الموضوع: السفر للخارج او البقاء في مصر..... دعوه للنقاش الموضوعي الجاد

شكراا لحضرتك على الموضوع دا
لانه غايه فى الاهميه
خصوصا مهم شخصيا لى
لانى باذن الله هتخرج السنه دى من كليه فنون تطبيقيه شاغل تفكيرى جدا هعمل ايه بعد اما اخلص



1- الانفصال الاجتماعي عن الاهل و الاصدقاء و ما يتبعه من عزله

انا كدا كدا متعود على الموضوع دا لان كليتى مش فى القاهره ( الكليه فى دمياااااط) بقالى 5 سنين

2- صعوبه ايجاد شريكه حياه نظرا لظروف الغربه

دا نصيب
لو ربنا مقدر ليك هتلاقيها فى اى مكان


3- ضيق المساحه الاجتماعيه بالنسبه للعزاب و المتزوجين سواء, اللهم سوي من دائره محدده من الاصدقاء و المقربين

اعتقد ممكن تتأقلم على الوضع دا لان فى سبيل كدا بتاخد مقابل مادى كويس مش هتلاقيه فى بلدك

4- الاولاد و تعليمهم و اكتسابهم خبرات مختلفه (بالذات في الدول الاجنبيه), و بعدهم عن الاب (غالبا) و ما يستتبع ذلك من مشاكل
الاولاد حتى لو فى مصر هتدخلهم مدارس اجنبيه فى اغلب الاحوال وهيتعلموا تعليم اجنبى
انت المفروض بمساعده الام انهم يقوموا اخلاقهم ويعلموهم الصح من الغلط والحرام من الحلال
واصلا كل مدارس مصر مش بتعلم غير الفساد فى كل شىء

5- مشكله التعود علي نمط معين من الحياه (غالبا ارقي سواء ماديا او اجتماعيا او ثقافيا)

مش احسن ما يفضلوا طول عمرهم فى مستوى مادى منيل
على الاقل بعد فتره هتقد تبقى معاك مبلغ معقول تكمل بيه حياتكك فى حاله انك رجعت

أنا مُقتنع بعدم السفر والهجرة عموما لأسباب ختلفة

أنا شايف إن بلدي محتجاني حاليا ، ومينفعشي اسيبها فى الظروف دي

أنا شايف إن النجاح يتعدي حدود الفرد ليشمل ارض استخلف فيها

انا شايف إن لو كلنا هاجرنا بلدنا هتفضل من سيئ لاسوء

لازم حد يدفع ثمن النهضة والحرية والتطور والتغيير ، تفتكروا مين هيدفعة ، اللى نفسهم يهاجروا ومعرفوش ولا اللى هاجروا ومرجعوش ولا اللى مبيفكروش فى أى حاجه

لازم حد يضحي ويكون مسؤول ، وأنا بإذن الله مُستعد واتمنى من الله ان يُساعدني

سافر طبعا لو شخصيتك قوية على الغربة .....يقول الأمام الشافعي:

ما في المقام لذي عـقـل وذي أدب ... من راحة فدع الأوطان واغتـرب

سافر تجد عوضـا عمن تفارقــه ... وانْصَبْ فإن لذيذ العيش في النَّصب

إني رأيت ركـود الـماء يفســده ... إن ساح طاب وإن لم يجر لم يطب

والأسد لولا فراق الغاب ما افترست ... والسهم لولا فراق القوس لم يصب

والشمس لو وقفت في الفلك دائمة ... لملَّها الناس من عجم ومن عـرب

والتِّبرُ كالتُّـرب مُلقى في أماكنـه ... والعود في أرضه نوع من الحطب

فإن تغرّب هـذا عـَزّ مطلبـــه ... وإن تغرب ذاك عـزّ كالذهــب

بص أنا من فترة كنت معارض السفر برة مصر لسبب واحد و هو انك اه بتعيش معيشة كويسة و مرتب كويس و لكن طبعا بتفقد ارتباطك بأسرتك و عائلتك و حاجات تانية كتير .

