الموضوع: تجربة قيادة نيو سيراتو 2011 بالفتيس الجديد (6 سرعات)

اتيحت لى اليوم فرصة جيدة لتجربة النيو سيراتو موديل 2011

بالفتيس الجديد ( الست سرعات) - السيارة خليجى وليست توكيل

والحقيقة لم اعرف بلد اعادة التصدير هل هى سعودى - كويتى - اردنى - ... الخ

لان بها توليفة عجيبة شويتين ....

السيارة قام احد اصدقائى بأستأجرها نظرا لان سيارته تعرضت لحادث وهى فى الاصلاح.

السيارة منذ ان جلست خلف عجلة قيادتها عدادها كان عامل 3000 كم فقط وقد قمت

بقيادتها لمدة 60 كم تقريبا

لون السيارة بنى وفرش المقاعد طوبى والتابلوه والابواب اسود فى طوبى وكل شىء بلاستيك

السيارة اول فئة وسعرها 103 الف جنيه

مش هتكلم كتير عن العربية لانها قتلت بحثا وكلاما اللى يهمنا هما هو ناقل الحركة الجديد

فى بداية التحرك بالسيارة العربية فى غاية السلاسة والعزم شديد (نسب التخفيض الجديدة عاملة شغل)

وتكتسب سرعتها فى زمن قليل , شعورك بالنقلات معدوم حاولت اكثر من مرة الشعور بها و لم اتمكن

لما كنت بأحول لوضع الاستبترونك اجد ان النقلة على السرعة السادسة (بتنقل لاعلى غيار فى زمن قليل جدا)

الكيك داون مع هذا الفتيس ضعيف ما بيخطفش العربية منك زى الفتيس الاربع سرعات

فقط ارتفاع صوت المحرك والـ RPM بأستجابة قليلة نسبيا فى التسارع

طبعا الاستبترونيك فى وجود الست سرعات اكثر متعة مع الاستمتاع بارقام النقلات على

شاشة التابلوه بنورها الاحمر الجميل من 1 الى 6

كمان فيه ميزة ان وضع عصاية الفتيس P R N D مضيئة بمعنى: لما جيب الفتيس على

وضع الـ D حرف الـ D بينور احمر وهكذا كل الاوضاع ....ومع اضاءة النور الصغير

كل الرموز بجوار عصاية الفتيس بتضىء بلون احمر خافت و حرف الوضع الحالى يضىء بنور احمر قوى

الجراب او الكسوة الجلد لعصاية الفتيس والاطار النيكل المحيط بها فى غاية الاناقة وتحس انك فى BMW

قيادة العربية كانت غاية فى السلاسة والهدوء والـ RPM منخفض على سرعات عالية

الفتيس الست سرعات بصراحة اضافة غير عادية اضافتها كيا فى سيارتها والتى اعطت

لها رونقا خاصا واداء هادىء سلس - الف مبروك لكل من سيشترى سيارة بناقل الحركة الجديد

على هامش تجربة القيادة:

طبعا فى اول كام كيلو متر من التجربة كنت مركز مع الفتيس ومريت على اكثرمن مكان غير ممهد

وكانت العفشة "ناعمة وطرية" وكلها حنية على عكس ما هو معتاد من السيراتو

فتعمتد "اكل" العديد من المطبات والذى كانت استجابة السيارة لها فوق الرائعة وكنت مستغرب

وبعدين اكتشفت ان جنطها 15 "أنش" وسبور اول مرة اشوف جنط 15"أنش" سبور..!!!

طبعا عند اكتسابك للسرعة بتحس ان ثابت العربية بيقل والسيطرة عليها مش بسهولة وده مش

جديد على السيراتو واقصى سرعة جبتها فى وضع الستيبترونك كانت 180 كم ومقدرتش

اجيب اكتر من كده.

على الرغم من العربية فاضية والراديو One DIN ومافيهاش USB و Air Bag واحدة للسائق

الا انى كنت مستمتع بها تماما

فعلا سيراتو "غير" - نصيحة لكل من هو مقبل على شراء السيراتو لابد من الفتيس الجديد

وياريت يجبها بالجنط الـ15 أنش سبور ....


اترككم مع بعض الصور للموضوع ....

طبعا الفتيس غنى عن التعريف




رموز عصاية الفتيس مضيئة و وضع الـ D واضح بأضاءة أقوى




الكونصول الاوسط والراديو One DIN ولايوجد USB




الاضاءة الحمراء المميزة ليلا




شكل العدادات





الفتيس بيجيب اعلى نقلة فى زمن قليل

الغيار السادس قبل الوصول لـ 100 كم/ ساعة





الوصل لسرعة واعلى غيار على عدد لفات قليل للمحرك





مؤشر للحرارة الخارجية بجوار الساعة




الجنط 15 أنش سبور

ارتفاع جدار الاطار ادى لنعومة العفشة وقلة الاحساس مشاكل الطريق




بعد نهاية تجربة القيادة وقطع 67 كم




سيارة التجربة - بعد الوصول




اخيرا وليس اخر "هانى بك فاروق"

صاحب السيارة واللى اشتطرط انه لازم يطلع فى النايل موتورز

علشان اجرب العربية- شكرا مستر هانى