في سويسرا انت ممكن تعلم ابنك انه مايكذبش و فعلا مش هيكذب لكن في مصر هيكذب هيكذب عشان احنا بنتربي علي الخوف من صغرنا.
علي فكره انت في اوربا عندك كل اسبوع يومين كاملين اجازه و كل سنه ٥ اسابيع اجازه يعني لو انت شغال في مصر مش هيكون عندك الوقت ده لعيالك.


5- مشكله التعود علي نمط معين من الحياه (غالبا ارقي سواء ماديا او اجتماعيا او ثقافيا)
هي دي فعلا مشكله كبيره انا نفسي ارجع والله بس معنديش امكانيات تخلي العيال يعيشوا في نفس المستوي.

6- صعوبه و تدهور الاحوال في مصر
طبعا الاحوال في مصر من سئ لاسوأ بسرعه رهيبه جدا.

7- الغلاء الفاحش و عدم القدره علي توفير حياه كريمه

و ده اهم الاسباب اللي الناس بتتغرب عشانها.

في الآخر نصيحتي ليك سافر اعملك قرشين و ارجع عيش عيشه حلوه في مصر و طبعا قبل اي خطوه اعمل استخاره و ربنا يكرمك ان شاء الله.