لدرجة ان ليه واحد زميلى سافر المانيا و عاش هناك و كل ما ييجى نتناقش فى الموضوع ده و أقول له انت بتفقد أكتر من اللى بتكتسبه.

دى كانت فكرتى لحد ما سافرت برة مصر و شفت الوضع برة عامل ازاى سواء فى بلاد عربية أو أجنبية و عرفت انى فعلا كنت غلط و عرفت ليه اللى بيسافر مبيرجعش .. بغض النظر عن مستوى المعيشة الأحسن أو الفلوس .. انت فعلا بتحس انك بنى ادم و ان الناس بتعاملك باحترام و الناس بتحب بعضها و لو خبطت واحد فى الشارع هو هيقول لك أنا اسف هنا لو راكب مترو ووقف مره واحده و خبطت فى اللى جنبك بتلاقية بيزعق لك و ممكن يخانقك.

و اللى تلاقية مشغل موبايله على اغانى بيئه بأعلى صوت و لو قلت له لو سمحت وطى الصوت شوية يستغرب كأن مش من حقك انك تطلب منه الطلب ده.

و انت داخل المترو هنا الناس بتتخانق عشان تركب الأول عشان تقعد .. بره الناس بتعزم على بعضها عشان التانى يدخل الأول عشان يدخل.

بره نظام و التزام و مفيش نفسنه فى الشغل ولا رشاوى و لا تزوير.

ده غير اللى ماشى يزنق عليك فى الشارع و اللى ماشى على 180 كيلومتر/الساعة و اللى ماشى بيتنقل بين أربع حارات و.. و ..

طبعا الموضوع مش مطلق .. يعنى مش أى حد يسافر عشان الحاجات دى .. عشان أفضل مكان هو اللى فيه الناس اللى بتحبهم ..طبعا لو تعرف تاخد أسرتك و تعيش برة ده يبقى الحل الأفضل بس بالنسبة للى بيقول انت هتبعد عن أهلك .. بصراحة الزحمة و ضغوط الحياة مخلتش حد فاضى لحد و أعرف ناس أخواته معاه فى نفس العمارة و قليل لما بيشوفهم أو بيزورهم من الشغل و المسؤليه.

أنا نفسى أشوف البلد أحسن بلد فى الدنيا و أنا مش بلوم على الناس اللى بتعمل السلبيات اللى قلتها فوق أو غيرها عشان العيب مش منهم .. العيب انهم نتعلموش ايه الصح و ايه الغلط و ان الالتزام بالقواعد ده بيفيد الفرد و المجتمع و العكس صحيح.

بصراحة الموضوع ده جه في وقته جدا وفي نقط كتير جدا ممكن الواحد يتكلم فيها وبما اني مسافر بقالي سنة دلوقتي فانا في قلب الاحداث
بصراحة انا قبل ما اسفر كنت موهوم جدا بموضوع السفر ده لدرجة كانت مخلياني شايف كل حاجة وحشة في البلد وعايز ابعد باي طريقة لدرجة اني وصلت ان نفسيتي تعبت من كل حاجة وكنت بحلم باليوم اللي هسافر فيه المهم جاتلي فرصة سفر كويسة وسافرت ايطاليا وباقلي هناك سنة اهوو
بصراحة في تفاصيل كتير عايز اتكلم فيها بس مش مجمع كل حاجة دلوقتي بس عموما لو هنقارن مصر ب اوروبا فا احنا كنا ظلمنا مصر بكا المقايس اكننا بالظبط بنقارن عربية 127 بعربية بي ام x3 مثلا يعني مثلا انا في ايطاليا وهي تعتبر من الدول المتوسطة اقتصاديا في اوربا مش زي المانيا ولا فرنسا مثلا فا هي في اسوء حالتها احسن من مصر في احسن حالتها
بالنسبة للمازيا حاجات كتير احنا مفتقدنها في مصر منها طبعا الحاجات الاساسية زي
مواصلات عامة
مدارس حكومية ومستشفايات
هدوء وزوق كفاية كمية الاشجار و الاماكن الخضرا و الحدائق اللي مفتوحة للناس ببلاش
كمان كل حاجة بمواعيد والناس بتصحي من بدري جدا يعني 6 الصبح بتكون الناس في الشارع
بصراحة انا بقيت ببقي ماشي في الشارع حاسس بامان اكتر من مصر
طبعا الشغل وقانون العمل حاجة هايلة والقانون بيطبق ع الجميع وكمان في حاجة كويسة ان في روح القانون مش معني انك عملت حاجة غلط يبقي خلاص لا ممكن تكلم الظابط ولو ماكنتش تعرف او ماخدتش بالك ممك يعديهالك
كمان في حاجة حلوة قوي مفيش توك توك ولا ميكروباصات و لا موتوسيكلات صيني ودي كانت من ضمن الحاجات اللي تعبتني جدا في مصر

بالنسبة للسلبيات برضو كتير
اولها ان احنا مصريين المصريين شوهو صورتهم جدا من كتر المشاكل ده غير ان المصريين مع بعض بجد حاجة فظيعة جدا مبيحبوش الخير لبعض وكمان هنا في ايطاليا المستوي الثقافي للمصريين ضعيف جدا جدا حوالي 90 % شغالين في المطاعم ومحلات البيتزا والخضار وده طبعا بيعمل بعد ثقافي واجتماعي يعني بالرغم من اني اتعرفت علي ناس كتير فا صحابي تقريبا 4 بس وكل فين وفين لما نتقابل وده بيعمل حالة من الملل ده غير ان ناس كتير جدا لما ربنا بيكرمهم ويكون معاه فلوس بيحاول يبعد عن المصريين واول كلمة تسمعها منهم انا مابعرفش مصرييا
عموما من غير مانخش في تفاصيل كتير من السلبيات بردو بالنسبة لنا كا مسلمين
ان مفيش جوامع يعني روما تقريبا مفهاش غير 5 او 6 جوامع 3 منهم كبار والباقي بيكون عبارة عن جراج ومعمول جامع ودي من الحاجات اللي مضيقاني جدا مفيش طبعا صوت اذان بيتسمع وناس كتير مابتفكرش حتي تروح تصلي الجمعة اللي عنده شغل واللي نسي اصلا ان في صلاة جمعة
وبالنسبة لنا بردو كامصريين مسلمين او مسيحين الحياة اباحية جدا جدا سوء في الشارع او في التلفزيون او في اي حتة ودي حاجات احنا مانقبلهاش ومش متعودين عليها
يعني لو عندك بنت صغيرة مثلا صعب جدا جدا تعرف تربيها في وسط المجتمع ده وانا شوفت امثلة قدامي كتير لناس مولودة هنا سوء من اب وام مصريين او من اب مصري وام اجنبية في ناس اصلا بيفتخروا ان ولادهم مابيعرفوش يتكلمو عربي وحياتهة بقت 90% زي الاوربين
بردو البعد عن الاهل والاصدقاء صعب جدا ومحستيش بيه غير لما سافرت مع اني عمري ما فكرة في الكلام ده وانا في مصر مع اني بردو كنت بعيد عن اهلي جدا وصحابي مش دايما معاهم بس حسيت بقيمة الحاجاة دي لما سافرت في كذا موقف
وبردو من النعم اللي احنا مش حاسسين بيها في مصر هي الجو ياجماعة الجو عندنا في مصر فعلا جميل ومن احسن اجواء العالم انا اعرف ايطالين راحو يعيشو في مصر من كتر ما الجو حلو يعني انا وانا بكتبلكو دلوقتي درجة الحرارة - 5
انا كنت بحب المطر والجو السقعة وانا في مصر بس لما جيت هنا و شوفت السقعة اللي بجد بقيت اكره السقعة والمطرة وفعلا بقيت احن قوي لجو مصر
انا تعبت من الكتابة ومستني مناقشتكم :)